ఏపీ పాలిటిక్స్‌లో ఊహించని ట్విస్ట్.. పవన్ కళ్యాణ్‌పై పోటీకి కీలక నేత.. జగన్ మాస్టర్ ప్లాన్..!

ఎన్నికల సమయం దగ్గర పడుతున్న వేళ.. ఏపీ పాలిటిక్స్‌లో ఊహించని పరిణామాలు చోటుచేసుకుంటున్నాయి. ఇప్పటికే.. అభ్యర్థులను ప్రకటించిన అధికార పార్టీ వైఎస్సార్‌సీపీ.. పలు స్థానాల్లో అభ్యర్థులను మార్చే యోచనలో ఉందన్న వార్తలు సోషల్ మీడియాలో వైరల్ అవుతున్నాయి. వై నాట్ 175 లక్ష్యంతో బరిలో దిగుతున్న జగన్.. ప్రతిపక్ష పార్టీలకు గట్టి పోటీని ఇచ్చే గెలుపు గుర్రాలనే అభ్యర్థులుగా ప్రకటిస్తున్నారు. ఈ క్రమంలోనే.. కొన్ని స్థానాల్లో బలమైన అభ్యర్థులను ప్రకటించినప్పటికీ.. మారుతున్న సమీకరణాలను బట్టి జగన్ కూడా వ్యూహాలకు పదును పెడుతున్నట్టు తెలుస్తోంది.

ఇప్పటికే.. తెలుగు దేశం, జనసేన పార్టీలు పొత్తుతో ఎన్నికల్లో దిగుతుండగా.. అభ్యర్థుల తొలి జాబితాను కూడా వదిలారు. అయితే.. ఏపీలో ప్రధానంగా ఆయా సామాజిక వర్గాల ఓటర్లను దృష్టిలో ఉంచుకుని అభ్యర్థులను ప్రకటిస్తున్న నేపథ్యంలో.. అత్యధిక స్థాయిలో ఉన్న కాపు ఓటర్లను తమ వైపు తిప్పుకునేందుకు అన్ని పార్టీలు ప్రయత్నాలు చేస్తున్నారు. ఈ క్రమంలోనే.. కాపు ఓట్లను కూడగట్టుకునేందుకు జనసేన నాయకుడు పవన్ కళ్యాణ్ కూడా ఆ దిశగా అడుగులు వేస్తున్నట్టు సమాచారం. ఇందులో భాగంగానే.. పవన్ కళ్యాణ్ పిఠాపురం నుంచి పోటీ చేసేందుకు సిద్ధమైనట్టు తెలుస్తోంది.

కాగా.. పవన్ కళ్యాణ్‌కు గట్టి పోటీ ఇచ్చేందుకు.. కాపు సామాజిక వర్గం మద్దతు ఎక్కువగా ఉన్న.. కాపు జేఏసీ నేత ముద్రగడ పద్మనాభంను రంగంలోకి దించేందుకు వైఎస్సార్ కాంగ్రెస్ పార్టీ వ్యూహాలు రచిస్తున్నట్టు ప్రచారం జరుగుతోంది. అయితే.. గతంలో ముద్రగడను జనసేనలో చేర్చుకునేందుకు మంతనాలు జరిగాయి. అదే సమయంలో.. టీడీపీ, వైసీపీ కూడా ఆయనను చేర్చుకునేందుకు ప్రయత్నాలు చేశాయి. అయితే.. ఆయన మాత్రం వైసీపీలో చేరేది లేదని.. అవసరమైతే జనసేన, టీడీపీలో ఏదో ఒక పార్టీలో చేరతానంటూ సంచలన స్టేట్ మెంట్ కూడా ఇచ్చారు.

అయితే.. ఇప్పుడు జగన్ పన్నిన వ్యూహంతో సమీకరణాలు మారిపోయాయని.. పవన్ కళ్యాణ్ మీద పోటీకి ముద్రగడను దింపేందుకు వైసీపీ మంతనాలు చేస్తున్నట్టు తెలుస్తోంది. అయితే.. ఇప్పటికే పిఠాపురం వైసీపీ ఇంఛార్జ్‌గా వంగ గీతను ప్రకటించగా.. పవన్ కళ్యాణ్ పోటీ చేస్తుండటంతో గట్టిపోటీ ఉంటుందని, ముద్రగడ లాంటి బలమైన కాపు నేత అయితేనే ఓడించగలమని భావించిన పార్టీ ఆ దిశగా కసరత్తు చేస్తున్నట్టు సమాచారం. ఇప్పటికే మంతనాలు పూర్తయ్యాయని.. ఇక వైసీపీలో చేరిక మాత్రమే మిగిలిందన్న వార్తలు ఊపందుకున్నాయి. దీంతో.. ఏపీ రాజకీయాల్లో ఊహించని మలుపులతో ఈ ఎన్నికలు మరింత రసవత్తరంగా మారనున్నాయి.