జమ్మూ కశ్మీర్ హాస్పిటల్‌లో గ్యాంగస్టర్లు కాల్పులు.. పోలీస్ అధికారి మృతి

మెడికల్ కాలేజీ ప్రాంగణంలో గ్యాంగస్టర్లతో జరిగిన ఎదురుకాల్పుల్లో ఓ పోలీస్ అధికారి ప్రాణాలు కోల్పోయారు. ఈ ఘటనలో ఓ నేరస్థుడ్ని పోలీసులు మట్టుబెట్టారు. జమ్మూ కశ్మీర్‌లోని కథువా ప్రభుత్వ మెడికల్ కాలేజీ ఆస్పత్రి ప్రాంగణంలో మంగళవారం రాత్రి ఎన్‌కౌంటర్ చోటుచేసుకుంది. గ్యాంగస్టర్‌ జరిపిన కాల్పుల్లో సబ్-ఇన్‌స్పెక్టర్ దీపక్ శర్మ తీవ్రంగా గాయపడ్డారు. ఆస్పత్రిలో చికిత్స పొందుతూ బుధవారం ఉదయం శర్మ మృతిచెందినట్టు పోలీసులు తెలిపారు. అలాగే, మరో పోలీస్ అధికారి సైతం ఈ ఘటనలో గాయపడినట్టు చెప్పారు.

మీడియా కథనాల ప్రకారం.. వాసుదేవ్ నేతృత్వంలోని షునూ గ్రూప్ అని పిలువబడే ముఠా సభ్యులను పోలీసు బృందం వెంబడించింది. దీంతో గ్యాంగ్‌స్టర్లు తమ కారును మెడికల్ కాలేజీ క్యాంపస్‌లోకి పోనిచ్చారు. అక్కడ పోలీసులు వారిని అడ్డుకోవడంతో కాల్పులు జరిపారు. దీంతో అప్రమత్తమైన పోలీసులు ఎదురుకాల్పులు జరపడంతో ఎన్‌కౌంటర్‌కు దారితీసింది. ముఠా కాల్పుల్లో ఎస్ఐ దీపక్ శర్మ తలలోకి తూటా దూసుకెళ్లింది. అతడికి కథువాలో ప్రాథమిక చికిత్స చేసి.. మెరుగైన వైద్యం కోసం పంజాబ్‌లోని పఠాన్‌కోట్‌కు తరలించారు. బుధవారం ఉదయం శర్మ కన్నుమూసినట్టు అధికారులు తెలిపారు.

అమరుడైన పోలీస్ అధికారికి జమ్మూ కశ్మీర్ లెఫ్టినెంట్ గవర్నర్ మనోజ్ సిన్హా నివాళి అర్పించారు. ‘కథువాలో మోస్ట్ వాంటెడ్ గ్యాంగ్‌స్టర్‌తో ధైర్యంగా పోరాడి అమరుడడైన పిఎస్‌ఐ దీపక్ శర్మ శౌర్యం, అలుపెరగని ధైర్యానికి నేను సెల్యూట్ చేస్తున్నాను. అతని అత్యున్నత త్యాగం మా హృదయాలలో నిలిచిపోతుంది. అమరవీరుడు దీపక్ శర్మ కుటుంబానికి ప్రగాఢ సానుభూతి’ అని ఎక్స్‌లో పోస్ట్ చేశారు. అధికారి ఒంటి నుంచి పడిన ప్రతిరక్తపు బొట్టుకు ప్రతీకారం తీర్చుకుంటామని గవర్నర్ శపథం చేశారు.

‘అమరవీరుడి కుటుంబానికి, జమ్మూ కశ్మీర్ పోలీసులకు దేశం సంఘీభావంగా నిలుస్తుంది. వీరి అంకితభావం, స్థిమితం, వివిధ సవాళ్లు, శత్రువులతో పోరాడటంలో ధైర్యం మాకు స్ఫూర్తినిస్తూనే ఉంది.. మా అమరవీరుడి ప్రతి రక్తపు బొట్టుకు ప్రతీకారం తీర్చుకుంటాం.. భయంలేని జమ్మూ కశ్మీర్‌ను సృష్టించడానికి మేము కట్టుబడి ఉన్నాం’ అని ఉద్ఘాటించారు.