పిల్లలను కనండి.. రూ.62 లక్షలు తీసుకోండి.. ఉద్యోగులకు కంపెనీ బంపరాఫర్

అభివృద్ధి చెందుతున్న దేశాల్లో జననాల రేటు తగ్గిపోతుండటంతో ఉత్పాదకతపై తీవ్ర ప్రభావం చూపుతుందనే ఆందోళన వ్యక్తమవుతోంది. చైనా, జపాన్, దక్షిణ కొరియా వంటి దేశాల్లో జనాభా క్షీణించడంతో ప్రభుత్వాలు అప్రమత్తమయ్యాయి. పిల్లలను కనడానికి ప్రోత్సహకాలను అందజేయడానికి ముందుకొచ్చాయి. ఈ క్రమంలో తమ దేశంలో దారుణంగా పడిపోయిన జననాల రేటును పెంచడానికి దక్షిణ కొరియాకు చెందిన ఓ సంస్థ కీలక నిర్ణయం తీసుకుంది. తమ సంస్థలో ఉద్యోగులు పిల్లలను కనాలని, అలా చేస్తే ఆర్ధిక ప్రోత్సాహం అందజేస్తామని ప్రకటించింది. పిల్లలను కన్న ప్రతిసారీ 100 మిలియన్ కొరియన్ వోన్‌లు (75,000 డాలర్లు) అందజేస్తామని తెలిపింది. భారత కరెన్సీలో ఈ మొత్తం దాదాపు రూ.63 లక్షలు.

దక్షిణ కొరియాకు చెందిన ప్రముఖ నిర్మాణ సంస్థ బూయోంగ్ గ్రూప్ 2021 నుంచి ఈ పథకం చేపట్టింది. దీంతో గత మూడేళ్లలో 70 మంది పిల్లలను కన్న తమ ఉద్యోగులకు 7 బిలియన్ కొరియన్ వోన్లు (5.25 మిలియన్ డాలర్లు) అందజేసింది. ఈ ప్రోత్సాహకానికి మహిళ, పురుష ఉద్యోగులు అర్హులేనని పేర్కొంది. ‘జననాలను ప్రోత్సహించడానికి, దేశ భవిష్యత్తు గురించి ఆలోచించే సంస్థగా మేము గుర్తింపు పొందుతామని నేను ఆశిస్తున్నాను’ అని బూయోంగ్ గ్రూప్ ఛైర్మన్ లీ జూంగ్ కీన్ అన్నారు. ఒకవేళ నిర్మాణం కోసం స్థలాన్ని ప్రభుత్వం అందిస్తే ముగ్గురు పిల్లలు ఉన్న ఉద్యోగులకు 300 మిలియన్ కొరియన్ వోన్ (225,000 డాలర్లు) నగదు లేదా అద్దె గృహాలలో ఎంపిక చేసుకునే అవకాశం కల్పిస్తామని చెప్పారు. 2022లో ప్రపంచంలోనే అత్యల్ప సంతానోత్పత్తి రేటు (0.78) దక్షిణ కొరియాలో నమోదయ్యింది. సంతానోత్పత్తి రేటు ఒక మహిళ తన జీవితకాలంలో కలిగి ఉన్న పిల్లల సగటు సంఖ్యను సూచిస్తుంది. అధికారిక అంచనాల ప్రకారం.. 2025లో అక్కడ సంతానోత్పత్తి రేటు 0.65కి తగ్గుతుందని అంచనా.

దక్షిణ కొరియా ప్రభుత్వంతో పాటు ప్రయివేట్ సంస్థలు పిల్లలను కనేలా జంటలను ప్రోత్సహించడానికి ఆర్థిక ప్రయోజనాలను అందిస్తాయి. అయితే ఇప్పటివరకు ఎవరూ బూయోంగ్ గ్రూప్ స్థాయి ప్రోత్సాహకాలను అందించలేదు. బుయోంగ్ సంస్థకు నిర్మాణ రంగంలో 40 ఏళ్లకుపైగా చరిత్ర ఉంది. ఈ సంస్థను 1983లో స్థాపించగా.. ప్రస్తుతం 2.70 లక్షల మంది ఉద్యోగులు ఉన్నారు. ఇక, సింగపూర్ ప్రధాని లీ సీన్ లూంగ్ సైతం తమ దేశ ప్రజలకు పిల్లలను కనాలని పిలుపునిచ్చారు. మీ కుటుంబాల్లోకి చిట్టి డ్రాగన్‌ను ఆహ్వానించండని చైనా నూతన సంవత్సరాది సందర్భంగా శుక్రవారం ఈ వ్యాఖ్యలు చేశారు.