టీడీపీ, జనసేన ఫస్ట్ లిస్టులో ఆ వర్గానికే ప్రాధాన్యం ఇచ్చారా..?

వచ్చే ఎన్నికల కోసం టీడీపీ, జనసేన కూటమి అభ్యర్థుల జాబితా విడుదల చేసింది. తొలి విడతలో 99 మంది పేర్లు ప్రకటించింది. వీరిలో 94 మంది టీడీపీ తరుఫున, ఐదుగురు జనసేన తరుఫున పోటీ చేయనున్నారు. అయితే సామాజిక, ఆర్థిక, రాజకీయ సమీకరణాలను దృష్టిలో ఉంచుకుని టీడీపీ, జనసేన కూటమి ఈ జాబితా ఖరారు చేసినట్లు ఆ పార్టీలు చెబుతున్నాయి. మరి కూటమి తరుఫున అభ్యర్థులగా బరిలోకి దిగుతున్న నేతలలో ఏ సామాజిక వర్గం వారు ఎంతమంది, చదువుకున్న వారు ఎంతమంది అనే విషయాలను పరిశీలిస్తే్ ఆసక్తికర విషయాలు వెలుగు చూస్తాయి.

టీడీపీ, జనసేన ప్రకటించిన 99 మంది ఎమ్మెల్యే అభ్యర్థుల్లో 60 మంది డిగ్రీ చదివిన వారు ఉన్నారు. మరో 30 మంది పోస్ట్ గ్రాడ్యుయేట్లు ఉన్నారు. ఇద్దరు పీహెచ్‌డీ చేయగా.. ఒకరు ఐఏఎస్‌, ముగ్గురు ఎంబీబీఎస్ చదివారు. మొత్తంగా ప్రతి ఒక్కరూ మినిమమ్ డిగ్రీ చదివిన వారు ఉండటం విశేషం. ఇక 25-35 మధ్య వయసు ఉన్నవారు ఇద్దరుండగా.. 36 నుంచి 45 మధ్య వయసున్న వారు 22 మంది ఉన్నారు. 46 నుంచి 60 ఏళ్లు వయసు ఉన్నవారు 55 మంది ఉండగా.. 61-75 వయసున్న 20 మందికి సీట్లు కేటాయించారు. మొత్తం అభ్యర్థుల్లో 86 మంది మగవారు ఉంటే.. 13 మంది మహిళలు ఉన్నారు.

అయితే ఫస్ట్ లిస్టులో బీసీలు, మైనారిటీలు ఎక్కువ సీట్లు కేటాయించలేదనే విమర్శలు వస్తున్నాయి. టీడీపీ – జనసేన విడుదల చేసిన తొలి జాబితాలో బీసీలకు 19, ఎస్సీలు 20, ఎస్టీ 3, కాపులకు 10 సీట్లు కేటాయించారు. ఇక కమ్మ సామాజికవర్గానికి 22 సీట్లు కేటాయించారు. మైనారిటీలకు ఒక్క సీటు దక్కింది. రెడ్డి సామాజికవర్గానికి 17, వైశ్యులకు 2, క్షత్రియ సామాజికవర్గానికి 4, వెలమ సామాజికవర్గానికి ఒక సీటు కేటాయించారు. ఈ నేపథ్యంలో మలిజాబితాలోనైనా బీసీలకు ప్రాధాన్యం ఇవ్వాలనే వాదనలు తెరపైకి వస్తున్నాయి.