చంద్రబాబు ఇంట్లో కీలకభేటీకి పురంధేశ్వరి డుమ్మా!.. కారణం అదేనా?

ఏపీలో రాజకీయాలు వేడెక్కాయి. వచ్చే ఎన్నికల్లో కూటమిగా పోటీచేయనున్నట్లు టీడీపీ, బీజేపీ, జనసేన ఇప్పటికే ప్రకటించాయి. సీట్ల సర్దుబాటు మీద కూడా మూడు పార్టీల మధ్య ఇప్పటికే ఓ అవగాహన వచ్చినట్లు తెలిసింది. అయితే ఎవరెవరు ఎక్కడ పోటీచేయాలనే దానిపై మూడు పార్టీలు తొలిసారిగా ఉమ్మడిగా సమావేశం అయ్యాయి. ఉండవల్లిలోని టీడీపీ అధినేత చంద్రబాబు నాయుడు నివాసంలో మూడుపార్టీల నేతల మధ్య కీలక భేటీ జరిగింది. ఈ సమావేశంలో టీడీపీ అధినేత చంద్రబాబు నాయుడు, బీజేపీ నుంచి కేంద్రమంత్రి గజేంద్రసింగ్‌ షెకావత్‌, బైజయంత్ పండా, జనసేన నుంచి ఆ పార్టీ అధినేత పవన్‌కల్యాణ్‌, ఆ పార్టీ పీఏసీ ఛైర్మన్‌ నాదెండ్ల మనోహర్‌ హాజరయ్యారు. టీడీపీ ఏపీ అధ్యక్షుడు అచ్చెన్నాయుడుతో పాటు మరికొందరు టీడీపీ ఎమ్మెల్యేలు కూడా భేటీలో ఉన్నారు.

అయితే ఎన్నికల్లో పోటీకి సంబంధించి ఇప్పటికే మూడు పార్టీల మధ్య ఒక ఒప్పందం కుదిరినట్లు తెలిసింది. జనసేన, బీజేపీకి 30 ఎమ్మెల్యే, 8 ఎంపీ సీట్లు కేటాయించినట్లు సమాచారం. లెక్కలపై క్లారిటీ వచ్చినప్పటికీ ఎవరు ఎక్కడ పోటీ చేయాలనే దానిపైనా ప్రధానంగా చర్చలు జరుగుతున్నట్లు సమాచారం. ఇప్పటికే టీడీపీ 94, జనసేన ఆరుచోట్లా అభ్యర్థులను ప్రకటించాయి. తాజాగా బీజేపీ వచ్చి చేరటంతో ఆ పార్టీ ఎక్కడ పోటీ చేస్తుందనేదీ ఆసక్తికరంగా మారింది. పొత్తులో భాగంగా ఇప్పటికే ప్రకటించిన అభ్యర్థుల స్థానాల్లో మార్పులు చేయాల్సి వస్తుందా దానిపై కీలక నేతలు చర్చిస్తున్నారు. సామాజిక సమీకరణాలను బేరీజు వేసుకుంటూ కూటమి తరుఫున అభ్యర్థులను ఎంపిక చేసే పనిలో మూడు పార్టీలు ఆలోచనలు చేస్తు్న్నాయి. అయితే వైసీపీ నుంచి మైనారిటీలు బరిలోఉన్న స్థానాలలో తాము పోటీ చేస్తామని బీజేపీ చెప్తున్నట్లు సమాచారం. ముఖ్యంగా కదిరి, పి. గన్నవరం, శ్రీకాళహస్తి, మదనపల్లె స్థానాలు కీలకంగా మారాయి.

అయితే చంద్రబాబు ఇంట్లో జరుగుతున్న ఇంతటి కీలక భేటీకి ఏపీ బీజేపీ అధ్యక్షురాలిగా ఉన్న పురంధేశ్వరి గైర్హాజరయ్యారు. బీజేపీ నుంచి గజేంద్ర సింగ్ షెకావత్, బైజయంత్ హండా హాజరయ్యారు. అయితే పురంధేశ్వరి ఎందుకు హాజరుకాలేదనే దానిపై బీజేపీ నుంచి క్లారిటీ లేదు. ఇతరత్రా కార్యక్రమాలు ఉండటంతో రాలేకపోయారా లేదా మరేదైనా కారణం ఉందా అని రాజకీయవర్గాల్లో చర్చ నడుస్తోంది. మరోవైపు పొత్తులు, సీట్లపై తన అభిప్రాయాన్ని పురంధేశ్వరి ఇప్పటికే బీజేపీ పెద్దలకు చేరవేశారు. ఆదివారం నోవాటెల్‌లో జరిగిన భేటీలో గజేంద్రసింగ్ షెకావత్‌కు పురంధేశ్వరి తన అభిప్రాయాలను, ప్రతిపాదనలను వివరించారు. సీట్ల సర్దుబాటుపై హైకమాండ్‌తో తుది నిర్ణయం అంటున్న పురంధేశ్వరి.. అందువల్లే భేటీకి హాజరుకాలేదని మరో వాదన వినిపిస్తోంది.