తెలుగమ్మాయి జాహ్నవి యాక్సిడెంట్ కేసు.. రివ్యూ కోరిన భారత్

గతేడాది జనవరి 23న అమెరికాలోని ఆంధ్రప్రదేశ్‌కు చెందిన జాహ్నవి కందుల మృతికి కారణమైన పోలీసు అధికారి కెవిన్‌ డవేపై నేరాభియోగాలు మోపడం లేదని అక్కడి అధికారులు ప్రకటించిన విషయం తెలిసిందే. డేన్ పాత్రపై సాక్ష్యాధారాలు లేవని చెబుతూ అటార్నీ కార్యాలయం పేర్కొంది. తాజాగా, ఈ ప్రటకనపై భారత్ స్పందించింది. నేరాభియోగాలు నమోదుచేయకూడదనే అంశాన్ని సమీక్షించాలని శనివారం సియాటెల్ భారత రాయబార కార్యాలయం కోరింది. ఈ విషయంలో సంబంధిత అధికారులతో సంప్రదింపులు జరుపుతున్నట్టు తెలిపింది.

‘జాహ్నవి కందుల కుటుంబానికి న్యాయం జరిగేలా కృషి చేస్తున్నాం.. తగిన పరిష్కారం కోసం ఈ కేసు గురించి స్థానిక అధికారులు, సియాటెల్‌ పోలీసుల వద్ద గట్టిగా లేవనెత్తాం... ప్రస్తుతం ఈ కేసును సమీక్ష కోసం సియాటెల్‌ అటార్నీ కార్యాలయానికి సిఫారసు చేసిన విషయం తెలిసిందే.. దర్యాప్తు నివేదిక కోసం వేచిచూస్తున్నాం.. ఈ విషయంలో సంబంధిత అధికారులతో సంప్రదింపులు జరుపుతున్నాం’ అని సియాటెల్‌లోని భారత రాయబార కార్యాలయం.

ఆంధ్రప్రదేశ్‌లోని కర్నూలు జిల్లాకు చెందిన కందుల జాహ్నవి 2023 జనవరిలో సియాటెల్‌లోని పోలీసు పెట్రోలింగ్‌ వాహనం ఢీకొని మృతిచెందిన విషయం తెలిసిందే. సాక్ష్యాధారాలు లేకపోవడంతో డవేపై అభియోగాలు మోపడం లేదని పేర్కొంటూ.. కింగ్‌ కౌంటీ ప్రాసిక్యూటింగ్‌ కార్యాలయం ఇటీవల చేసిన ప్రకటన తీవ్ర నిరుత్సాహానికి గురిచేసింది. సీనియర్‌ అటార్నీలతో దీనిపై విచారణ జరిపిన తర్వాతే ఈ నిర్ణయానికి వచ్చినట్లు తెలిపింది.

మరోవైపు, జాహ్నవి మృతిని తక్కువ చేస్తూ హేళనగా మాట్లాడిన మరో పోలీసు అధికారి డేనియల్‌ అడెరెర్‌ ప్రమాదం జరిగిన సమయంలో అక్కడ లేడని కింగ్‌ కౌంటీ ప్రాసిక్యూటింగ్‌ అటార్నీ తెలిపారు. అధికారిపై ఇప్పటికే చర్యలు తీసుకుని, సస్పెన్షన్‌ వేటువేసిన విషయం తెలిసిందే. అతనిపై తుది విచారణ మార్చి 4న జరగనుంది. ఇక, 120 కి.మీ. వేగంతో వచ్చిన పోలీస్ పెట్రోలింగ్ వాహనం జాహ్నవి ఢీకొట్టి ఆమె పై నుంచి వెళ్లింది. ఈ కేసు దర్యాప్తుపై పోలీసు అధికారి డేనియల్‌ అడెరెర్‌.. చులకనగా మాట్లాడుతూ పగలబడి నవ్విన వీడియో ఒకటి కొన్ని నెలల కిందట వైరల్ అయ్యింది.