దాడులకు పాల్పడిన యువకుడు అరెస్ట్

 ఒక యువకుడు 24 గంటలు జరగక ముందే ఇద్దరిపై కత్తితో దాడి చేశాడు. పోలీసులు ఒక్క కేసును నమోదు చేసి రెండో ఘటన జరగ్గానే మొదటి కేసును సెక్షన్‌ మార్పు చేశారే తప్ప రెండో కేసు నమోదు చేయక పోవడం పట్ల పలు అనుమానాలు వ్యక్తమవుతు న్నాయి. ఏలూరు అశోక్‌నగర్‌కు చెందిన పాలడుగు చాణక్య విదేశాల్లో వైద్య విద్యను అభ్య సిస్తున్నాడు. తుది పరీక్షలు రాయాల్సి ఉంది. ప్రస్తుతం ఏలూరులోని తన ఇంటి వద్దే ఉంటున్నాడు. ఇంటి పక్కన జాలిపూడినకు చెందిన కార్పెంటర్‌ ఎన్‌.దుర్గా సురేష్‌ వడ్రంగి పని చేస్తున్నాడు. మిషనరీ ఎక్కువ శబ్ధం వ స్తోందని పని ఆపేయాలని చాణక్య చెప్పాడు. అయితే పనిచేసేటప్పుడు శబ్ధం వస్తుందని సురేష్‌ చెప్పడంతో ఆగ్రహించిన అతను చాకుతో రెండు చేతులపై, వీపుపై సురేష్‌ను పొడిచాడు. గాయాల పాలైన అతను ఏలూరు ప్రభుత్వాస్పత్రికి అక్కడ నుంచి మెరుగైన చికిత్స కోసం ఒక ప్రైవేటు ఆసుపత్రికి వెళ్ళాడు. వైద్యులు ఎమ్మెల్సీగా నమోదు చేసి టూటౌన్‌ పోలీసులకు ఫిర్యాదు ఇవ్వడంతో పోలీసులు ఐపీసీ 324 కింద నమోదు చేశారు. వాస్తవానికి ఐపీసీ 307 (హత్యాయత్నం) నమోదు చేయాల్సి ఉంది. ఈ కేసులో నిందితుడిపై ఎలాంటి చర్య తీసుకోలేదు. కాగా బుధవారం మధ్యాహ్నం 12 గంటల ప్రాంతంలో డీమార్టు సమీపంలో ఒక కారు నడుపుతున్న వ్యక్తి హారన్‌ వేశాడు. అటుగా మోటారు సైకిల్‌పై వస్తున్న చాణక్య ఆగ్రహించి తన బ్యాగ్‌లో ఉన్న చాకుతీసి కారునడిపే వ్యక్తిపై దాడిచేసి వేలు కోసి, చేతులపై పొడిచాడు. అక్కడున్న వారు అతన్ని నిర్బంధించి టూటౌన్‌ పోలీసులకు సమాచారం ఇవ్వడంతో బ్లూకోడ్‌ పోలీసులు వచ్చి అతన్ని అదుపులోకి తీసుకు న్నారు. 24 గంటలు కాకముందే చాణక్య ఇద్దరిపై దాడి చేశాడు. రెండో ఘటనకు చాణక్య పాల్పడడంతో ఆ ఘటనపై పోలీసులు కేసు నమోదు చేయకుండా వడ్రంగి మేస్ర్తిపై జరిగిన దాడి కేసు సెక్షన్‌ను ఐసీపీ 324 నుంచి 326గా మార్పు చేసి చాణక్యను అరెస్టు చేశారు.