సమోసాలో ప్రత్యక్షమైన కండోమ్‌లు, గుట్కా, రాళ్లు.. అవి తిన్న వారికి ఏం అయిందంటే

సమోసాలు అంటే చాలా మంది ఇష్టంగా తింటారు. సాయంత్రం వేళ తినే స్నాక్స్‌లో సమోసాలు తప్పనిసరిగా ఉండాలి. అయితే ఇలా ఇష్టంగా తినే సమోసాల్లో కొందరు దుండగులు.. రకరకాల వస్తువులు కలిపి తయారు చేశారు. అయితే సమోసాలను తింటుండగా.. అందులో నుంచి కండోమ్‌లు, గుట్కాలు రావడంతో వారు ఒక్కసారిగా అవాక్కయ్యారు. అయితే ఓ ఆటోమొబైల్ కంపెనీ క్యాంటీన్‌లో ఈ నిర్వాకం చోటు చేసుకుంది. ఆ కంపెనీకి సమోసాలు సరఫరా చేసే ఓ కంపెనీలోని పలువురు ఉద్యోగులు కావాలనే ఇలా చేసినట్లు గుర్తించారు. దీంతో మొత్తం ఐదుగురు వ్యక్తులపై కేసు నమోదు చేసి అరెస్ట్ చేశారు. ఇక ఆ సమోసాలు తిన్న ఉద్యోగులు అస్వస్థతకు గురి కావడం తీవ్ర ఆందోళన కలిగిస్తోంది. ఈ సంఘటన మహారాష్ట్రలో చోటుచేసుకుంది.

పుణెలోని ఓ ఆటోమొబైల్ కంపెనీ క్యాంటిన్‌కు.. వేరే ఒక కంపెనీ నుంచి సమోసాలు సరఫరా అవుతాయి. ఎప్పటిలాగే ఇటీవల కూడా సమోసాలు వచ్చాయి. వాటిని ఆటోమొబైల్ కంపెనీ ఉద్యోగులు తిన్నారు. అలా తింటుండగా.. ఆ సమోసాల నుంచి కండోమ్‌లు, గుట్కా ప్యాకెట్లు, రాళ్లు వారికి దర్శనమిచ్చాయి. అవి చూసిన ఉద్యోగులు ఖంగుతిన్నారు. అనంతరం వారు అస్వస్థతకు గురి కాగా వాంతులు కూడా చేసుకున్నారు. దీంతో ఆ ఆటోమొబైల్ కంపెనీ యాజమాన్యం సదరు సమోసా సప్లై కంపెనీపై కేసు నమోదు చేసింది. రంగంలోకి దిగిన పోలీసులు సమోసా కంపెనీకి వెళ్లి విచారణ జరపగా.. సంచలన విషయాలు వెలుగులోకి వచ్చాయి.

ఆ సమోసా కంపెనీ మాజీ ఉద్యోగులే ఈ కుట్రకు పాల్పడినట్లు పోలీసుల విచారణలో తేలింది. తమను ఉద్యోగాల నుంచి కంపెనీ తొలగించిందన్న కారణంతో.. ఆ కంపెనీకి చెడ్డపేరు తీసుకురావడానికే ఈ పని చేసినట్లు గుర్తించారు. గతంలో సమోసా క్యాటరింగ్ కంపెనీ తయారు చేసిన సమోసాల్లో ఒక బ్యాండేజ్ కనిపించింది. దీంతో ఆ ఘటనను చాలా సీరియస్‌గా తీసుకున్న క్యాటరింగ్ కంపెనీ ముగ్గురు ఉద్యోగులను విధుల నుంచి తొలగించింది. దీంతో ఆ కంపెనీపై కోపం పెంచుకున్న ఆ ముగ్గురు ఉద్యోగులు.. ఆ కంపెనీలో పనిచేసే మరో ఇద్దరు వ్యక్తులతో కలిసి పక్కాగా ప్లాన్ చేసి మరీ సమోసాలలో కండోమ్‌లు, గుట్కా ప్యాకెట్లు, రాళ్లు నింపి తయారు చేయించారు.

దీంతో ముగ్గురు మాజీ ఉద్యోగులతోపాటు వారి చెప్పినట్లు విని సమోసాల్లో నానా చెత్త నింపిన మరో ఇద్దరు ఉద్యోగులు ఫిరోజ్ షేక్, విక్కీ షేక్‌లను పోలీసులు అరెస్ట్ చేసి విచారణ జరుపుతున్నారు. ఆ సమోసాలు తిని అస్వస్థతకు గురైన ఆటోమొబైల్ కంపెనీ ఉద్యోగులను యాజమాన్యం ఆస్పత్రికి తరలించి చికిత్స అందించింది. వారి పరిస్థితి ప్రస్తుతం సాధారణంగా ఉన్నట్లేనని చెప్పడంతో అంతా ఊపిరి పీల్చుకున్నారు. ఇలా తినే వస్తువుల్లో అలాంటి వస్తువులు పెట్టడం ఏంటి అని సోషల్ మీడియాలో తెగ విమర్శలు వెల్లువెత్తుతున్నాయి.