దేశవ్యాప్తంగా భానుడి భగభగలు.. మరో 20 రోజులు ఇదే పరిస్థితి

ఈ ఏడాది వేసవి మామాలుగా లేదు. మార్చి మొదటి వారం నుంచే ఎండలు మండిపోతున్నాయి. ఉదయం 9 గంటల నుంచే భానుడి నిప్పులు కురిపిస్తున్నాడు. దీంతో వృద్ధులు, చిన్నారులు తీవ్ర ఇబ్బందులకు గురవుతున్నారు. దేశంలోని చాలా ప్రాంతాల్లో ఇదే పరిస్థితి నెలకుంది. శనివారం అనేకచోట్ల గరిష్ఠ ఉష్ణోగ్రతలు 40 నుంచి 46 డిగ్రీల సెల్సియస్‌ మధ్య నమోదయ్యాయి. ఛత్తీస్‌గఢ్‌, ఝార్ఖండ్‌, ఒడిశాతోపాటు పశ్చిమ బెంగాల్‌లోని కొన్ని ప్రాంతాల్లో మోస్తరు నుంచి తీవ్రస్థాయి ఉష్ణోగ్రత పరిస్థితులు నెలకున్నట్టు భారత వాతావరణ విభాగం పేర్కొంది. దేశంలో ఈ నెలలో ఇలాంటి పరిస్థితులు రావడం ఇది రెండోసారి.

తొలి దశలో తెలంగాణ, ఆంధ్రప్రదేశ్‌, తమిళనాడు, గుజరాత్‌లోని కొన్ని ప్రాంతాల్లో వేసవి తాపం తీవ్రమైంది. పసిఫిక్ మహాసముద్రంలో ఎల్‌నినో పరిస్థితులు బలహీనపడుతున్నప్పటికీ.. ఏప్రిల్‌-జూన్‌ మధ్య ఉష్ణోగ్రతలు పెరగొచ్చని ఐఎండీ ఇప్పటికే హెచ్చరించిన విషయం తెలిసిందే. సాధారణంగా ఏప్రిల్‌లో వేడి గాలులు రెండు మూడు రోజులు ఉంటాయి. కానీ, ఈసారి మరో 10-20 రోజుల పాటు ఇలాంటి పరిస్థితి ఉండొచ్చని పేర్కొంది. అయితే, ఆంధ్రప్రదేశ్‌, ఒడిశా, మహారాష్ట్ర, గుజరాత్, మధ్యప్రదేశ్, బిహార్, ఝార్ఖండ్ సహా పలు రాష్ట్రాల్లో అది 20 రోజుల కన్నా ఎక్కువగా కొనసాగొచ్చని అంచనా వేసింది. శనివారం ఒడిశాలోని బరిపడ, బౌధ్‌లో 45.2 డిగ్రీలు, పశ్చిమ్ బెంగాల్‌లోని మేదినీపూర్, బంకురలో 44.6 డిగ్రీలు ఉష్ణోగ్రతలు నమోదయ్యాయి.

ఝార్ఖండ్‌లోని జంషెడ్‌పూర్, దౌల్తాగంజ్, ఛత్తీస్‌గఢ్‌లోని రాజనందగావ్‌లో 43 నుంచి 43.6 డిగ్రీల ఉష్ణోగ్రతలు నమోదయ్యాయి. గరిష్ట ఉష్ణోగ్రత మైదాన ప్రాంతాల్లో కనీసం 40 డిగ్రీల సెల్సియస్‌కు, తీర ప్రాంతాల్లో 37 డిగ్రీలు, కొండ ప్రాంతాలలో 30 డిగ్రీలకు చేరుకున్నప్పుడు వడగాల్పులు వీస్తాయి. సాధారణం కంటే కనీసం 4.5 డిగ్రీలకు చేరితే మోస్తరు.. 6.4 డిగ్రీలు దాటితే తీవ్రమైన వడగాల్పులు వీస్తాయని ఐఎండీ పేర్కొంది.

ఎల్ నినో కారణంగా మధ్య పసిఫిక్ మహాసముద్రంలో ఉపరితల జలాల ఆవర్తన వేడెక్కి దేశంలో రుతుపవనాలు బలహీనపడటం, పొడి పరిస్థితులతో సంబంధం కలిగి ఉంటాయి. లా నినా పరిస్థితులు ఎల్ నినోకు వ్యతిరేకంగా ఉంటుంది. వర్షాకాలంలో సమృద్ధిగా వర్షాలు కురుస్తాయి. ఈ ఏడాది రుతుపవనాల సీజన్‌లో సాధారణం కంటే ఎక్కువ వర్షపాతం నమోదవుతుందని, లా నినా ఏర్పడటంతో ఆగస్టు-సెప్టెంబర్ నాటికి వర్షాలు పుష్కలంగా కురుస్తాయని ఐఎండీ ఇటీవల వెల్లడించింది. వ్యవసాయ రంగానికి రుతుపవనాలే ఆధారం. నికర సాగు విస్తీర్ణంలో 52 శాతం దానిపై ఆధారపడి ఉంది. దేశవ్యాప్తంగా విద్యుదుత్పత్తి మాత్రమే కాకుండా తాగునీటికి కీలకమైన రిజర్వాయర్ల నిండేందుకు ఇది చాలా కీలకం.