కర్నూలు జిల్లాలో యువతి కిడ్నాప్.. తండ్రి కళ్లముందే.. గన్‌తో బెదిరించి

కర్నూలు జిల్లాలో యువతి కిడ్నాప్ వ్యవహారం కలకలం రేపింది. తండ్రితో కలిసి స్కూటర్ మీద వెళ్తున్న కుమార్తెను.. దుండగులు స్పార్పియోతో ఢీకొట్టి మరీ బలవంతంగా తీసుకెళ్లటం సంచలనం సృష్టించింది. రివాల్వర్ చూపించి కిడ్నాప్ చేయటం స్థానికులను భయాందోళనలకు గురిచేసింది. అయితే బాధితురాలి తండ్రి ఫిర్యాదుతో రంగంలోకి దిగిన పోలీసులు.. యువతి ఎక్కడుందో గుర్తించారు. ఆమెను తండ్రి చెంతకు చేర్చటంతో అందరూ ఊపిరి పీల్చుకున్నారు.

అసలు సంగతిలోకి వస్తే.. కర్నూలు జిల్లా పత్తికొండ మండలం దూదెకొండ వద్ద ఓ యువతిని దుండగులు కిడ్నాప్ చేశారు. స్కూటర్ మీద తండ్రితో కలిసి వెళ్తున్న యువతిని స్కార్పియోతో ఢీకొట్టి అడ్డుకున్నారు. అనంతరం ఆమె తండ్రిని బెదిరించి యువతిని కిడ్నాప్ చేశారు. పత్తికొండ మండలానికి చెందిన ఓ వ్యక్తి అనారోగ్యంతో ఉన్న తన కూతురికి పత్తికొండలో వైద్యం చేయించేందుకు స్కూటర్ మీద బయల్దేరారు. అయితే స్కూటర్ మీద వస్తున్న వారిని కొంతమంది అడ్డగించారు. స్కార్పియోతో ఢీ కొట్టి.. తుపాకీతో బెదిరించి యువతిని కిడ్నాప్‌ చేశారు. ఈ క్రమంలో అడ్డొచ్చిన యువతి తండ్రిపైనా దాడి చేసి గాయపరిచారు.

అయితే తన కూతురు కిడ్నాప్ అయిన సంగతిని ఆయన వెంటనే పత్తికొండ పోలీసులకు సమాచారం అందించాడు. కారుతో ఢీకొట్టి, రివాల్వర్‌తో బెదిరించి తన కూతురిని కిడ్నాప్ చేశారంటూ పోలీసులకు ఫిర్యాదు చేశాడు. ఈ ఘటనపై కేసు నమోదు చేసిస పోలీసులు వెంటనే రంగంలోకి దిగారు. గాలింపు చేపట్టి యువతిని కిడ్నాప్‌ చేసిన వాహనాన్ని ఆలూరు ప్రాంతంలో గుర్తించారు. అనంతరం యువతిని తండ్రికి అప్పగించి.. కిడ్నాప్‌నకు యత్నించిన దుండగులను పోలీసు స్టేషన్‌కు తరలించారు.