ఎన్నికల వేళ ఏపీకి కేంద్రం గుడ్ న్యూస్.. ఎన్నాళ్లకెన్నాళ్లకో..

ఆంధ్రప్రదేశ్‌లో ఎన్నికలు సమీపిస్తున్న వేళ.. ఏపీకి కేంద్ర ప్రభుత్వం గుడ్ న్యూస్ వినిపించింది. ఎప్పటి నుంచో ఎదురుచూస్తున్న రెండు కీలక ప్రాజెక్టులను ప్రధానమంత్రి నరేంద్ర మోదీ మంగళవారం వర్చువల్‌గా ప్రారంభించనున్నారు. ప్రధాని ప్రారంభించనున్న రెండు ప్రాజెక్టులు కూడా విద్యారంగానికి చెందినవి కాగా.. వీటివల్ల ఉత్తరాంధ్ర, రాయలసీమ ప్రాంతాలు ఎడ్యుకేషనల్ హబ్‌గా మారతాయని విశ్లేషకులు అభిప్రాయపడుతున్నారు.

 ఎన్నికలు సమీపిస్తున్న వేళ ఏపీకి కేంద్రం గుడ్ న్యూస్ చెప్పింది. తిరుపతి సమీపంలో ఇండియన్ ఇన్‌స్టిట్యూట్ ఆఫ్ టెక్నాలజీ, విశాఖపట్నంలోని ఇండియన్ ఇన్‌స్టిట్యూట్ ఆఫ్ మేనేజ్‌మెంట్‌ శాశ్వత క్యాంపస్‌లను ప్రధాని నరేంద్ర మోదీ మంగళవారం (ఫిబ్రవరి 20) వర్చువల్‌గా ప్రారంభించనున్నారు. మంగళవారం జమ్మూకశ్మీర్‍‌లో ప్రధాని నరేంద్ర మోదీ పర్యటన సాగనుంది. ఈ పర్యటనలోనే విద్య, రైల్వే, ఏవియేషన్, రోడ్ సెక్టార్లకు చెందిన పలు అభివృద్ధి పనులను ప్రధాని ప్రారంభిస్తారు. మొత్తం 30 ,500 కోట్ల విలువైన అభివృద్ధి పనులను ప్రధాని మోదీ వర్చువల్ పద్ధతిలో ప్రారంభిస్తారు.

జమ్ముూకశ్మీర్‌లో కొత్తగా నియమితులైన 1500 మంది ఉద్యోగులకు ప్రధాని మోదీ నియామక పత్రాలు అందిస్తారు. వికసిత్ భారత్, వికసిత్ జమ్మూ కార్యక్రమం కింద లబ్ధిదారులతో ముచ్చటిస్తారు. అలాగే బనిహల్- ఖారీ- సంబర్- సంగల్దాన్ రైల్వే లైన్ ప్రారంభిస్తారు.ఇక విద్యారంగానికి సంబంధించి 13 వేల 375 కోట్ల విలువైన ప్రాజెక్టులకు ప్రధాని ప్రారంభోత్సవాలు, శంకుస్థాపనలు చేస్తారని ప్రభుత్వ వర్గాలు వెల్లడించాయి.

వీటిలో ఐఐటీ భిలాయ్, ఐఐటీ తిరుపతి, ఐఐటీ జమ్మూ, ఐఐటీడీఎమ్ కాంఛీపురం శాశ్వత క్యాంపస్‌లకు ప్రధాని ప్రారంభోత్సవాలు చేయనున్నారు. అలాగే కాన్పూర్‌లోని ఇండియన్ ఇన్‌స్టిట్యూట్ ఆఫ్ స్కిల్స్, దేవప్రయాగ్‌లోని కేంద్ర సంస్కృతి విశ్వవిద్యాలయాన్ని ప్రారంభిస్తారు. వీటితోపాటుగా ఐఐఎం జమ్మూ, ఐఐఎం బోధ్ గయా, ఐఐఎం విశాఖపట్నంలో శాశ్వత క్యాంపస్‍‌లను ప్రధాని ప్రారంభిస్తారని ప్రభుత్వ వర్గాలు వెల్లడించాయి.