నెలకు రూ.5 వేలు.. మహిళా దినోత్సవం రోజున ఆ పార్టీ ట్వీట్

అంతర్జాతీయ మహిళా దినోత్సవం సందర్భంగా ఏపీ మహిళలకు వైఎస్ షర్మిల శుభవార్త వినిపించారు. మహిళందరికీ మహిళా దినోత్సవ శుభాకాంక్షలు అని చెప్పిన వైఎస్ షర్మిల.. ఏపీలో తాము అధికారంలోకి వస్తే మహిళలకు ఏం చేస్తామనే దానిపై ట్వీట్ చేశారు. ఇదే సమయంలో దేశంలో మహిళా సాధికారతకు నిలువెత్తు రూపం ఇందిరా గాంధీ అని పేర్కొన్నారు. అందుకే.. ప్రతి పేదింటి మహిళకు సాధికారత కల్పించడానికి కాంగ్రెస్ పార్టీ ఇందిరమ్మ అభయం పథకం తీసుకొచ్చిందని అన్నారు. కాంగ్రెస్ పార్టీ అధికారంలోకి రాగానే ఈ పథకం ద్వారా ప్రతి పేదింటి మహిళలకు నెలకు 5వేల రూపాయలు ఇస్తామని ట్వీట్‌లో పేర్కొన్నారు. మహిళా దినోత్సవం రోజున ఇదే మహిళలకు కాంగ్రెస్ ఇస్తున్న భరోసా అని షర్మిల ట్వీట్ చేశారు.

అనంతపురం జిల్లాలో జరిగిన న్యాయసాధన సభ ద్వారా కాంగ్రెస్ పార్టీ ఈ హామీ ప్రకటించింది. ఏపిలో తొలి గ్యారెంటీ అంటూ ఏఐసీసీ అధ్యక్షులు మల్లికార్జున ఖర్గే సమక్షంలోనే వైఎస్ షర్మిల ఈ హామీ ప్రకటించారు. ఏపీలో తాము అధికారంలోకి వస్తే ప్రతి పేదింటి మహిళకు నెలకు ఐదు వేల రూపాయల చొప్పున ఇందిరమ్మ అభయం పేరుతో అందిస్తామని ప్రకటించారు. అంతర్జాతీయ మహిళా దినోత్సవానికి పురస్కరించుకుని అదే విషయాన్ని ఇప్పుడు ట్వీట్ ద్వారా తెలియజేశారు.

మరోవైపు ఏపీసీసీ చీఫ్‌గా వైఎస్ షర్మిల బాధ్యతలు చేపట్టిన తర్వాత ఏపీ కాంగ్రెస్‌లో కొంతమేర ఊపొచ్చింది. కాంగ్రెస్‌కు మళ్లీ పునర్వైభవం తెచ్చే దిశగా ఇప్పటికే బహిరంగసభలతో హోరెత్తిస్తున్నారు షర్మిల. త్వరలోనే తెలంగాణ సీఎం రేవంత్ రెడ్డి అతిథిగా విశాఖలో సభ కూడా నిర్వహించనున్నారు. అభ్యర్థుల ఎంపికపై ఇప్పటికే షర్మిల ఇంటర్వ్యూలు కూడా పూర్తి చేశారు. ఇక తాజాగా ఢిల్లీ వెళ్లారు షర్మిల. అభ్యర్థుల ఎంపికపై కాంగ్రెస్ అధిష్టానం పెద్దలతో చర్చించేందుకే హస్తినకు వెళ్లినట్లు సమాచారం.

విజయవాడలో ఆంధ్రరత్న భవన్‌లో వైఎస్ షర్మిల ఇటీవల ఇంటర్వ్యూలు నిర్వహించారు. కాంగ్రెస్ తరుఫున పోటీ కోసం భారీగా దరఖాస్తులు వచ్చాయి. దీంతో గెలుపునకు అవకాశం ఉన్న గెలుపు గుర్రాలను అన్వేషించేందుకు వైఎస్ షర్మిల ఇంటర్వ్యూలు చేశారు. రెండు రోజుల పాటు ఇంటర్వ్యూలు జరిపారు. ఇక తదుపరి దశలో భాగంగా అభ్యర్థుల ఎంపికపై కాంగ్రెస్ పెద్దలతో సంప్రదింపులు జరిపేందుకు ఢిల్లీ వెళ్లినట్లు తెలిసింది. అలాగే వామపక్షాలతో పొత్తు నేపథ్యంలో సీట్ల సర్దుబాటుపైనా చర్చించే అవకాశాలు ఉన్నాయి.