నిరుద్యోగులకు ఉపశమనం.. ఏపీపీఎస్‌సీ కీలక నిర్ణయం

ప్రభుత్వ ఉద్యోగాల కోసం పోటీపడే నిరుద్యోగ యువతకు ఏపీపీఎస్‍‌సీ కాస్త ఉపశమనం కలిగించే వార్త అందింది. క్లర్క్ ఉద్యోగాల నియామకం కోసం స్టేట్ బ్యాంక్ ఆఫ్ ఇండియా (SBI) నిర్వహిస్తున్న క్లరికల్ పరీక్షల తేదీల్లో మార్పు చేయాలని ఏపీపీఎస్‌సీ కోరింది. ఈ మేరకు ఎస్బీఐకు ఏపీపీఎస్సీ కార్యదర్శి లేఖ రాశారు. అసలు విషయానికి వస్తే.. ఫిబ్రవరి 25న ఎస్‌బీఐ క్లర్కు పరీక్ష ఉంది. ఇక అదే రోజు గ్రూప్‌ 2 పరీక్షను ఏపీపీఎస్సీ నిర్వహిస్తోంది. దీంతో ఆంధ్రప్రదేశ్ వ్యాప్తంగా ఉన్న అభ్యర్థులు అయోమయంలో పడిపోయారు. కొంతమంది అభ్యర్థులు రెండు పరీక్షలకు దరఖాస్తు చేసుకోవటంతో ఏదో ఒక పరీక్షకు మాత్రమే హాజరవ్వాల్సిన పరిస్థితి తలెత్తింది.

ఈ నేపథ్యంలోనే ఏపీపీఎస్సీ తీరుపై ఉద్యోగ అభ్యర్థులు విమర్శలు గుప్పించారు. జాతీయస్థాయి పరీక్షలను పరిగణనలోకి తీసుకోకుండా.. గ్రూప్-2 పరీక్ష తేదీని నిర్ణయించడంపై విమర్శలు వ్యక్తమయ్యాయి. ఏపీపీఎస్సీ ఏమీ ఆలోచించకుండానే ఎస్‌బీఐ క్లరికల్ మెయిన్స్ పరీక్ష జరుగుతున్న రోజునే.. గ్రూప్ 2 ప్రిలిమ్స్ పరీక్షను షెడ్యూల్ చేయడంపై నిరుద్యోగులు మండిపడ్డారు. సాధారణంగా ఉద్యోగ నియామకాలకు సంబంధించి పరీక్షల తేదీని ఖరారు చేసేటప్పుడు ఇతరత్రా పరీక్షల షెడ్యూల్‌ను పరిగణనలోకి తీసుకుంటూ ఉంటారు. అయితే ఏపీపీఎస్సీ ఏమీ ఆలోచించకుండానే గ్రూప్ -2 ప్రిలిమ్స్ పరీక్ష తేదీని షెడ్యూ్ల్ చేసిందనే విమర్శలు వచ్చాయి.

విమర్శల నేపథ్యంలోనే ఏపీపీఎస్సీ కీలక నిర్ణయం తీసుకుంది. ఎస్‌బీఐ క్లరికల్ మెయిన్స్ పరీక్షల తేదీని మార్పు చేయాలంటూ ఎస్‌బీఐకు లేఖరాసింది. అయితే ఏపీపీఎస్సీ లేఖపై ఎస్‌బీఐ ఎలా స్పందిస్తుందనేదీ చూడాలి మరి.