బీజేపీకి పాక్‌ నుంచి ఎన్నికల విరాళాలు.. పుల్వామా ఉగ్రదాడి తర్వాత కొన్ని రోజులకే.. ట్వీట్ చేసిన ఎస్పీ

దేశంలో లోక్‌సభ ఎన్నికల వేళ.. ఎలక్టోరల్ బాండ్ల అంశం రాజకీయ పార్టీలను తీవ్రంగా కుదిపేస్తోంది. ఎలక్టోరల్ బాండ్ల వివరాలు వెల్లడించాలని సుప్రీంకోర్టు ఇచ్చిన ఆదేశాలతో స్టేట్ బ్యాంక్ ఆఫ్ ఇండియా-ఎస్‌బీఐ.. డాటాను మార్చి 14 వ తేదీన బహిర్గతం చేసింది. ఈ క్రమంలోనే తాజాగా ఆ ఎలక్టోరల్ బాండ్ల వివరాలు పరిశీలించగా సంచలన విషయాలు వెలుగులోకి వస్తున్నాయి. 2019 సార్వత్రిక ఎన్నికల సందర్భంగా కేంద్రంలో అధికారంలో ఉన్న బీజేపీకి పాకిస్థాన్‌కు చెందిన ఓ కంపెనీ నుంచి భారీగా విరాళాలు అందినట్లు తాజాగా ఎస్‌బీఐ విడుదల చేసిన ఎన్నికల బాండ్లను బట్టి చూస్తే అర్థం అవుతోంది. అయితే జమ్మూ కాశ్మీర్‌లోని పుల్వామాలో 40 మంది సీఆర్‌పీఎఫ్ జవాన్లను పొట్టనపెట్టుకున్న కొన్ని రోజులకే పాక్ కంపెనీ నుంచి బీజేపీకి చెందిన ఎలక్షన్ బాండ్లు కొనుగోలు చేయడం గమనార్హం.

సుప్రీంకోర్టు ఆదేశాలతో ఎన్నికల బాండ్లకు సంబంధించిన వివరాలను ఎన్నికల కమిషన్ గురువారం ప్రజలకు అందుబాటులో ఉంచింది. అయితే ఇందులో ది హబ్ పవర్ కంపెనీ బీజేపీకి చెందిన రూ.95 లక్షల ఎన్నికల బాండ్లను కొనుగోలు చేసినట్లు అందులో ఉంది. ఇది 2019 ఎన్నికల సందర్భంగా జరిగిందని స్పష్టంగా ఉంది. ఇక ఈ వివరాలన్నింటినీ సమాజ్‌వాదీ పార్టీ ట్విటర్‌లో షేర్ చేసింది. ఈ ది హబ్ పవర్ కంపెనీ పాకిస్థాన్‌కు చెందిందని ఎస్పీ పేర్కొంది. ఎస్పీ మాత్రమే కాకుండా ట్విటర్‌లోని మరికొందరు నెటిజన్లు కూడా ఇదే విషయాన్ని ధ్రువీకరించారు. పుల్వామా ఉగ్రదాడి జరిగిన కొన్ని రోజుల తర్వాత ది హబ్ పవర్ కంపెనీ ఈ ఎన్నికల బాండ్లను కొనుగోలు చేసిందని అందులో తెలిపారు.

ఈ ఎన్నికల బాండ్ల కొనుగోలు అంశంలో అధికార బీజేపీని ఉద్దేశించి ఎస్పీ తీవ్ర విమర్శలు గుప్పించింది. పాకిస్థాన్‌ కంపెనీ అయిన హబ్ పవర్ కంపెనీ 2019 లోక్‌సభ ఎన్నికల సందర్భంగా బీజేపీకి చెందిన రూ.95 లక్షల విలువైన బాండ్లను కొనుగోలు చేసిందని.. అదే సమయంలో పుల్వామాలో భారత సైనికులపై ఉగ్రదాడి జరిగిందని తెలిపింది. ఇలాంటి దేశద్రోహి అయిన పార్టీని ఇంతవరకు చూడలేదు అంటూ ఎస్పీ తీవ్ర ఆరోపణలు చేసింది. ఎందుకు బీజేపీ పాకిస్థాన్ కంపెనీలను ప్రేమిస్తోంది అని ప్రశ్నించింది. ఇలాంటి విషయాలు బయటపడతాయనే.. బీజేపీ ఇన్ని రోజులు ఎన్నికల విరాళాల వివరాలను దాచిపెట్టిందని ఎస్పీ తీవ్ర విమర్శలు చేసింది.

