అతన్ని నమ్మి రెండుసార్లు పదవి ఇప్పించా.. కానీ అలా చేశాడు: పవన్ కళ్యాణ్

విశాఖపట్నం పర్యటనలో ఉన్న జనసేన అధినేత పవన్ కళ్యాణ్.. ఉమ్మడి విశాఖ జిల్లా నేతలతో సమావేశమయ్యారు. ఈ సందర్బంగా వచ్చే ఎన్నికలపై వారికి దిశానిర్దేశం చేశారు. అలాగే ఉమ్మడి విశాఖ జిల్లాలో నాలుగు స్థానాలలో జనసేన పోటీ చేయాలని నిర్ణయించింది. ఈ నేపథ్యంలోనే భీమిలి, పెందుర్తి, గాజువాక, ఎలమంచిలి స్థానాలకు సమన్వయకర్తలను సైతం నియమించింది. అయితే ఉమ్మడి విశాఖ జిల్లా నేతల సమావేశంలో పవన్ కళ్యాణ్ కీలక వ్యాఖ్యలు చేశారు.

2024 ఎన్నికల్లో టీడీపీ, జనసేన కూటమి అధికారంలోకి వస్తుందని పవన్ కళ్యాణ్ ధీమా వ్యక్తం చేశారు. పార్టీ కోసం పనిచేసిన వారికి సముచిత స్థానం కల్పించే బాధ్యత నాది అంటూ భరోసా ఇచ్చారు. జనసేన కోసం పనిచేసిన ప్రతి ఒక్కరికీ సముచిత గౌరవం కల్పిస్తామని అన్నారు. 2019 ఎన్నికల తర్వాత పార్టీ బలంగా నిలిచేందుకు దోహదపడ్డ నాయకులకు అండగా ఉంటామని చెప్పారు. అలాగే ఎన్నికల్లో మూడింట ఒకవంతు పదవులు దక్కించుకుందామన్న పవన్.. క్షేత్రస్థాయి నుంచి బలాన్ని సద్వినియోగపరుకొంటూ కూటమిని గెలుపు దిశగా తీసుకెళ్లేందుకు ప్రణాళికాబద్ధంగా వ్యవహరించాలని సూచించారు. వ్యక్తిగతంగా తన గెలుపు గురించి ఆలోచించడం లేదని.. సమిష్టిగా గెలుపు కోసమే తన అడుగులు ఉంటాయని పవన్ కళ్యాణ్ స్పష్టం చేశారు.

ఇదే సమావేశంలో ఎన్నికల నిర్వహణ కోసం జనసేన పార్టీ నిధికి రూ.10 కోట్లు ఇస్తున్నట్లు పవన్ కళ్యాణ్ ప్రకటించారు. అలాగే గతంలో జరిగిన ఓ చిన్న ఘటనను పవన్ కళ్యాణ్ గుర్తుచేసుకున్నారు. ప్రజారాజ్యంలో ఉన్న పార్టీలో ఉన్నప్పటి పరిచయంతో ఓ నేతకు రెండసార్లు టీటీడీ సభ్యుడిగా అవకాశం ఇప్పించానని పవన్ కళ్యాణ్ గుర్తుచేసుకున్నారు. అయితే అప్పటికీ ఆ నేత జనసేనలోకి రాలేదన్నారు. ఎన్నికల్లోనే కాదు.. ఎన్నికల తర్వాత కూడా కూటమి ప్రభుత్వంలో నామినేటెడ్ పదవుల్లో జనసేన పార్టీ నేతలకు ప్రాధాన్యం ఇస్తామని పవన్ కళ్యాణ్ చెప్పారు ఆంధ్రప్రదేశ్ ఎన్నికల్లో ప్రజలు స్పష్టమైన తీర్పు ఇవ్వబోతున్నారన్న పవన్ కళ్యాణ్.. ఏపీకి సుస్థిర పాలన అవసరమని, అప్పుడే అభివృద్ధి సాధ్యమని అన్నారు.