శివరాత్రికి శ్రీశైలం వెళ్తున్నారా.. ఇవి తెలుసుకోకుంటే జేబుకు చిల్లే!

 శివరాత్రి సందర్భంగా ప్రముఖ శైవక్షేత్రం శ్రీశైలానికి భక్తులు పెద్ద సంఖ్యలో తరలివస్తారు. శివరాత్రి పర్వదినం రోజున శ్రీశైలం మల్లన్నను దర్శించుకునేందుకు ఎక్కడినుంచో భక్తులు తండోపతండాలుగా శ్రీశైలం చేరుకుంటారు. ఇదే సమయంలో బ్రహ్మోత్సవాలు కూడా జరుగుతూ ఉండటంతో భక్తుల రద్దీ మరింత అధికంగా ఉంటుంది. ఇక శ్రీశైలానికి ఆర్టీసీ బస్సులతో పాటు అద్దె వాహనాలు, సొంతవాహనాల్లో భక్తులు తరలివస్తుంటారు. అయితే కొన్ని విషయాలను తెలుసుకోకపోతే శ్రీశైలం వెళ్లేవారికి జరిమానాలు పడే అవకాశం ఉంది. జరిమానాలకు సంబంధించి అధికారులు ఇప్పటికే సూచిక బోర్డులను సైతం ఏర్పాటు చేశారు.

శ్రీశైలానికి వెళ్లే క్రమంలో అడవి గుండా, ఘాట్ రోడ్డులో ప్రయాణం చేయాల్సి ఉంటుంది. ఈ నేపథ్యంలో రాత్రివేళ ప్రయాణం నిషిద్ధం. రాత్రి 9 గంటల నుంచి ఉదయం 6 గంటల వరకూ ఈ రహదారిపై వాహనాల రాకపోకలను నిలిపివేస్తారు. అయితే బ్రహ్మోత్సవాల సందర్భంగా దీని నుంచి ఇటీవల తాత్కాళిక సడలింపు ఇచ్చారు. అయితే అటవీ ప్రాంతం కావటంతో వన్యప్రాణులకు ఇబ్బందులు తలెత్తకుండా వాహనదారులు జాగ్రత్తలు తీసుకోవాలని ఫారెస్ట్ అధికారులు సూచిస్తున్నారు. వన్యప్రాణులకు హాని చేయకుండా వాహనాలను నడపాలని, వాహనాలను ఎక్కడపడితే అక్కడ ఆపకూడదని సూచిస్తున్నారు.

ప్రయాణం మధ్యలో వాహనాలను ఆపి, ఆహార పదార్థాలను తినడం, ఆ తర్వాత ప్లాస్టిక్ వ్యర్థాలను అక్కడే పడేయడం వంటి పనులు చేయకూడదని అటవీ అధికారులు తెలిపారు. అలా చేస్తే జరిమానా విధిస్తామని స్పష్టం చేశారు. ప్లాస్టిక్ వ్యర్థాలు పడేసినవారికి వేయి రూపాయలు జరిమానా విధిస్తామని హెచ్చరిస్తున్నారు. పొగతాగినా, మద్యం సేవించినా కూడా వేయి రూపాయలు జరిమానా చెల్లించుకోవాల్సిందే. ఇక అడవిలోని జంతువులకు ఆహారం అందించే ప్రయత్నం చేస్తే రూ.1000 జరిమానా విధిస్తామని ఫారెస్ట్ సిబ్బంది సూచిక బోర్డులు ఏర్పాటు చేశారు.

అలాగే అడవి మధ్యలో వాహనాలను ఎక్కడపడితే అక్కడ ఆపినా, ఓవర్ స్పీడుతో డ్రైవింగ్ చేసినా రూ.500 జరిమానా పడుతుంది. ఈ మార్గంలో 30 కిలోమీటర్ల లోపు వేగంతో ప్రయాణించాలన్న అధికారులు.. అంతకుమించి స్పీడుతో డ్రైవింగ్ చేస్తే జరిమానా కట్టాల్సిందేనని హెచ్చరిస్తున్నారు. ఈ నేపథ్యంలో శివరాత్రికి శ్రీశైలం మల్లన్న దర్శనం కోసం వెళ్లే భక్తులు.. ఈ విషయాలన్నీ తెలుసుకుని ప్రయాణం చేయడం మంచిది. లేకపోతే రూల్స్ బ్రేక్ చేసి జరిమానాలు కట్టాల్సి వస్తుంది.