తిరుమలలో ఎలుగుబంటి సంచారం
Andhra Pradesh Telugu | Suryaa Desk | Published : Thu, Mar 21, 2024, 05:40 PM
తిరుమలకు నడిచివెళ్లే అలిపిరి మార్గంలో మళ్లీ ఎలుగుబంటి సంచారం కలకలం సృష్టించింది. అలిపిరి మార్గం మధ్యలోని లక్ష్మీనరసింహస్వామి ఆలయానికి సమీపంలో మంగళవారం రాత్రి 12.48 గంటల సమయంలో ఎలుగుబంటి కెమెరా ట్రాప్కు చిక్కింది.నడకమార్గం సమీపానికి వచ్చి వెళుతున్న ఎలుగుబంటిని చూసి అధికారులు ఉలిక్కిపడ్డారు. గతంలో ఇదే ప్రాంతంలోనే చిరుత పులులు, ఎలుగుబంట్లు కనిపించిన విషయం తెలిసిందే.ఈ క్రమంలో నడిచి వచ్చే భక్తులను ఫారెస్ట్ అధికారులు అప్రమత్తం చేశారు.గాలిగోపురం నుంచి మోకాళ్లమిట్ట వరకు భక్తులను గుంపులుగా పంపారు. ప్రతి గుంపుతో ఇద్దరు విజిలెన్స్ సిబ్బందిని పంపడంతో పాటు చేతికర్రలను అందజేసి జాగ్రత్తగా పంపుతున్నారు. జనసంచారంలోకి ఎలుగుబంట్లు రాకుండా శబ్దాలు చేస్తున్నారు. టీటీడీ ఉన్నతాధికారులతో పాటు విజిలెన్స్, ఫారెస్ట్ అధికారులు అప్రమత్తమై భక్తులకు ప్రమాదం వాటిల్లకుండా తగిన జాగ్రత్తలు తీసుకున్నామని ఫారెస్ట్ అధికారులు మీడియాకు తెలిపారు.కొద్దిరోజులుగా ఓ చిరుతతో పాటు ఎలుగుబంట్లు నడకమార్గానికి కొంతదూరంలో సంచరిస్తున్నట్టు కెమెరాల్లో రికార్డయిందని, అయితే అవేవీ మెట్లవైపు రాలేదని తెలిపారు. అయినప్పటికీ భక్తులను కట్టుదిట్టమైన భద్రత నడుమ ముందుకు పంపుతున్నామని తెలిపారు.
|
|