ఎమ్మెల్యేలు, ఎంపీల చుట్టూ సీసీటీవీలు పెట్టాలి.. ఆ ఫుటేజీ ప్రజల ఫోన్లలో అందుబాటులో ఉండాలి

దేశ అత్యున్నత న్యాయస్థానమైన సుప్రీంకోర్టుకు నిత్యం ఎన్నో ప్రజా ప్రయోజన వ్యాజ్యాలు వస్తూ ఉంటాయి. అయితే అందులో కొన్ని ప్రజలకు కావాల్సినవి ఉండగా.. మరికొన్ని మాత్రం వింత వింతగా ఉంటాయి. ఇలా వింతగా ప్రజలకు అవసరం లేని విషయాలపై వ్యాజ్యాలు వేసిన పిటిషనర్లను సుప్రీంకోర్టు జడ్జిలు మందలించడం.. కోర్టు సమయాన్ని వృథా చేసినందుకు అవసరమైతే వారిపై భారీగా జరిమానాను విధిస్తూ ఉంటాయి. తాజాగా ఓ వ్యక్తి వేసిన పిల్‌పై సుప్రీంకోర్టు ప్రధాన న్యాయమూర్తి జస్టిస్ డీవై చంద్రచూడ్ తీవ్ర ఆగ్రహం వ్యక్తం చేశారు. కోర్టు సమయాన్ని దుర్వినియోగం చేసినందుకు రూ.5 లక్షల జరిమానాతో సిద్ధంగా ఉండాలని పేర్కొన్నారు. ఈ క్రమంలోనే పిటిషనర్ తన వైపు వాదనలు వినిపించడంతో జరిమానా లేకుండా మందలించి వదిలేశారు.

దేశంలో ఎన్నికైన ఎంపీలు, ఎమ్మెల్యేలను ఎప్పటికప్పుడు డిజిటల్‌గా పర్యవేక్షించాలని ఢిల్లీకి చెందిన సురిందర్ కుంద్రా అనే వ్యక్తి దాఖలు చేసిన ప్రజా ప్రయోజన వ్యాజ్యంపై శుక్రవారం సీజేఈ జస్టిస్ డీవై చంద్రచూడ్, జస్టిస్‌ జేపీ పార్దీవాలా, జస్టిస్ మనోజ్‌మిశ్రాలతో కూడిన ధర్మాసనం విచారణ జరిపింది. ఈ సందర్భంగా పిటిషనర్ సురిందర్ కుంద్రాపై సీజేఐ తీవ్ర ఆగ్రహం వ్యక్తం చేశారు. ఈ సందర్భంగా ఎంపీలు, ఎమ్మెల్యేలను డిజిటల్‌గా పర్యవేక్షించాలనే అభ్యర్థనను తిరస్కరించిన సుప్రీంకోర్టు.. ఇలాంటి పిటిషన్లతో కోర్టుకు వచ్చి విలువైన ప్రజా సమయాన్ని దుర్వినియోగం చేయకూడదని ఆదేశాలు జారీ చేసింది.

ఎంపీలు, ఎమ్మెల్యేల చుట్టూ నిత్యం సీసీటీవీలు ఏర్పాటు చేయాలని.. వారు ఎక్కడికి వెళ్తున్నారు, ఎవరిని కలుస్తున్నారు, ఏం చేస్తున్నారు అనే విషయాలు వారికి ఓటు వేసిన పౌరులకు అందుబాటులో ఉండాలని.. ఈ క్రమంలోనే ప్రజా ప్రతినిధులపై డిజిటల్‌గా నిఘా ఉంచాలని పిటిషనర్ తన పిల్‌లో పేర్కొన్నాడు. దీనిపై తీవ్ర అసంతృప్తి వ్యక్తం చేసిన సుప్రీంకోర్టు.. ఎంపీలు, ఎమ్మెల్యేల శరీరాల్లో మైక్రో చిప్‌లు పెట్టాలా అంటూ ప్రశ్నించింది. వారిపై నిఘా ఉంచడం అనేది వారి గోప్యత హక్కులకు భంగం కలిగించినట్లేనని స్పష్టం చేసింది. వారి వ్యక్తిగత విషయాల్లో జోక్యం చేసుకుని.. వారి గోప్యతకు భంగం కలిగించలేమని పిల్‌ను కొట్టివేసింది.

ఈ సందర్భంగా ఇలాంటి పిల్ దాఖలు చేసి, కోర్టు సమయాన్ని వృథా చేసినందుకు పిటిషనర్‌పై రూ.5 లక్షల జరిమానా విధిస్తున్నట్లు సీజేఐ జస్టిస్ డీవై చంద్రచూడ్ పేర్కొన్నారు. అయితే పిటిషనర్ తనవైపు వాదనలు వినిపించడంతో చివరికి ఫైన్‌ విధించకుండా ఆపినట్లు తెలిపారు. అయితే భారత రాజ్యాంగాన్ని ఉటంకిస్తూ తన వాదన వినిపించిన పిటిషనర్.. ఎంపీలు, ఎమ్మెల్యేలు ఎన్నికల్లో గెలిచిన తర్వాత ప్రజా సేవకుల లాగా కాకుండా పాలకుల లాగా ప్రవర్తిస్తారని సురిందర్ కుంద్రా కోర్టుకు తెలిపారు. ఈ దశలో జోక్యం చేసుకున్న కోర్టు.. అందరు ఎంపీలు, ఎమ్మెల్యేలపై ఇలాంటి ఆరోపణలు చేయడం తగదని సూచించింది. ఇలాంటి పిటిషన్ దాఖలు చేసినందుకు సురిందర్ కుంద్రాను సుప్రీంకోర్టు మందలించింది.