విచిత్రం.. తోకతో పుట్టిన చిన్నారి.. ఆశ్చర్యపోయిన డాక్టర్లు

సాధారణంగా మనుషులకు తోకలు ఉండవు. జంతువులు మాత్రమే తోకలతో జన్మిస్తాయి. అప్పుడప్పుడూ కొందరు శిశువులు పుట్టగానే వారికి తోకలు ఉండటాన్ని డాక్టర్లు గమనించినట్లు మనం వార్తల్లో చూశాం. ఇప్పుడు కూడా అచ్చం అలాంటి సంఘటనే జరిగింది. పురిటి నొప్పులతో ఆస్పత్రికి వెళ్లిన ఓ గర్భిణీకి డాక్టర్లు సక్సెస్‌ఫుల్‌గా ఆపరేషన్ నిర్వహించారు. అనంతరం బిడ్డను బయటికి తీసిన డాక్టర్లు ఆ శిశువుకు తోక ఉండటం చూసి అవాక్కయ్యారు. ఈ విచిత్ర సంఘటన చైనాలో చోటు చేసుకుంది.

చైనాలోని హాంగ్‌జౌ ప్రావిన్స్‌లోని ఓ హాస్పిటల్‌లో ఈ సంఘటన చోటు చేసుకుంది. నెలలు నిండిన గర్భిణీకి ఆపరేషన్ చేసిన డాక్టర్లు శిశువును బయటికి తీశారు. అప్పుడే ఆ శిశువుకు తోక ఉన్నట్లు గుర్తించారు. అప్పుడే పుట్టిన బిడ్డకు తోక ఉండడాన్ని డాక్టర్లు గమనించి ఆశ్చర్యపోయారు. చిల్డ్రన్స్ హాస్పిటల్‌లోని పీడియాట్రిక్ న్యూరోసర్జరీ డిప్యూటీ చీఫ్ ఫిజిషియన్ డాక్టర్ లీ.. శిశువు పుట్టిన కొద్దిసేపటికే ఈ పరిస్థితిని గుర్తించినట్లు తెలిపారు. ఈ క్రమంలోనే సోషల్ మీడియాలో ఓ వీడియోను ఆయన షేర్ చేశారు. అప్పుడే పుట్టిన శిశువుకు వెనుక వైపున వీపు కింది భాగంలో తోక ఉండటాన్ని చూపిస్తూ ఆ వీడియోను పంచుకున్నారు.

ఇది అసంపూర్ణమైన క్షీణత వల్ల వచ్చిందని డాక్టర్లు అనుమానం వ్యక్తం చేశారు. అనంతరం ఎంఆర్ఐ స్కానింగ్ నిర్వహించి ఆ తోకకు సంబంధించి మరిన్ని వివరాలు సేకరించారు. వెన్నుపాము చుట్టూ ఉన్న కణజాలాలతో ఆ తోక అనుసంధానం అయి ఉందని గుర్తించారు. అయితే తోక సాధారణంగా వెన్నెముక అడుగుభాగంలో ఉంటుందని పేర్కొన్నారు. మృదువుగా ఉండి ఎముకలు లేకుండా ఉన్న ఆ తోక సుమారు 10 సెంటీ మీటర్లు అంటే 3.9 అంగుళాల పొడవు ఉందని తెలిపారు. అయితే ఆ తోక వివిధ నాడీ సంబంధ వ్యవస్థలకు హాని కలిగిస్తుందని డాక్టర్లు తెలిపారు.

అయితే ఆ తోకను తొలగించాలని శిశువు తల్లి, కుటుంబ సభ్యులు డాక్టర్లకు విజ్ఞప్తి చేశారు. అయితే తోకను తొలగించడం సాధ్యం కాదని.. అందుకే ఆ తోక శిశువుకు అలాగే ఉంటుందని డాక్టర్లు వెల్లడించారు. ఆ తోక శిశువు నాడీ వ్యవస్థతో సంబంధం కలిగి ఉందని.. అందుకే శస్త్రచికిత్స చేసి దాన్ని తొలగించకూడదని నిర్ణయించుకున్నట్లు తెలిపారు. ఈ క్రమంలోనే ఆ తోకను అలాగే ఉంచాలని వైద్యులు నిర్ణయించుకున్నారు ఈ ఘటన గత ఏడాది దక్షిణ అమెరికాలోని గయానాలో నమోదైన ఓ కేసును గుర్తు చేస్తుందని చైనా డాక్టర్లు తెలిపారు. గత ఏడాది జూన్‌లో ఓ మగ శిశువు తోకతో జన్మించాడు. అయితే ఆ శిశువు జన్మించిన 10 రోజుల తర్వాత ఆ తోకను శరీరం నుంచి విజయవంతంగా తొలగించారు.