నల్ల చిరుతపులి.. ఏకంగా గుమ్మం ముందుకే వచ్చింది, సీసీటీవీ వీడియో

నల్ల చిరుతపులి.. అదే, ‘బ్లాక్ పాంథర్’ ను ఎప్పుడైనా చూశారా. ఏదో ‘జంగిల్ బుక్’ సినిమాలో చూడటమే తప్ప, అలాంటి నల్ల చిరుతలు భూమ్మీద ఉంటాయా..? అనుకోవచ్చు కొంత మంది. అవును ఉన్నాయి. ఎక్కడో కాదు, మన భారత్‌లోనే. పైగా మన పొరుగు రాష్ట్రాల్లోనే. తమిళనాడులోని నీలగిరి అడవుల్లో నల్ల చిరుతపులులు చాలా అరుదుగా కనిపిస్తుంటాయి. ఏడాది కిందట మధ్యప్రదేశ్‌లో అడవిలో సఫారీకి వెళ్లిన పర్యాటకులకు ఓ నల్ల చిరుత కనిపించింది. తాజాగా కూనూర్‌లో బ్లాక్ పాంథర్ కనిపించింది. అడవిలో కాదు, ఈసారి ఏకంగా ఇంటి ముందుకే వచ్చింది.

చిమ్మ చీకట్లో ఇంటి గుమ్మం ముందు ‘నల్ల చిరుతపులి’ కనిపిస్తే..! వామ్మో.. చూడగానే ప్రాణాలు పోతాయేమో! సీసీ కెమెరాకు చిక్కిన ఈ దృశ్యాలను చూస్తుంటే, ఇదే భావన కలుగుతోంది. ఆ బ్లాక్ పాంథర్ మాంచి బలిష్టంగా ఉంది. డాక్టర్ కలామ్ ఫౌండేషన్ ఛైర్మన్ కిశోర్ చంద్రన్ ట్విటర్ ద్వారా ఈ వీడియోను షేర్ చేశారు. గురువారం (ఫిబ్రవరి 16) వేకువజామున ఇంటి పరిసరాల్లోకి సైలెంట్‌గా ఓ నల్ల చిరుతపులి వచ్చిందని ఆయన ట్వీట్ చేశారు. బ్లాక్ పాంథర్‌లు.. జాగ్వార్, లెపర్డ్ కోవకు చెందినవే. అయితే, నల్ల రంగులో ఉండటం వీటిని అరుదైన జాతిగా నిలిపాయి. ఇదే నీలగిరి ప్రాంతంలో 2021 మార్చిలో ఓ నల్ల చిరుతపులి అర్ధరాత్రి జనావాసాల్లోకి వచ్చింది. వీధిలో ఉన్న కుక్కపై దాడి చేసి, నోట కరుచుకొని పారిపోయింది. ఆ దృశ్యాలు సీసీ కెమెరాలో నిక్షిప్తమయ్యాయి.

ఒడిశాలోని సుందర్‌గఢ్‌ అడవుల్లోనూ ఈ అరుదైన నల్ల చిరుతపులులు ఉన్నాయి. అడవుల్లో అమర్చిన కెమెరాల్లో 2022 డిసెంబర్‌లో నల్ల చిరుతపులి దృశ్యాలు రికార్డయ్యాయి. అంతకుముందు ఆగస్టు 20న (2022) మధ్యప్రదేశ్‌లోని పెంచ్ టైగర్ రిజర్వ్‌లో నల్ల చిరుతపులి కనిపించింది. నాడు సఫారీ వాహనంలో పర్యాటకుల కళ్ల ముందు నుంచి గబగబా వెళ్లిపోయిన బ్లాక్ పాంథర్ వీడియో సోషల్ మీడియాలో తెగ వైరల్ అయ్యింది.

జీవ వైవిధ్యానికి పెట్టిన పేరైన భారతదేశంలో 26 ఏళ్ల కిందటే ఇలాంటి చిరుతపులులు సంచరించినట్లు రికార్డులు చెబుతున్నాయి. అయితే, అప్పట్లో అడవుల్లో కెమెరాలు అమర్చే విధానం లేకపోవడంతో వాటికి సంబంధించిన ఆధారాలు లేవని అధికారులు చెబుతున్నారు. తాజాగా వెలుగులోకి వచ్చిన బ్లాక్ పాంథర్ వీడియో వైరల్‌గా మారడంతో ’జనావాసాలు - వన్యప్రాణుల మనుగడ’ గురించి ఆసక్తికర చర్చ జరుగుతోంది.

నిర్మలమైన ప్రకృతికి నిలయమైన నీలగిరి పర్వతాల్లో ఉన్న కూనూర్‌లో వన్యప్రాణుల సంచారం కొత్తేమీ కాదు. తరచూ జనావాసాల్లోకి చిరుతలు వస్తుంటాయి. స్థానికుల నుంచి తరచూ ఫిర్యాదులు కూడా అందుతుంటాయి. ప్రజల భద్రత ముఖ్యమేనని.. అయితే, జీవవైవిధ్యాన్ని కాపాడాల్సిన బాధ్యత కూడా ఉందని ఫారెస్టు అధికారులు చెబుతున్నారు. ప్రజలు ఆందోళనకు గురికావొద్దని, ఇలాంటి ఘటనలు అరుదుగా జరుగుతుంటాయని సూచించారు. రాత్రి వేళల్లో బయటకి రావాల్సి వస్తే మాత్రం తగిన జాగ్రత్తలు తీసుకోవాలని సూచించారు.