నామినేషన్ వేళ ఎదురుపడ్డ తమిళిసై ప్రత్యర్థి.. ఆప్యాయంగా పలకరించి, ఆలింగనం!

తెలంగాణ మాజీ గవర్నర్ తమిళిసై సౌందరరాజన్.. తన సొంత రాష్ట్రం తమిళనాడు నుంచి లోక్‌సభ ఎన్నికల్లో పోటీ చేస్తున్నారు. ఆమెకు చెన్నై సౌత్ టిక్కెట్‌ను బీజేపీ కేటాయించింది. తమిళనాడులోని మొత్తం 39 పార్లమెంట్ స్థానాలకు ఏప్రిల్ 19న తొలి దశలోనే పోలింగ్ జరగనుంది. ఈ నేపథ్యంలో తమిళనాడు నామినేషన్ల ప్రక్రియ ఊపందుకుంది. మార్చి 20న నోటిఫికేషన్ విడుదల కాగా.. ఆ రోజు నుంచే నామినేషన్లు మొదలయ్యాయి. అయితే, సోమవారం మంచి ముహూర్తం కావడం, హోలీ పండగ కూడా కలిసి రావడంతో పలువురు ప్రధాన పార్టీల అభ్యర్థులు నామినేషన్ పత్రాలు దాఖలు చేశారు.

కాగా, దక్షిణ చెన్నై లోక్‌సభ నియోజకవర్గంలో ప్రధాన ప్రత్యర్థులుగా బరిలో ఉన్న అభ్యర్థులు డీఎంకే నేత తమిళచ్చి తంగపాండియన్‌, బీజేపీ నాయకురాలు తమిళిసై సౌందరరాజన్‌ సోమవారమే నామినేషన్ వేశారు. అయితే, ఇద్దరూ ఒకే సమయానికి అడయారులోని కార్పొరేషన్‌ జోనల్‌ కార్యాలయానికి రావడంతో ఆసక్తికర సన్నివేశం చోటుచేసుకుంది. ఎదురుపడిన ప్రత్యర్థులు ఒకరినొకరు ఆప్యాయంగా పలుకరించుకుని, కుశల ప్రశ్నలు వేసుకున్నారు. తమిళిసై సౌందరరాజన్‌, తమిళచ్చి తంగపాండియన్‌, అన్నాడీఎంకే అభ్యర్థి జయవర్ధన్‌ తదితరులు నామపత్రాలు సమర్పించారు.

అనంతరం బయటకొచ్చిన తమిళచ్చి తంగపాండియన్‌కు అక్కడే విలేకర్ల కోసం నిరీక్షిస్తోన్న తమిళిసై సౌందరరాజన్‌ ఎదురుపడ్డారు. ఒకరినొకరు చూసుకుని చిరునవ్వులు చిందించారు. ఇద్దరూ ఆలింగనం చేసుకున్నారు. అంతకాదు, ఎన్నికల్లో పోటీ చేస్తున్నందుకు ఇరువురూ శుభాకాంక్షలు చెప్పుకొన్నారు. దీంతో అక్కడ ఉన్న ఇరు వర్గాలతో పాటు ఇతర రాజకీయ పార్టీల నేతలు విస్మయానికి గురయ్యారు. అయితే, సోషల్ మీడియాలో నెటిజన్లు ప్రశంసలు కురిపిస్తున్నారు. రాజకీయ నాగరికతతో వ్యవహరించారని, చాలా మందికి ఆదర్శంగా నిలిచారని కొనియాడుతున్నారు.

తొలి విడత నామపత్రాల సమర్పణ 27న ముగియనుండగా 28న పరిశీలించనున్నారు. ఉపసంహరణకు 30 చివరితేదీ. మొత్తం 543 పార్లమెంట్ స్థానాలకు ఏడు దశల్లో ఎన్నికలు నిర్వహిస్తుండగా.. తొలి విడతలో 21 రాష్ట్రాలు, కేంద్ర పాలిత ప్రాంతాల్లోని 102 నియోజకవర్గాలకు పోలింగ్ జరగనుంది.