ఏపీఎస్‌ఆర్టీసీ ఎండీ పేరుతో ఫేస్ఋ‌క్ అకౌంట్.. తీరా ఆరా తీస్తే, పెద్ద ట్విస్టే ఉందిగా!
Andhra Pradesh Telugu | Suryaa Desk | Published : Thu, Mar 14, 2024, 10:40 PM
సైబర్ నేరగాళ్లు రెచ్చిపోతున్నారు. అధికారుల పేర్లు, ఫొటోలు ఉపయోగించి నకిలీ ఫేస్‌ బుక్‌ అకౌంట్లు, ట్విట్టర్‌ అకౌంట్లు తెరిచి సైబర్ నేరగాళ్లు ప్రజలను మోసం చేస్తున్నారు. గతంలో ఇలాగే చేసి, ఆయా శాఖల సిబ్బందిని డబ్బులు పంపమన్న ఘటనలు జరిగాయి. తాజాగా ఏపీఎస్‌ ఆర్టీసీ మేనేజింగ్‌ డైరెక్టర్‌ సి.హెచ్‌.ద్వారకా తిరుమలరావు పేరుతో సైబర్ నేరగాళ్లు నకిలీ ఫేస్‌బుక్‌ ఖాతా తెరిచారు. యూనిఫారంలో ఉన్న ఆయన ఫోటో ప్రొఫైల్‌గా పెట్టి, నకిలీ ఖాతా తెరిచినట్లు అధికారులు గుర్తించారు. వెంటనే ఈ సమాచారం ద్వారకా తిరుమలరావుకు అందించారు. దీనిపై తగిన విచారణ జరిపి నిందితులపై చర్యలు తీసుకోవాలంటూ ఆయన ఫిర్యాదు చేశారు.
ఈ మేరకు విజయవాడ సైబర్ క్రైం పోలీసులు కేసు నమోదు చేశారు. దీనిపై దర్యాప్తు ప్రారంభించిన అధికారులు.. ఎటువంటి లావాదేవీలు జరగకుండా నకిలీ అకౌంట్‌ను వెంటనే స్తంభింపచేశారు. ఈ అకౌంట్ ఏ ఐపీ అడ్రస్‌తో క్రియేట్‌ చేశారు?.. ఈ పని ఎవరు చేసి ఉండొచ్చు? అనే వివరాలను తెలియజేయాలంటూ ఫేస్‌బుక్‌కు రిక్వెస్ట్‌ పంపారు. ఆయా వివరాలు వచ్చిన తర్వాత ఎవరు క్రియేట్‌ చేశారు? దాని వెనుక ఎవరైనా ఉన్నారా? తదితర వివరాలు తెలుస్తాయని అధికారులు తెలిపారు. ఫేస్‌బుక్‌తో సహా ఏ ఇతర సోషల్ మీడియాలో తనకు ఎటువంటి అకౌంట్లు లేవని ఆర్టీసీ ఎండీ ద్వారకా తిరుమలరావు తెలిపారు.
|
|