వైసీపీకి ఎదురు దెబ్బ.. టీడీపీలో చేరిన మరో ఎమ్మెల్యే

వైఎస్సార్‌సీపీకి మరో ఎదురు దెబ్బ తగిలింది. మైలవరం ఎమ్మెల్యే వసంత కృష్ణప్రసాద్‌ టీడీపీలో చేరారు. హైదరాబాద్‌లోని టీడీపీ అధినేత చంద్రబాబు నివాసానికి కృష్ణప్రసాద్‌ వెళ్లారు. అక్కడే ఆయన సమక్షంలో పార్టీలో చేరారు. వసంత కృష్ణప్రసాద్‌కు కండువా కప్పిన చంద్రబాబు.. సాదరంగా పార్టీలోకి ఆహ్వానించారు. ఆయనతో పాటు మైలవరం నియోజకవర్గానికి చెందిన ఒక ఎంపీపీ, ఇద్దరు వైస్‌ ఎంపీపీలు, 12 మంది సర్పంచ్‌లు, ఆరుగురు ఎంపీటీసీ సభ్యులు, ఏడుగురు సొసైటీ అధ్యక్షులు, ఇద్దరు మండల పార్టీ అధ్యక్షులు, నలుగురు కౌన్సిలర్లు పార్టీలో చేరారు.

ఏపీ చంద్రబాబు ముఖ్యమంత్రి కావాలని ఆకాంక్షించారు. చంద్రబాబు మళ్లీ సీఎం కావాలన్నదే తన కోరిక అని.. చంద్రబాబు పోటీ చేయమంటే చేస్తే.. లేదంటే పార్టీ కోసం పనిచేస్తానన్నారు. ఏపీ అభివృద్ధి పథంలో సాగాలంటే చంద్రబాబే సీఎం కావాలని.. చంద్రబాబు, లోకేశ్ నాయకత్వంలో అభివృద్ధికి కృషి చేస్తానన్నారు. సంక్షేమం.. అభివృద్ధి.. ఈ రెండింటినీ ముందుకు తీసుకెళ్లాల్సిన అవసరం ఉందని అభిప్రాయపడ్డారు. ఆ సత్తా చంద్రబాబుకే ఉందని.. ఏపీ ప్రగతి మార్గంలో ముందుకు వెళ్లాలి.. పరిశ్రమలు రావాలి.. యువతకు ఉద్యోగాలు రావాలి.. ఇవన్నీ చంద్రబాబు వల్లే సాధ్యం అవుతుందన్నారు.. అందుకే తాను పార్టీలో చేరాననన్నారు. మైలవరం నియోజకవర్గంలో గడచిన నాలుగున్నరేళ్ల కాలంలో వైఎస్సార్‌సీపీ ఎమ్మెల్యేగా పార్టీ నిర్మాణం, అభివృద్ధికి ఎంతో కృషి చేశానన్నారు.

కానీ పార్టీలో ప్రాధాన్యత లభించలేదని.. తాను ఎమ్మెల్యే అయ్యాక.. నియోజకవర్గానికి సంబంధించి వివిధ అభివృద్ధి పనుల కోసం నిధులు కేటాయించాలని సీఎంకు వినతులు ఇచ్చినా.. ప్రభుత్వం ఒక్క రూపాయి కూడా కేటాయించలేదన్నారు. నియోజకవర్గ అభివృద్ధి కోసమే టీడీపీలో చేరానని పార్టీ జాతీయ ప్రధాన కార్యదర్శి నారా లోకేష్‌ దృష్టికి తీసుకెళ్లానన్నారు. తప్పకుండా కేటాయిస్తామని హామీ ఇచ్చారని.. చంద్రబాబు నాయకత్వంలో ఆంధ్రరాష్ట్ర పునర్‌నిర్మాణం కోసం కృషి చేస్తానన్నారు. మరోసారి ముఖ్యమంత్రి కావడం ఖాయమన్నారు.