శ్రీకాకుళం జిల్లాలో విషాదం.. ఎలుగుబంటి దాడిలో ఇద్దరు మృతి.. మరో మహిళకు తీవ్ర గాయాలు
Andhra Pradesh Telugu | Suryaa Desk | Published : Sat, Mar 23, 2024, 08:00 PM
శ్రీకాకుళం జిల్లాలో దారుణం జరిగింది. ఎలుగుబంటి ఇద్దరి ప్రాణాలను బలి తీసుకుంది. జనం చూస్తుండగానే వ్యక్తిని చంపి రక్తం తాగేసింది.. ఈ ఘటనను చూసి అందరూ భయంతో వణికిపోయారు. వజ్రపుకొత్తూరు మండలం అనకాపల్లిలో ఉన్న తోటలో స్థానికులు పనిచేస్తున్నారు. ఇంతలో ఎలుగుబంటి అటువైపుగా వెళ్లింది. ఒక్కసారిగా ఇద్దరు వ్యక్తులపై దాడి చేసింది. ఈ ఘటనలో లోకనాథం, లైశెట్టి కుమార్ చనిపోగా.. మరో మహిళ తీవ్రంగా గాయపడింది. ఆమెను వెంటనే ఆస్పత్రికి తరలించారు.. మహిళ పరిస్థితి విషమంగా ఉందని డాక్టర్లు చెబుతున్నారు.
ఈ ఘటనపై సమాచారం అందుకున్న అటవీ శాఖ అధికారులు ఘటనాస్థలికి చేరుకున్నారు. ఎలుగుబంటిని బంధించేందుకు చర్యలు ప్రారంభించారు. ఇటీవల కాలంలో ఎలుగుబంట్లు ఉద్దానం ప్రాంతంలో సంచరిస్తున్నాయి. స్థానికులు అటవీశాఖ అధికారులకు ఫిర్యాదు చేశారు.. ఎలుగుబంటుల్ని బంధించాలని కోరారు. ఎలుగుబంట్లు పొలాల వైపు వస్తుండటంతో స్థానికులు భయపడుతున్నారు. ఎటువైపు నుంచి ఎలుగుబంటి వచ్చి దాడి చేస్తుందోనని భయపడుతున్నారు.. పొలాలవైపు వెళ్లాలంటేనే వణికిపోతున్నారు.
|
|