డిసెంబర్‌లో రిటైర్డ్ ఉద్యోగి మృతి.. సంచలనం వెలుగులోకి, డాక్టర్ ఎంత పనిచేశాడు

ఏలూరులో దారుణం జరిగింది. ఓ డాక్టర్ ఒక రిటైర్డ్‌ పోస్టల్‌ ఉద్యోగికి మత్తు ఇంజెక్షన్‌ ఇచ్చి చోరీకి ప్లాన్ చేశాడు.. కానీ సీన్ రివర్స్ కావడంతో కొంతకాలానికి అడ్డంగా దొరికిపోయాడు. పోస్టల్‌శాఖ రిటైర్డ్ ఉద్యోగి బత్తిన మల్లేశ్వరరావు (63) ఏలూరు రూరల్‌ మం డలం చొదిమెళ్ళలో సొంత నివాసంలో ఉంటున్నారు. తన మేడ మొదటి అంతస్తులో తన కుమారుడు సోమేశ్వరరావు కుటుంబం నివాసం ఉంటున్నారు. మల్లేశ్వరరావు ఒక్కరే కింద నివాసం ఉంటున్నారు.. ఆయన ఏలూరులోని చైత్ర ఆసుపత్రిలో అనారోగ్య సమస్యలకు సంబంధించి ట్రీట్మెంట్ తీసుకునేవారు.

అక్కడ జూనియర్‌ డాక్టర్‌గా ఉన్న చొదిమెళ్ళ ప్రాంతానికి చెందిన డాక్టర్‌ కొవ్వూరి భానుసుందర్‌ వారికి పరిచయమయ్యాడు. ఏదైనా ఇబ్బంది అనిపిస్తే తానే ఇంటికి వస్తానని చెప్పాడు. తరచుగా వస్తూ ఇంజక్షన్లు చేస్తూ ఉండేవాడు.. మల్లేశ్వరరావు ఒంటరిగా ఉండటాన్ని భాను గమనించారు. ఆయన దగ్గర బంగారం, డబ్బులు ఉండడాన్ని గమనించాడు. చివరకు డాక్టర్‌ గతేడాది డిసెంబరు 24వ తేదీన మల్లేశ్వరరావు ఇంటికి వచ్చి ఇంజక్షన్‌ చేయడంతో అపస్మారక స్థితిలోకి వెళ్లిపోయాడు. వెంటనే బంగారు వస్తువులు, కొంత డబ్బుల్ని ఎత్తుకెళ్లాడు. మల్లేశ్వరరావుది సహజ మరణమేనని భావించి కుమారుడు బత్తిన సోమశేఖర్‌, బంధువులు కలిసి అంత్యక్రియలు నిర్వహించారు.

ఆ తరువాత ఆ వైద్యుడిపై ఏలూరు త్రీటౌన్‌ పోలీస్‌ స్టేషన్‌లో మూడు కేసు నమోదు కాగా.. ఏలూరు వన్‌టౌన్‌లో ఒక కేసు నమోదైంది. అతడు నమ్మకంతో వైద్యం చేస్తానని ఇళ్లకు వచ్చి మత్తు ఇంజక్షన్‌ ఇచ్చి ఆపై ఇంట్లో విలువైన ఆభరణాలు, నగదు అపహరించుకుపోతూ ఉంటాడని ఫిర్యాదులో నమోదయ్యాయి. ఇంతలో ఆ వైద్యుడిపై అనుమానం రావడంతో మల్లేశ్వరరావు కుమారుడు సోమశేఖర్‌ అతడిని ప్రశ్నించడానికి ప్రయత్నించగా అప్పటినుంచి పరారీలో ఉన్నాడు.

ఇంతలో అతడి తల్లి దండ్రులు రాజీకి రావడంతో అతడే తన తండ్రిని ఇంజక్షన్‌ చేసి హత్య చేశా డని ప్రాథమికంగా నిర్ధారణ చేసుకున్నారు. ఏలూరు రూరల్‌ పోలీసులకు బత్తిన సోమశేఖర్‌ ఫిర్యాదు చేయడంతో రూరల్‌ పోలీసులు కేసు నమోదు చేశారు. డాక్టర్‌ కొవ్వూరి భానుసుందర్‌పై హత్యా కేసు, దొంగతనం కేసు నమోదు చేసి దర్యాప్తు చేపట్టారు. పరారీలో ఉన్న డాక్టర్‌ భానుసుందర్‌ కోసం ప్రత్యేక బృందాలను రంగంలోకి దించారు. డాక్టర్ భానుసుందర్ నమ్మకంగా మల్లేశ్వరరావు ఇంటికి వెళ్లి ఈ చోరీకి పాల్పడ్డాడు. అయితే మత్తు ఇంజెక్షన్ ఓవర్ డోస్ కారణంగానే ఆయన చనిపోయినట్లు అనుమానాలు వ్యక్తమవుతున్నాయి. పోలీసులు ఈ కేసుల్నలి సీరియస్‌గా తీసుకుని దర్యాప్తును ముమ్మరం చేశారు. ఈ ఘటన ఏలూరులో చర్చనీయాంశంగా మారింది. అతడిపై నమోదైన మిగిలిన కేసులకు సంబంధించిన వివరాలు తెలియాల్సి ఉంది.