విశాఖ డ్రగ్స్ కేసు.. ఆ ప్రచారాన్ని నమ్మొద్దన్న నగర సీపీ రవిశంకర్

విశాఖ పోర్టులో కంటెయినర్‌లో డ్రగ్స్‌ కేసుపై నగర సీపీ రవిశంకర్‌ స్పందించారు. దీన్ని పూర్తిగా సీబీఐ దర్యాప్తు చేస్తోందని చెప్పారు. సీబీఐ డాగ్‌ స్క్వాడ్‌ సహకారం కోరితే ఇచ్చినట్లు తెలిపారు. తమ వల్ల సోదాలు ఆలస్యమయ్యాయని చెప్పడం సరికాదన్నారు. విశాఖ పరిధిలో ఎక్కడా గంజాయి సాగు లేదని.. నగరం మీదుగా రవాణా జరగడంతో తప్పుడు ప్రచారం చేస్తున్నారన్నారు. నగరంలో డ్రగ్స్‌పై ఉక్కుపాదం మోపుతున్నట్లు చెప్పారు. కంటెయినర్‌ టెర్మినల్‌ తమ కమిషనరేట్‌ పరిధిలోకి రాదన్నారు. కస్టమ్స్‌ ఎస్పీ పిలిస్తే వెళ్లామని.. సీబీఐ విధి నిర్వహణకు తమవల్ల ఆటంకం కలగలేదన్నారు.

ఇంటర్‌పోల్‌ సమాచారంతో సీబీఐ విశాఖకు వచ్చిందని చెప్పుకొచ్చారు. సీబీఐ పిలిస్తేనే పోలీసులు అక్కడికి వెళ్లినట్టు తెలిపారు. ఇదే సమయంలో తమపై ఎలాంటి పొలిటికల్‌ ఒత్తిడిలేదని స్పష్టం చేశారు. డ్రగ్స్‌ కేసు అంతా సీబీఐ పర్యవేక్షిస్తోందని.. సీబీఐ నుంచి తమకు కాల్‌ వచ్చిందన్నారు. వారు డాగ్‌ స్క్వాడ్‌ కావాలని అడిగారని.. ఆ తర్వాత డాగ్‌ స్క్వాడ్‌ వద్దని చెప్పారన్నారు. ‍కేవలం డాగ్‌ స్క్వాడ్‌ కోసమే స్థానిక పోలీసులు వెళ్లారని.. సీబీఐ విన్నపం మేరకు పోలీసులు అక్కడికి వెళ్లారన్నారు. విశాఖ పోర్టు తమ పరిధిలో ఉండదని.. తాము కేంద్ర ఎన్నికల సంఘం పర్యవేక్షణలో పనిచేస్తున్నామన్నారు. విధి నిర్వహణలో తమపై ఎవరూ ఒత్తిడి చేయలేరని.. ఏపీ పోలీసులపై సీబీఐ ఎలాంటి ఆరోపణలు చేయలేదన్నారు. ఇందులో ఏ రాజకీయపరమైన కోణాలు లేవని.. ఏదైనా నిర్ధారించుకున్న తర్వాతే, మీడియా ప్రచురించాలని కోరుతున్నామని రవిశంకర్ తెలిపారు.

తమ పరిధిలోలేని ప్రైవేటు పోర్టుకు కస్టమ్స్‌ అధికారులు పిలిస్తేనే వెళ్లామన్నారు సీపీ. వాస్తవాలు తెలుసుకోకుండా వార్తలు రాయడం మంచిది కాదని.. కావాలని ప్రభుత్వాన్ని అప్రతిష్టపాలు చేయడానికి వదంతులు సృష్టిస్తున్నారన్నారు. విశాఖ డ్రగ్స్‌ వ్యవహారాన్ని సీబీఐ చూస్తోందన.. విశాఖ చాలా సేఫ్‌ సిటి అన్నారు. లోకల్‌ అధికారుల వల్ల లేటు అ‍య్యిందని చెప్పడం టెక్నికల్‌ టెర్మినాలజీ మాత్రమేనని.. తాము ఎన్డీపీఎస్‌ మీద ఉక్కుపాదం మోపుతున్నామన్నారు. విశాఖను డ్రగ్స్‌ ఫ్రీ సిటీగా చేస్తున్నామని.. గత ఐదేళ్ల కాలంలో డ్రగ్స్‌ను కట్టడి చేస్తున్నామన్నారు. గంజా రవాణాను అడ్డుకున్నామన్నారు.