వైసీపీ నుంచి వచ్చినవాళ్లకు టికెట్లా బాబుగారూ.. ప్రెస్‌మీట్‌లోనే ఏడ్చేసిన మాజీ ఎమ్మెల్యే

ఎన్నికలు దగ్గరపడుతున్న కొద్దీ ఏపీ రాజకీయాలు మారిపోతున్నాయి. ఒక పార్టీలో టికెట్ దక్కని నేతలు అవతలి పార్టీలోకి గోడ దూకి టికెట్ తెచ్చుకుంటున్నారు. దీంతో అప్పటి వరకూ తమకే టికెట్అని ధీమా ఉన్న అవతలి పార్టీ నేతలు దిక్కుతోచని స్థితిలో పడిపోతున్నారు. ఏం చేయాలో పాలుపోని స్థితిలో ఇంకో పార్టీలోకి మారడమో, లేదా ఇండిపెండెంట్‌గా పోటీ చేయడమో చేస్తున్నారు. ఈ రెండూ వీలుకాని పరిస్థితిలో భావోద్వేగంతో కన్నీళ్లు పెట్టుకుంటున్నారు. తిరుపతి మాజీ ఎమ్మెల్యే, టీడీపీ మహిళా నేత సుగుణమ్మ పరిస్థితి అలాగే ఉంది. తిరుపతి సీటును జనసేన పార్టీకి కేటాయించడంతో సుగుణమ్మ కన్నీళ్లు పెట్టుకున్నారు. అందులోనూ వైసీపీ నుంచి వచ్చిన వ్యక్తికి జనసేన పార్టీ టికెట్ కేటాయించడంతో ఏకంగా ప్రెస్‌మీట్లోనే సుగుణమ్మ భోరున ఏడ్చేశారు. అధినేత చంద్రబాబు తిరుపతి సీటును జనసేనకు ఇచ్చే విషయంలో పునరాలోచించుకోవాలని సుగుణమ్మ కోరుతున్నారు.

సోమవారం తిరుపతిలో విలేకర్ల సమావేశం నిర్వహించిన మాజీ ఎమ్మెల్యే సుగుణమ్మ.. తిరుపతి అసెంబ్లీ స్థానాన్ని జనసేనకు కేటాయించడంపై అధినేత చంద్రబాబు మరోసారి ఆలోచించాలని కోరారు. పార్టీ కోసం అహర్నిశలు పనిచేశానన్న సుగుణమ్మ.. సీటు విషయమై చంద్రబాబు చేసిన సర్వేలు ఏమయ్యాయని ప్రశ్నించారు. ఎక్కడి నుంచో వచ్చినవారికి సపోర్ట్ చేయమంటే.. తాను అంగీకరించినప్పటికీ పార్టీ క్యాడర్ ఒప్పుకోవటం లేదని అన్నారు. అధికార వైసీపీపై నిత్యం పోరాటాలు చేస్తూ వచ్చామన్న సుగుణమ్మ.. ఆ పార్టీ నుంచి వచ్చిన వ్యక్తికి టికెట్ఇస్తే పార్టీ క్యాడర్ ఒప్పకోవటం లేదని చెప్పారు. ఈ సందర్బంగానే భోరున విలపించిన సుగుణమ్మ.. తిరుపతి అభివృద్ధికి తమ కుటుంబం చేసిన సేవలను గుర్తుచేశారు. తిరుపతి టికెట్ విషయమై చంద్రబాబు మరోసారి ఆలోచిస్తారని నమ్ముతున్నానన్న ఆమె.. ఇండిపెండెంట్‌గా నిలబడే ఆలోచన తనకు లేదని చెప్పారు.

ఇక అసలు విషయానికి వస్తే చిత్తూరు నుంచి వైసీపీ తరుఫున ఎమ్మెల్యేగా గెలిచిన ఆరణి శ్రీనివాసులు.. ఇటీవల వైసీపీకి గుడ్ బై చెప్పి జనసేనలో చేరిపోయారు. చిత్తూరు టికెట్ వైసీపీ వేరే వ్యక్తికి కేటాయించటంతో శ్రీనివాసులు.. పవన్ కళ్యాణ్‌ను కలిసి ఆ పార్టీలో చేరారు. ఈ క్రమంలోనే ఆరణి శ్రీనివాసులకు తిరుపతి టికెట్ ఇచ్చింది జనసేన అధిష్టానం. పొత్తులో భాగంగా తిరుపతి సీటు జనసేనకు రాగా.. ఆ పార్టీ తరుఫున ఆరణి శ్రీనివాసులు పోటీ చేస్తున్నారు. అయితే తిరుపతి సీటును టీడీపీ నుంచి మాజీ ఎమ్మెల్యే సుగుణమ్మ ఆశించారు. అవసరమైతే జనసేనలో చేరి అక్కడి నుంచి పోటీ చేయాలని భావించారు. కానీ కాపు సామాజికవర్గం నేత అయిన శ్రీనివాసులకు జనసేన టికెట్ ఇచ్చింది. తిరుపతిలోని కాపు సామాజిక వర్గ ఓటర్ల లక్ష్యంగా ఆయనకు టికెట్ కేటాయించింది.

అయితే శ్రీనివాసులకు టికెట్ ఇవ్వటంపై టీడీపీతో పాటు జనసేనలోని మరో వర్గం అసంతృప్తి వ్యక్తం చేస్తోంది. మొన్నటి దాకా వైసీపీలో ఉన్న వ్యక్తికి టికెట్ ఇవ్వటం ఏమిటని ప్రశ్నిస్తున్నారు. వేరేవారికి టికెట్ ఇవ్వాలని కోరుతున్నారు. ఈ నేపథ్యంలో వీరందరినీ కలుపుకుని శ్రీనివాసులు ఎలా ముందుకు వెళ్తారనేదీ ఆసక్తికరంగా మారింది.