మోదీ.. మోదీ అంటూ అరిచేవాళ్లను చెప్పుతో కొట్టండి.. మంత్రి వివాదాస్పద వ్యాఖ్యలు

మోదీ.. మోదీ..’ అంటూ నినాదాలను చేసేవాళ్లను చెప్పుతో కొట్టాలని కర్ణాటక మంత్రి నోరుజారారు. కర్ణాటక మంత్రి శివరాజ్ తంగడిగి చేసిన వ్యాఖ్యలపై తీవ్ర దుమారం రేగుతోంది. కొప్పాల్ జిల్లా కరటగిలో సోమవారం నిర్వహించిన కాంగ్రెస్ పార్టీ ఎన్నికల ర్యాలీలో మంత్రి శివరాజ్ పాల్గొన్నారు. ఈ సందర్భంగా ఆయన మాట్లాడుతూ... బీజేపీ నేతృత్వంలోని కేంద్ర ప్రభుత్వం ఏడాదికి రెండు కోట్ల ఉద్యోగాలు కల్పిస్తామన్న హామీని నిలబెట్టుకోలేదని విమర్శించారు. అభివృద్ధిని విస్మరించిన బీజేపీ.. వచ్చే లోక్‌సభ ఎన్నికల్లో ఓట్లు అడిగేందుకు సిగ్గుపడాలని తీవ్రస్థాయిలో విరుచుకుపడ్డారు. మోదీ.. మోదీ.. అంటూ అరిచే యువకులను చెప్పుతో కొట్టాలని వ్యాఖ్యానించారు.

‘సిగ్గుపడాలి. ఏ ముఖం పెట్టుకుని ఓట్లు అడగడానికి బీజేపీ నేతలు వస్తున్నారు.. ఒక్క అభివృద్ధి పని చేయలేని అసమర్థులు మీరు.. రెండు కోట్ల ఉద్యోగాలు ఇస్తానని ప్రధాని మోదీ హామీ ఇచ్చారు.. ఎవరికైనా ఉద్యోగాలు ఇచ్చారా?.. ఉద్యోగాలు గురించి యువతి అడిగితే పరోఠాలు, పకోడీలు అమ్ముకోండని చెబున్నారు. ఇదేనా అభివృద్ధి.. ఎవరైనా యువకులు లేదా విద్యార్తులు మోదీ.. మోదీ అని నినదించే వాళ్లను చెప్పుతో కొట్టాలి’ అని మంత్రి తంగడిగి మండిపడ్డారు. మంత్రి వ్యాఖ్యలు సంచలనంగా మారాయి.

ఈ వ్యాఖ్యలపై బీజేపీ నాయకులు తీవ్ర ఆగ్రహం వ్యక్తం చేస్తున్నారు. సీనియర్ నేత రవి మాట్లాడుతూ.. ఈ లోక్‌సభ ఎన్నికల్లో కాంగ్రెస్ ఘోరంగా ఓడిపోతోందని, ఆ విషయాన్ని జీర్ణించుకోలేక ఇలాంటి మాటలు మాట్లాడుతోందని దుయ్యబట్టారు. ప్రధానిగా రాహుల్ గాంధీని తిరస్కరించిన యువ భారత్.. మళ్లీ నరేంద్ర మోదీనే ప్రధాని కావాలని కోరుకుంటోందని ఆయన స్పష్టం చేశారు.

ఇప్పటి వరకూ యువతతో పెట్టుకున్న రాజకీయ పార్టీ ఏదీ మనుగడ సాగించిన దాఖలాలు లేవని మరో బీజేపీ నేత అమిత్ మాలవీయ ఎక్స్‌లో పేర్కొన్నారు. ‘కర్ణాటక సాంస్కృతిక శాఖ మంత్రి శివరాజ్ తంగడిగి.. ప్రధాని మోదీకి అనుకూలంగా నినాదాలను చేసేవాళ్లను చెప్పుతో కొట్టాలి అంటున్నారు.. కానీ, యువ భారత్ రాహుల్ గాంధీని ప్రధానిగా తిరస్కరించి.. మళ్లీ మళ్లీ మోదీనే కావాలని కోరుకుంటోంది...యువతను టార్గెట్ చేసిన ఏ రాజకీయ పార్టీ కూడా మనుగడ సాగించలేదు. యువత మన సమిష్టి ఆకాంక్షను కలిగి ఉంటారు.. మన దేశం విధిని రూపొందించే బాధ్యతను అప్పగించారు ’ అని మండిపడ్డారు.  మరోవైపు, కర్ణాటక మంత్రి వ్యాఖ్యలపై ఎన్నికల కమిషన్‌కు బీజేపీ ఫిర్యాదు చేసింది. ఎన్నికల కోడ్‌ను ఉల్లంఘించారని, ప్రచారంలో పాల్గొనకుండా ఆయనపై నిషేధం విధించాలని కోరింది.