చిన్నారిపై లైంగిక దాడి కేసులో దోషికి క్షమాభిక్ష.. హంగేరీ అధ్యక్షురాలు రాజీనామా

చిన్నారిపై లైంగిక దాడికి పాల్పడిన కేసులో నిందితుడికి హంగేరీ ప్రభుత్వం క్షమాభిక్ష ప్రసాదించడంపై దుమారం రేగుతోంది. ప్రతిపక్షాల నుంచి తీవ్ర విమర్శలు వెల్లువెత్తడంతో ఆ దేశ అధ్యక్షురాలు కటాలిన్ నోవాక్ పదవి నుంచి దిగిపోయారు. రాజీనామా చేసిన ఆమె.. ప్రజలను నొప్పించాలన్నది తన ఉద్దేశం కాదని ప్రకటించారు. హంగేరీలో అధికారం ప్రజలతో ఎన్నుకున్న ప్రధాని చేతుల్లో ఉంటుంది. అధ్యక్షులకు నామమాత్రపు అధికారాలు మాత్రమే ఉంటాయి. కాగా, రెండేళ్ల కిందట మార్చి 2022లో కటాలిన్ అధ్యక్ష బాధ్యతలు చేపట్టారు. హంగేరీ చరిత్రలో ఓ మహిళ అధ్యక్షురాలు కావడం ఇదే తొలిసారి.

ప్రధాని విక్టర్‌ ఒర్బర్ ఆస్బార్న్‌కు కీలక మద్దతుదారుగా ఉన్న కటాలిన్ రాజీనామా చేయడం పరిస్థితులను మరింత తీవ్రంగా మార్చింది. కొద్ది రోజుల కిందట ఓ చిల్డ్రన్ హోమ్ డిప్యూటీ డైరెక్టర్ ఒకరు అక్కడి చిన్నారిపై లైంగిక దాడికి పాల్పడినట్టు ఆరోపణలు వెలువెత్తాయి. ఈ దారుణాన్ని బయటకు పొక్కకుండా ఆ అధికారికి సహకరించిన మరో ఉద్యోగికి అధ్యక్షురాలు ప్రభుత్వ సూచన మేరకు క్షమాభిక్ష పెట్టింది. ఇటీవలే ఈ విషయాన్ని స్థానిక ఓ వెబ్‌సైట్ బయటపెట్టడంతో ఒక్కసారిగా కలకలం రేగింది.

ప్రధాని రాజీనామాకు ప్రతిపక్షాలు పట్టుబట్టాయి. దేశవ్యాప్తంగా నిరసనలు హోరెత్తగా.. శుక్రవారం నాడు ఆందోళనకారులు అధ్యక్షుడి నివాసం ముందు ధర్నాకు దిగారు. ప్రధానితో పాటూ అధికార పక్షం మొత్తం ఈ ఘటనకు బాధ్యత వహించాలని డిమాండ్ చేశారు. ఖతార్‌లో జరుగుతోన్న వరల్డ్ పోలో ఛాంపియన్‌షిప్స్‌లో హంగేరీ జట్టు మ్యాచ్‌ను చూసేందుకు అక్కడకు వెళ్లి అధ్యక్షురాలు, నిరసనల విషయం తెలియగానే హుటాహుటిన స్వదేశానికి చేరుకున్నారు. విమానం దిగిన వెంటనే తాను రాజీనామా చేస్తున్నట్టు కటాలిన్ నోవాక్ ప్రకటించారు. ఎవర్నీ నొప్పించాలనే ఉద్దేశం తనకు లేదని, పిల్లలు, కుటుంబాల రక్షణకే తాను అనుకూలమని స్పష్టం చేశారు.

తన నిర్ణయంతో బాధపడ్డ వారందికీ క్షమాపణలు చెబుతున్నానని వ్యాఖ్యానించారు. అయితే, ప్రధాని కూడా గద్దెదిగాలంటూ ప్రతిపక్షాలు నిరసనలు కొనసాగిస్తున్నాయి. కటాలిన్ రాజీనామా చేసిన కొద్దిసేపటికే ప్రధానికి మరో మద్దతుదారుడైన న్యాయశాఖ మాజీ మంత్రి జుడిత్ వర్గా కూడా రాజకీయాల నుంచి తప్పుకుంటున్నట్టు ప్రకటించారు. ఆమె ఫేస్‌బుక్‌లో మాట్లాడుతూ, ‘నేను ఎంపీగా, యూరోపియన్ పార్లమెంటు ఎన్నికల చీఫ్‌గా తప్పుకుంటున్నాను’ అని తెలిపారు.