బీహార్‌లో బలపరీక్ష నెగ్గిన నితీష్.. ఆర్జేడీ ఎమ్మె్ల్యేల క్రాస్ ఓటింగ్.. అవిశ్వాస తీర్మానంతో స్పీకర్‌ తొలగింపు

బీహార్‌ ముఖ్యమంత్రి, జేడీయూ చీఫ్‌ నితీశ్‌ కుమార్‌.. అసెంబ్లీలో నిర్వహించిన బలపరీక్షలో నెగ్గారు. తన బలం నిరూపించుకుని అధికారాన్ని నిలబెట్టుకున్నారు. మొత్తం 243 స్థానాలు ఉన్న బీహార్‌ అసెంబ్లీలో.. ప్రభుత్వం కొనసాగాలంటే నితీశ్ కుమార్‌కు 122 మంది ఎమ్మెల్యేల మద్దతు అవసరం కాగా.. సోమవారం నిర్వహించిన విశ్వాస తీర్మానంపై ఓటింగ్‌ సందర్భంగా నితీశ్‌ కుమార్‌ ప్రభుత్వానికి మద్దతుగా 129 మంది ఎమ్మెల్యేలు ఓటు వేశారు. ఓటింగ్ సమయంలో ప్రతిపక్ష పార్టీ ఎమ్మెల్యేలు సభ నుంచి వాకౌట్ చేయడం గమనార్హం. దీంతో ప్రభుత్వానికి వ్యతిరేకంగా ఓటు వేయలేదు. ఇక ఈ ఓటింగ్‌లో ముగ్గురు ఆర్జేడీ ఎమ్మెల్యేలు.. నితీశ్ కుమార్ ప్రభుత్వానికి మద్దతుగా ఓటు వేయడం సంచలనంగా మారింది.

ఇటీవలె మహాఘట్‌బంధన్‌ నుంచి విడిపోయిన జేడీయూ అధినేత, బీహార్ సీఎం నితీశ్ కుమార్ బీజేపీతో జట్టుకట్టారు. ఈ సందర్భంగా కొత్తగా ఏర్పాటు చేసిన ప్రభుత్వంపై విశ్వాసం కోరుతూ ముఖ్యమంత్రి నితీష్ కుమార్ విశ్వాస తీర్మానాన్ని ప్రవేశపెట్టారు. ఈ తీర్మానంపై చర్చ సందర్భంగా అధికార విపక్షాల మధ్య తీవ్ర మాటల యుద్ధం చోటు చేసుకుంది. మరోవైపు.. ముగ్గురు ఆర్జేడీ ఎమ్మెల్యేలు చేతన్ ఆనంద్, నీలం దేవి, ప్రహ్లాద్ యాదవ్ అసెంబ్లీలో తమ పార్టీ నేతల వైపు కాకుండా ప్రభుత్వ పక్షం వైపు కూర్చున్నారు. ఈ నేపథ్యంలోనే మొత్తం 243 మంది ఎమ్మెల్యేలు ఉన్న బీహార్ శాసనసభలో 122 ఎమ్మెల్యేల మద్దతు కావాల్సి ఉండగా.. నితీశ్ కుమార్ ప్రభుత్వానికి 129 మంది మద్దతు పలికారు. దీంతో విశ్వాస పరీక్షలో నితీశ్ కుమార్ విజయం సాధించారు.

అయితే విశ్వాస పరీక్ష సందర్భంగా ఆర్జేడీ ఎమ్మెల్యేలు అధికార పక్షం వైపు కూర్చోవడంపై మాజీ డిప్యూటీ సీఎం, ఆర్జేడీ నేత తేజస్వీ యాదవ్‌ తీవ్ర అభ్యంతరం వ్యక్తం చేశారు. ఓటింగ్‌ ముగిసే వరకు ఎమ్మెల్యేలు తమ తమ స్థానాల్లో కూర్చోవాలని, లేకుంటే ఓటు చెల్లుబాటు కాదని తెలిపారు. ఈ క్రమంలోనే ముగ్గురు ఆర్జేడీ ఎమ్మెల్యేలు ఆర్జేడీ-జేడీయూ కూటమిలో చేరడం ప్రతిపక్ష మహాఘటబంధన్ కూటమికి పెద్ద ఎదురుదెబ్బగా మారింది.

అయితే అంతకుముందు అసెంబ్లీ స్పీకర్‌ అవధ్ బిహారీ చౌధరీపై పెట్టిన అవిశ్వాస తీర్మానం నెగ్గి.. ఆయనను స్పీకర్ స్థానం నుంచి తొలగించిన తర్వాత ఈ తీర్మానాన్ని ప్రవేశపెట్టడం గమనార్హం. బీహార్ అసెంబ్లీ స్పీకర్, ఆర్జేడీ నేత అవథ్ బిహారీ చౌదరీపై.. బీజేపీ ఎమ్మెల్యే నంద కిషోర్ యాదవ్ అవిశ్వాస తీర్మానం ప్రవేశపెట్టారు. ఈ తీర్మానానికి మద్దతుగా 125 మంది సభ్యులు ఓటు వేయడం వల్ల ఆయన స్పీకర్పదవి నుంచి దిగిపోవాల్సి వచ్చింది. ఇక అవిశ్వాసానికి వ్యతిరేకంగా 112 మంది ఓటు వేశారు.