ఊపిరితిత్తుల కేన్సర్‌కు ప్రపంచంలోనే తొలి టీకా.. శాస్త్రవేత్తల అద్భుత సృష్టి

ఊపిరితిత్తుల కేన్సర్‌కు ప్రపంచంలోనే తొలిసారి టీకాను బ్రిటన్ పరిశోధకుల బృందం రూపొందించింది. ఊపిరితిత్తుల కేన్సర్ కణాలు, ఉత్పరివర్తనాలుగా రూపాంతరం చెందే ప్రమాదకర ప్రోటీన్‌లను గుర్తించి, నాశనం చేయడానికి రోగనిరోధక వ్యవస్థకు శిక్షణనిచ్చే డీఎన్ఏను ఉపయోగించుకుని ఈ టీకా పని చేస్తుంది. స్కై న్యూస్ ప్రకారం.. ఆక్స్‌ఫర్డ్ యూనివర్సిటీ, లండన్ యూనివర్సిటీకి చెందిన ఫ్రాన్సిస్ క్రిక్ ఇన్‌స్టిట్యూట్ శాస్త్రవేత్తలు సంయుక్తంగా ఈ టీకాను అభివృద్ధి చేస్తున్నారు. ‘LungVax’ అని పిలిచే ఈ టీకా ఆక్స్‌ఫర్డ్-ఆస్ట్రాజెనెకా కోవిడ్ వ్యాక్సిన్‌ని పోలి ఉంటుందని స్కైన్యూస్ తన నివేదికలో పేర్కొంది.

నియో-యాంటీజెన్స్‌గా పిలిచే ప్రమాదకర ప్రోటీన్లను గుర్తించి నాశనం చేసే 3 వేల టీకా డోస్‌లను శాస్త్రవేత్తల బృందం తయారుచేయనుంది. బ్రిటన్‌లో ఊపిరితిత్తుల కేన్సర్ సర్వసాధారణం. అక్కడ ఏటా 50వేలకుపైగా కేసులు, 35 వేల మరణాలకు కారణమవుతోంది. ప్రతి 10 కేసుల్లో ఏడు ధూమపానంతో సంబంధం ఉన్నవే కావడం గమనార్హం. అధిక ముప్పు ఉన్న వ్యక్తులలో ప్రస్తుతం ధూమపానం చేస్తున్న 55-74 ఏళ్లు వయస్సు వారు లేదా గతంలో ధూమపానం చేసినవారు ఉన్నారు.

‘ఊపిరితిత్తుల కేన్సర్‌తో బాధపడుతున్న వారిలో 10% కంటే తక్కువ మంది 10 ఏళ్లు లేదా అంతకంటే ఎక్కువ కాలం జీవించాలి.. అది తప్పనిసరిగా మారాలి’ అని యూనివర్సిటీ కాలేజ్ ఆఫ్ లండన్, ఫ్రాన్సిస్ క్రిక్ ఇన్‌స్టిట్యూట్‌కు చెందిన ప్రొఫెసర్ మరియం జమాల్-హంజానీ, అన్నారు. LungVax క్లినికల్ ట్రయల్‌కు ఆమె నాయకత్వం వహించనున్నారు. ‘ఊపిరితిత్తుల ఆరోగ్య పరీక్షల ద్వారా కేన్సర్‌ను ముందుగా గుర్తించే ప్రయత్నాలను ఈ పరిశోధన పూర్తి చేస్తుంది’ ఆమె తెలిపారు. ఇది ఊపిరితిత్తుల కేన్సర్‌లను 90 శాతం నిరోధించగల సామర్థ్యాన్ని కలిగి ఉందని పేర్కొన్నారు.

‘LungVax ఊపిరితిత్తుల కేన్సర్ ప్రమాదాన్ని తగ్గించడానికి ఉత్తమ మార్గం.. ధూమపానాన్ని ఆపదని ప్రొఫెసర్ మరియం చెప్పారు. అమెరికన్ కేన్సర్ సొసైటీ ప్రకారం.. ఊపిరితిత్తుల్లో కణాలు అదుపుతప్పి అడ్డుఅదుపు లేకుండా పెరిగినప్పుడు కేన్సర్‌కు దారితీస్తుంది. ఈ పెరుగుదల మెటాస్టాసిస్ అనే ప్రక్రియ ద్వారా కేవలం ఊపిరితిత్తులతోనే ఆగిపోకుండా చుట్టూ ఉన్న అవయువాలకు కూడా వ్యాపించే అవకాశం ఉంది. ప్రపంచవ్యాప్తంగా పెద్ద సంఖ్యలో మరణాలకు కారణమయ్యే వ్యాధుల్లో ఊపిరితిత్తుల కేన్సర్ ఒకటి.