ఎన్నికల వేళ కేంద్రం గుడ్‌న్యూస్.. పెట్రోల్, డీజిల్ ధరలు తగ్గింపు

భారీగా పెరిగిన పెట్రోల్, డీజిల్ ధరల నుంచి ఉపశమనం కల్పిస్తూ కేంద్రంలోని నరేంద్ర మోదీ సర్కార్.. వాహనదారులకు గుడ్‌న్యూస్ చెప్పింది. పెట్రోల్, డీజిల్ ధరలను తగ్గిస్తున్నట్లు వెల్లడించింది. పెట్రోల్, డీజిల్ ధరలను లీటర్‌కు రూ.2 చొప్పున తగ్గిస్తున్నట్లు కేంద్ర ఇంధన శాఖ మంత్రి హర్దీప్ సింగ్ పూరీ ట్విటర్ వేదికగా ప్రకటించారు. ఈ ఇంధన ధరల తగ్గింపు శుక్రవారం ఉదయం 6 గంటల నుంచి దేశవ్యాప్తంగా అమల్లోకి వస్తుందని కేంద్రమంత్రి తెలిపారు.

సార్వత్రిక ఎన్నికలకు ముందు కేంద్ర ప్రభుత్వం మరో కీలక నిర్ణయం తీసుకుంది. పెట్రోల్‌, డీజిల్‌ ధరలను తగ్గిస్తూ సామాన్య ప్రజలకు భారీ ఊరట కల్పించింది. లీటర్‌ పెట్రోల్‌, డీజిల్‌పై రూ.2 చొప్పున తగ్గించింది. ఇంధన ధరలు తగ్గించడం ద్వారా కోట్లాది మంది భారతీయులు, వారి కుటుంబ సంక్షేమం, సౌలభ్యమే లక్ష్యమని ప్రధాని నరేంద్ర మోదీ మరోసారి నిరూపించారని కేంద్ర మంత్రి హర్దీప్‌ సింగ్‌ పూరీ ట్వీట్‌ చేశారు.

పెట్రోల్‌, డీజిల్‌ ధరలను చమురు మార్కెటింగ్‌ కంపెనీలు దేశవ్యాప్తంగా సవరిస్తున్నట్లు సమాచారం ఇచ్చాయని కేంద్ర పెట్రోలియం శాఖ వెల్లడించింది. సవరించిన ధరలు శుక్రవారం ఉదయం 6 గంటల నుంచి అమల్లోకి వస్తాయని స్పష్టం చేసింది. ఈ ఇంధన ధరల తగ్గింపుతో వాహనదారులకు ఊరట కలుగుతుందని తెలిపింది. డీజిల్‌తో నడిచే 58 లక్షల గూడ్స్‌ వాహనాలు, 6 కోట్ల కార్లు, 27 కోట్ల బైక్‌లకు ఈ తగ్గింపుతో ఖర్చులు తగ్గుతాయని పేర్కొంది. లీటర్‌ పెట్రోల్‌పై రూ.2 తగ్గిస్తూ తీసుకున్న తాజా నిర్ణయంతో ఇక నుంచి ఢిల్లీలో లీటర్‌ పెట్రోల్‌ ధర రూ.94.72.. ముంబైలో రూ.104.21.. కోల్‌కతా రూ.103.94.. చెన్నై రూ.100.75 కి తగ్గనుంది. ఇక డీజిల్ ధరల విషయానికి వస్తే ఢిల్లీలో రూ.87.62.. ముంబైలో రూ.92.15.. కోల్‌కతాలో రూ.90.76, చెన్నైలో 92.34 కి తగ్గనుంది.

అయితే దేశంలో సార్వత్రిక ఎన్నికలు సమీపిస్తున్న వేళ పెట్రోల్, డీజిల్ ధరలు తగ్గుతాయని గత కొన్ని రోజులుగా దేశవ్యాప్తంగా వార్తలు వెల్లువెత్తుతున్నాయి. కానీ ఈ ఊహాగానాలను పలువురు కేంద్రమంత్రులు, ఇతర ఉన్నతాధికారులు ఖండించారు. ఇంధన ధరల తగ్గింపు ఉండదని ఇప్పటికే ప్రకటించారు. దేశంలో భారీగా పెరిగిన ఇంధన ధరలతో ప్రజలు తీవ్ర ఇబ్బందులు పడుతుండటంతో అది కాస్తా ఎన్నికలపై ప్రభావం పడుతుందనే వాదనలు వెల్లువెత్తాయి. ఈ నేపథ్యంలోనే లోక్‌సభ ఎన్నికల నోటిఫికేషన్ వెలువడటానికి కొన్ని రోజుల ముందు ఇంధన ధరలు తగ్గిస్తూ కేంద్రం ఈ నిర్ణయం తీసుకుంది.