అనకాపల్లి: అత్తను చంపిన కోడలు.. చిన్న కారణానికే, గతంలో కూడా ఇలాగే!
Andhra Pradesh Telugu | Suryaa Desk | Published : Thu, Mar 14, 2024, 10:41 PM
అనకాపల్లిలో అత్తను కోడలు హత్య చేయడం కలకలంరేపింది. కొత్తూరు పంచాయతీ దేవీనగర్‌లో నివాసం ఉంటున్న ఈగల సింహాద్రమ్మ, సన్యాసిరావుకు కుమారుడు, ముగ్గురు కుమార్తెలు. కుమారుడు గణేష్‌కు, తుమ్మపాలకు చెందిన పూర్ణకు 2007లో ప్రేమ వివాహమైంది. వీరికి ఇద్దరు పిల్లలు.. దేవీనగర్‌లో ఉన్న ఇంట్లో అత్త సింహాద్రమ్మ, కోడలు పూర్ణ పక్కపక్కనే నివాసం ఉంటున్నారు. తరచూ అత్తా, కోడళ్ల మధ్య గొడవలు జరుగుతుండేవి. ఏడాది క్రితం కోడలు పూర్ణ అత్తను గాయపరిచింది.. కుటుంబ సభ్యులు కూర్చోబెట్టి మాట్లాడి సర్థిచెప్పారు.
ఇటీవల కాలంలో పూర్ణ దిశ పోలీస్‌స్టేషన్‌లో అత్త, మామలపై వరకట్న కేసు పెట్టడంతో కౌన్సెలింగ్‌ ఇచ్చారు. సోమవారం ఉదయం ఇంట్లోకి కోతులు వచ్చిన విషయంపై అత్తా కోడళ్ల మధ్య వివాదం జరిగింది. ఈ క్రమంలో కోడలు పూర్ణ 'నువ్వు పోతేనేగానీ మాకు మనఃశాంతి ఉండదంటూ'.. ఇంట్లో ఉండే సన్నికాలు రాయితో అత్త సింహాద్రమ్మ తల, మొహంపై కొట్టింది. ఆ తర్వాత పూర్ణ కేకలు వేసుకుంటూ బయటకు వచ్చి అక్కడి నుంచి పారిపోయింది.
వెంటనే స్థానికులు రక్తపు మడుగులో కొట్టుమిట్టాడుతున్న సింహాద్రమ్మను చికిత్స నిమిత్తం అనకాపల్లిలోని జిల్లా ఆసుపత్రికి తరలించారు. కానీ అప్పటికే ఆమె చనిపోయినట్లు వైద్యులు చెప్పారు. సింహాద్రమ్మ భర్త సన్యాసిరావు ఫిర్యాదు మేరకు కోడలు పూర్ణపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు. పరారీలో ఉన్న నిందితురాలు పూర్ణ కోసం గాలిస్తున్నారు.
|
|