అర్ధరాత్రి శబ్దాలు.. తీరా చూస్తే ఊరి చివర వింత ఆకారం.. అసలు ఏంటది

టెక్నాలజీ పరంగా ప్రపంచం ఎంత ముందుకు దూసుకెళ్తున్నా.. ఓ విషయంలో మాత్రం మనిషి అక్కడే ఆగిపోయాడు. కరోనా వైరస్ లాంటి భయంకరమైన మహమ్మారులకు సైతం మందు కనుకున్న మనిషి.. ఈ విషయానికి మాత్రం మందు కనిపెట్టలేకున్నాడు. అదే భయం. ఆ భయమే ఆ ఊరిజనాన్ని వణికిస్తోంది. చక్కగా పనులు చేసుకుంటూ సంతోషంగా బతుకుతున్న ఆ ఊరిజనాన్ని.. ఓ బొమ్మ, ఓ వికృత ఆకారం భయపెడుతోంది.

చిత్తూరు జిల్లా ఎస్ఆర్ పురం మండలంలోని ఓ ప్రజలు భయంతో వణికిపోతున్నారు. ఊరి బయట చూసిన ఓ విచిత్ర ఆకారంలో ఉన్న బొమ్మ వారిని భయపెడుతోంది. అది చూసిన క్షణం నుంచి ఊరి జనం ఆందోళనకు గురౌతున్నారు. ఏంటా బొమ్మ, ఎవరిదా పని అంటూ కంగారుపడిపోతున్నారు. ఇక అసలు సంగతిలోకి వస్తే.. ఎస్ఆర్ పురం మండలం మర్రిపల్లి వాసులను ఓ భయం వెంటాడుతోంది. మర్రిపల్లి స్మశానవాటికలో గుర్తుతెలియని వ్యక్తులు కొంతమంది ఓ బొమ్మను వేసి, దాని చుట్టూ నిమ్మకాయలు ఉంచి పసుపు, కుంకుమ జల్లి పూజలు చేశారు.

అయితే ఉపాధిహామీ పనుల కోసం వెళ్తున్న ఊరిలోని కొంతమంది.. ఈ క్షుద్రపూజల తతంగాన్ని గమనించారు. అప్పటి నుంచి వారిలో భయం ఆవహించింది. ఎవరో క్షుద్రపూజలు చేశారని.. తమకేదో కీడు జరుగుతుందంటూ భయపడిపోతున్నారు. వెంటనే ఊరిపెద్దలు ఈ విషయాన్ని పోలీసుల దృష్టికి తీసుకెళ్లారు. ఊరికి సమీపంలోనే ఈ శ్మశాన వాటిక ఉంది. అయితే ఇక్కడ గతంలోనూ ఇలాంటి పూజలు జరిగాయని.. స్థానికులు చెప్తున్నారు. పోలీసుల దృష్టికి తీసుకెళ్లినా కూడా ప్రయోజనం లేదంటున్నారు. ఎక్కడి నుంచో వచ్చి ఇక్కడ పూజలు చేస్తున్నారని.. పోలీసుల నిఘా వైఫల్యమే ఇందుకు కారణమని ఆరోపిస్తున్నారు.