'వన్ ఛాయ్ ప్లీజ్'.. డాలీ ఛాయ్ వాలాతో బిల్ గేట్స్.. వీడియో వైరల్!
international | Suryaa Desk | Published : Sat, Mar 02, 2024, 11:40 PM
మైక్రోసాఫ్ట్ వ్యవస్థాపకుడు, అపర కుబేరుడు బిల్ గేట్స్ ఇటీవల ఇండియాలో పర్యటించారు. వివిధ కార్యక్రమాల్లో పాల్గొన్న ఆయన ఈ పర్యటన అనంతరం ఇన్‌స్టా గ్రామ్‌లో పోస్ట్ చేసిన ఓ వీడియో ప్రస్తుతం సోషల్ మీడియాను షేక్ చేస్తోంది. అందులో బిల్ గేట్స్ తో నాగ్‌పూర్‌కి చెందిన డాలీ ఛాయ్ వాలా ఉన్నారు. డాలీ ఛాయ్ వాలా స్టైల్‌కి ఫిదా అయిపోయిన బిల్ గేట్స్.. వన్ చాయ్ ప్లీస్ అంటూ అతని వద్దకు వెళ్లి టీ తాగారు. ఇప్పుడు ఈ వీడియో తెగ వైరల్‌గా మారింది.
తనదైన శైలిలో ఛాయ్ తయారు చేసి హీరో స్టైల్ లో సర్వ్ చేసే ఫేమస్ ఛాయ్ వాలా డాలీ టీ స్టాల్ వద్ద బిల్ గేట్స్ ఛాయ్ తాగారు. వన్ ఛాయ్ ప్లీజ్ అంటూ ప్రత్యేకంగా టీ తయారు చేయించుకుని ఆస్వాదించారు. భారత్ లో ఎక్కడికి వెళ్లినా ఇన్నోవేషన్ కనిపిస్తుందని, సింపుల్ టీ తయారు చేసేటప్పుడు కూడా.. అంటూ క్యాప్షన్ ఇస్తూ ఈ వీడియోను బిల్ గేట్స్ తన ఇన్‌స్టా పేజీలో షేర్ చేశారు. ఈ వీడియో ఇప్పుడు తెగ చక్కర్లు కొడుతోంది. ఇది నిజమేనా, బిల్ గేట్స్ నిజంగానే డాలీ ఛాయ్ వాలా టీ స్టాల్ వద్దకు వెళ్లి టీ తాగారా? అని నెటిజన్లు కామెంట్ చేస్తున్నారు. మరికొందరు. ఇది డీప్ ఫేక్, లేదా ఏఐ జనరేటివి వీడియో అయి ఉంటుందని, లేకపోతే బిల్ గేట్స్ వచ్చి టీ తాగడమేంటని ఎవరికి వచ్చినట్లు వారు కామెంట్లు చేస్తున్నారు.
బిల్ గేట్స్ షేర్ చేసిన వీడియోను సుమారు 41 లక్షల మంది లైక్ చేశారు. అంటే ఏ స్థాయిలో అది సోషల్ మీడియాలో వైరల్ అయిందో ఊహించవచ్చు. మహారాష్ట్రలోని నాగ్‌పూర్ లో రవీంద్రనాథ్ ఠాగూర్ మార్గో లో డాలీ టీ స్టాల్ ఉంది. అతడి వేషధారణ, ప్రత్యేకంగా టీ తయారు చేసే విధానం, టీ గ్లాస్ అందించే స్టైల్, సిగరెట్లు అందించే స్లైల్ తో సోషల్ మీడియలో పాపులర్ గా మారిపోయాడు. అతనికి 10 వేల మందికిపైగా ఫాలోవర్లు ఉన్నారు. అతని టీ తయారీ విధానంపై సోషల్ మీడియాలో చాలా వీడియోలు ఉన్నాయి. ఈ క్రమంలోనే బిల్ గేట్స్ దృష్టిని ఆకర్షించినట్లు తెలుస్తోంది.
అయితే, తాను టీ సర్వ్ చేసింది బిల్ గేట్స్ అని మొదట తెలియదని డాలీ చెప్పడం గమనార్హం. తాను హైదరాబాద్ నుంచి నాగ్‌పూర్ కి వెళ్లిన తర్వాత బిల్ గేట్స్ షేర్ చేసిన ఈ వీడియోను చూశానని, అప్పుడే తాను టీ సర్వ్ చేసింది బిల్ గేట్స్ కి అని తెలిసిందన్నాడు. తనను టీ తయారు చేసేందుకు హైదరాబాద్ పిలిచారని, బిల్ గేట్స్ వచ్చినప్పుడు ఎవరో ఫారెనర్ అయి ఉంటారని భావించినట్లు ఓ వార్తా సంస్థతో తెలిపాడు డాలీ. కానీ, నిజంగా ఆయన బిల్ గేట్స్ అని తనకు అస్సలు ఐడియా లేదన్నాడు. ఆయనే అని తెలిశాక చాలా సంతోషంగా ఉందన్నాడు. ప్రధాన మంత్రి నరేంద్ర మోదీకి టీ తయారు చేసి ఇవ్వాలని కోరుకుంటున్నట్లు డాలీ ఛాయ్ వాలా చెప్పుకొచ్చాడు.
|
|