అయితే ఇదే విషయాన్ని పలువురు సోషల్ మీడియా యూజర్లు కూడా వ్యక్తం చేశారు. పుల్వామా ఉగ్రదాడి జరిగిన కొన్ని వారాలకు హబ్ పవర్ కంపెనీ ఎన్నికల బాండ్లను కొనుగోలు చేసిందని ఒక నెటిజన్ తెలిపారు. 40 మంది ధైర్యవంతమైన సైనికులు అమరులు కావడంతో దేశం మొత్తం సంతాపం తెలుపుతుంటే కొందరు పాకిస్థాన్ నుంచి విరాళాలు పొందుతున్నారని మండిపడ్డారు. దీన్ని బట్టి చూస్తుంటే పుల్వామా ఉగ్రదాడి జరిగి 5 ఏళ్లు కావస్తున్నా ఎందుకు సరైన విచారణ జరగడం లేదని ఇంకా నిందితులను ఎందుకు పట్టుకోలేదనే విషయం అర్థం అవుతోందని మరో నెటిజన్ పేర్కొన్నాడు.

సోషల్ మీడియాలో విస్తృతంగా ఈ వార్త వైరల్ కావడంతో పాకిస్థాన్‌కు చెందిన ది పవర్ హబ్ కంపెనీ లిమిటెట్.. క్లారిటీ ఇచ్చింది. ఈ వ్యవహారానికి, భారతదేశంలోని ఏ కంపెనీతోనూ తమకు ఎలాంటి సంబంధం లేదని ఆ కంపెనీ ఒక ప్రకటనలో స్పష్టం చేసింది. భారత్‌లో తాము ఎన్నికల బాండ్లు కొనుగోలు చేసినట్లు వస్తున్న వార్తలు తమ కంపెనీ దృష్టికి వచ్చాయని.. అయితే పేరు విషయంలో జరిగిన చిన్న పొరపాటు కారణంగా తమ కంపెనీ అంతా పొరబడుతున్నారని వెల్లడించింది. అది భారత కంపెనీ అయిన హబ్ పవర్ కంపెనీ అని తెలిపింది. ఆ కంపెనీతో గానీ.. భారత్‌లోని మరే ఇతర కంపెనీతో గానీ తమకు ఎలాంటి సంబంధాలు లేవని స్పష్టం చేసింది. సోషల్ మీడియాలో వస్తున్న బాండ్ల కొనుగోలులకు తమకు ఎలాంటి సంబంధం లేదని తేల్చి చెప్పింది.

అంతే కాకుండా పాకిస్తాన్ బయట తాము చేసే ఏ చెల్లింపులకైనా స్టేట్ బ్యాంక్ ఆఫ్ పాకిస్తాన్ ద్వారా అవసరమైన అనుమతులు, ఆమోదం పొందిన తర్వాత మాత్రమే చెల్లింపులు జరుగుతాయని స్పష్టం చేసింది. సోషల్ మీడియాలో ఏదైనా సమాచారాన్ని షేర్ చేయడానికి ముందే ఆ విషయం గురించి వాస్తవాలను ధృవీకరించాలని కోరుతున్నట్లు తెలిపింది. ఇంకా ఎలాంటి విచారణ, స్పష్టత కోసం తమ కంపెనీ అఫీషియల్ వెబ్‌సైట్‌ను చూడొచ్చని సూచించింది.