టీడీపీ మూడో జాబితా.. మాజీ మంత్రితో పాటూ ఆ ఇద్దరు నేతలకు చంద్రబాబు షాక్

తెలుగుదేశం పార్టీ అభ్యర్థుల మూడో జాబితా విడుదలైంది. 11మంది అసెంబ్లీ, 13 లోక్‌సభ స్థానాలకు అభ్యర్థుల్ని ప్రకటించారు. రాష్ట్ర ప్రయోజనాలే ఏకైక ఎజెండాగా ఎన్డీయేలో చేరామన్నారు చంద్రబాబు. పార్లమెంటులో బలమైన గళం వినిపిస్తూ.. రాష్ట్రం కోసం పోరాడగల నాయకులనే టీడీపీ అభ్యర్థులుగా నిలబెడుతున్నామన్నారు. పార్లమెంటుకు పోటీ చేసే 13 మంది తెలుగుదేశం ఎంపీ అభ్యర్థులను.. వీరితో పాటు మరో 11 అసెంబ్లీ స్థానాలకు కూడా అభ్యర్థులను ప్రజాభిప్రాయం మేరకు ఎంపిక చేసి ప్రకటించామన్నారు.. ప్రజలు ఆశీర్వదించాలని కోరారు.

అయితే టీడీపీ ప్రకటించిన జాబితాలో ముగ్గురు సీనియర్ నేతలకు చంద్రబాబు షాక్ ఇచ్చారు. మైలవరం నుంచి మాజీ మంత్రి దేవినేని ఉమా మహేశ్వరరావును కాదని.. ఇటీవలే తెలుగు దేశం పార్టీలో చేరిన వసంత కృష్ణప్రసాద్‌ను అభ్యర్థిగా ప్రకటించారు. టీడీపీ మైలవరం సీటు విషయంలో మొన్నటి వరకు మౌనం వహించింది.. రెండు జాబితాల్లో ఈ స్థానాన్ని పెండింగ్ పెట్టింది. మైలవరానికి సంబంధించి సమీకరణాలపై కసరత్తు చేశారు. మైలవరంలో వసంత కృష్ణప్రసాద్‌కు టికెట్ ఇచ్చి.. దేవినేని ఉమాను పెనమలూరు నుంచి పోటీ చేయించాలని భావించారు. అయితే పెనమలూరు నుంచి మాజీ ఎమ్మెల్యే బోడే ప్రసాద్ రేసులో నిలిచారు.

ఈ క్రమంలో మైలవరం, పెనమలూరు సీట్ల విషయంలో గందరగోళం కొనసాగింది. బోడే ప్రసాద్ అనుచరులు ఆందోనళకు దిగారు.. అలాగే రోజుకో పేరుతో పెనమలూరులో ఐవీఆర్‌ఎస్ ద్వారా అభిప్రాయ సేకరణ చేశారు. ఎంఎస్ బేగ్, దేవినేని ఉమా, వసంత వసంత కృష్ణప్రసాద్‌, ఆలపాటి రాజా, దేవినేని చందు పేర్లు వినిపించాయి. అయితే మూడో జాబితాలో ట్విస్ట్ ఇస్తూ.. మైలవరం సీటును వసంత కృష్ణప్రసాద్‌కు కేటాయించి.. పెనమలూరులో బోడే ప్రసాద్‌ పేరును ప్రకటించారు. దేవినేని ఉమాకు మాత్రం చంద్రబాబు షాకిచ్చారనే చెప్పాలి.. అయితే ఉమాకు ముందుగానే చెప్పి ఈ నిర్ణయం తీసుకుని ఉండొచ్చని కొందరు చెబుతున్నారు. ఉమాకు టికెట్ లేకపోవడంతో ఆయన రాజకీయ భవిష్యత్ సంగతి ఏంటనే చర్చ జరుగుతోంది.

మరోవైపు శ్రీకాకుళం అసెంబ్లీ స్థానం నుంచి గొండు శంకర్‌కు అవకాశం ఇచ్చారు. మాజీ ఎమ్మెల్యే గుండ లక్ష్మిదేవికి టికెట్ నిరాకరించారు.. అనూహ్యంగా శంకర్‌కు సీటు కేటాయించారు. వాస్తవానికి శ్రీకాకుళం స్థానాన్ని బీజేపీకి కేటాయిస్తారని తెలియడంతో గుండ లక్ష్మిదేవి కన్నీటిపర్యంతం అయ్యారు. అనుచరులతో సమావేశమై.. పరిణామాలపై చర్చించారు. అయితే ఈ సీటు బీజేపీకి కాకుండా టీడీపీనే అభ్యర్థిని ప్రకటించింది. సీనియర్ నేతగా ఉన్న గుండ కుటుంబానికి కాకుండా అనూహ్యంగా గొండు శంకర్‌ పేరు ప్రకటించడం చర్చనీయాంశమైంది.

అలాగే శ్రీకాకుళం జిల్లా పాతపట్నం అసెంబ్లీ స్థానానికి మామిడి గోవిందరావు పేరును ప్రకటించింది టీడీపీ. ఇక్కడి నుంచి మాజీ ఎమ్మెల్యే కలమట వెంకటరమణ సీటు ఆశించారు.. కానీ కలమటను పక్కన పెట్టి గోవిందరావుకు టికెట్ ఇచ్చారు. సీటు దక్కకపోవడంతో వెంకటరమణ అనుచరులు అసంతృప్తితో ఉన్నారు. మరి కలమట వర్గం ఎలాంటి నిర్ణయం తీసుకుంటుంది అన్నది చూడాలి. అసంతృప్తితో ఉన్న నేతల్ని టీడీపీ అధిష్టానం ఎలా బుజ్జగిస్తుందన్నది చూడాలి. టీడీపీ ఇంకా ఐదు అసెంబ్లీ స్థానాలు.. నాలుగు లోక్‌సభ స్థానాలకు అభ్యర్థుల్నిప్రకటించాల్సి ఉంది.