పవన్ కళ్యాణ్ దూకుడు.. 4 స్థానాలకు సమన్వయకర్తల ప్రకటన.. అనకాపల్లి బరిలో నాగబాబు

ఏపీలో ఎన్నికలు సమీపిస్తున్నాయి. దీంతో అన్ని పార్టీలు నియోజకవర్గాల వారీగా ఇంఛార్జులను నియమించే పనిలో పడ్డాయి. ఎన్నికల నాటికి ఆయా నియోజకవర్గాల్లో పార్టీని పటిష్టం చేసుకునేందుకు అసెంబ్లీ సెగ్మెంట్లకు సమన్వయకర్తలను నియమిస్తున్నాయి. వైఎస్ జగన్ ఇప్పటికే పలు స్థానాలకు ఇంఛార్జులను ప్రకటించగా.. జగన్ బాటలనే జనసేన అధినేత పవన్ కళ్యాణ్ సైతం సమన్వయకర్తలను నియమించారు. విశాఖ పర్యటనకు వెళ్లిన జనసేనాని.. స్థానికంగా ఉన్న ముఖ్యనేతలతో భేటీ అయ్యారు. అనంతరం ఉమ్మడి విశాఖ జిల్లా పరిధిలోని నాలుగు అసెంబ్లీ స్థానాలకు సమన్వయకర్తలను నియమించారు. భీమిలి నియోజకవర్గానికి వంశీకృష్ణ శ్రీనివాస్, గాజువాక సమన్వయకర్తగా సుందరపు సతీశ్, పెందుర్తికి పంచకర్ల రమేశ్, ఎలమంచిలి జనసేన సమన్వయ కర్తగా సుందరపు విజయ్ కుమార్‌ను జనసేన పార్టీ నియమించింది.

అయితే ఉమ్మడి విశాఖ జిల్లాలో నాలుగు స్థానాలలో బరిలో నిలవాలని జనసేన నిర్ణయించింది. అందుకు అనుగుణంగానే భీమిలి, గాజువాక, ఎలమంచిలి, పెందుర్తికి సమన్వయకర్తలను నియమించింది. టీడీపీతో పొత్తులో ఉన్న జనసేన పార్టీ.. అభ్యర్థుల ఖరారుపై క్లారిటీ ఇవ్వలేదు. అయితే అభ్యర్థులను ఖరారు చేసే వరకు ఆయా నియోజకవర్గాలకు సమన్వయకర్తలుగా వీరు వ్యవహరించనున్నారు. మరోవైపు అనకాపల్లి లోక్‌సభ సీటులో మెగాబ్రదర్ నాగబాబును బరిలో నిలపాలని జనసేన నిర్ణయించింది. అనకాపల్లి ఎంపీసీటుకు నాగబాబు పోటీచేస్తారని ఇటీవలి కాలంలో ప్రచారం జరుగుతోంది. ఈ ప్రచారానికి అనుగుణంగానే ఆ సీటును ఆయన్నే బరిలో నిలపాలని పవన్ కళ్యాణ్ నిర్ణయించారు.

మరోవైపు.. పవన్ కళ్యాణ్ ఫిబ్రవరి 22న ఢిల్లీ వెళ్లనున్నారు. బీజేపీ అధిష్టానంతో పొత్తులు, సీట్లపై జనసేనాని చర్చించనున్నారు. టీడీపీ, జనసేన, బీజేపీ కూటమిగా ఎన్నికలు వెళ్లాలనేది పవన్ కళ్యాణ్ ఆలోచన. అయితే బీజేపీ 20 అసెంబ్లీ, ఏడు ఎంపీ స్థానాలు అడుగుతున్నట్లు తెలుస్తోంది. ఈ నేపథ్యంలో మరోసారి ఢిల్లీకి వెళ్లనున్న పవన్ కళ్యాణ్.. టీడీపీతో పొత్తు, సీట్ల సర్దుబాటుపై చర్చించనున్నారు. ఆ తర్వాత జనసేన అభ్యర్థులను సైతం ప్రకటించే అవకాశాలు కనిపిస్తున్నాయి.