తీహార్ జైలుకు బాంబు బెదిరింపు.. జైలులోనే కల్వకుంట్ల కవిత, మనీష్ సిసోడియా సహా కీలక నేతలు

ఎన్నికల వేళ బాంబు బెదిరింపులు రోజురోజుకూ ఎక్కువవుతున్నాయి. స్కూళ్లు, హాస్పిటల్స్‌లకు ఇప్పటివరకు బాంబు బెదిరింపులు పంపించిన ఆగంతకులు.. తాజాగా ఏకంగా తీహార్ జైలుకే బాంబు హెచ్చరికలు చేయడం తీవ్ర కలకలం రేపుతోంది. దేశంలో ప్రస్తుతం సార్వత్రిక ఎన్నికలు జరుగుతున్న నేపథ్యంలో వరుసగా బాంబు బెదిరింపులు రావడం సంచలనంగా మారింది. దేశంలోనే ప్రముఖ రాజకీయ నాయకులు, హై ప్రొఫైల్ కలిగిన వ్యక్తులు, కరుడుగట్టిన నిందితులు ఉన్న తీహార్ జైలుకు తాజాగా బాంబు హెచ్చరికల మెయిల్ రావడంతో అధికారులు అలర్ట్ అయ్యారు. రంగంలోకి దిగి చర్యలు చేపట్టారు.

మంగళవారం ఢిల్లీలోని తీహార్ జైలుకు బాంబు బెదిరింపులకు సంబంధించిన ఈ మెయిల్ వచ్చింది. ఇదే ఈ మెయిల్ దేశంలోనే ప్రముఖమైన ఢిల్లీలోని ఇందిరాగాంధీ ఇంటర్నేషనల్ ఎయిర్‌పోర్ట్‌కు కూడా పంపించారు. అంతేకాకుండా కొన్ని పాఠశాలలు, ఆస్పత్రుల్లో కూడా బాంబులు పెట్టినట్లు ఆ మెయిల్‌లో పేర్కొన్నట్లు అధికార వర్గాలు తెలిపాయి. ఈ బెదిరింపు మెయిల్ పట్ల తీహార్ జైలు అధికారులు ఢిల్లీ పోలీసులకు సమాచారం అందించి అలర్ట్ చేశారు. దీంతో రంగంలోకి దిగిన ఢిల్లీ పోలీసులు.. తీహార్ జైలులో గాలింపు చేపట్టారు. బాంబు స్క్వాడ్, డాగ్ స్క్వాడ్‌ను రంగంలోకి దింపి బాంబులు ఉన్నాయా అని అణువణువూ శోధిస్తున్నారు.

ఇక ఈ తీహార్ జైలులో ఢిల్లీ లిక్కర్ కేసులో అరెస్ట్ అయిన బీఆర్ఎస్ ఎమ్మెల్సీ కల్వకుంట్ల కవిత.. ఢిల్లీ మాజీ డిప్యూటీ సీఎం, ఆప్ నేత మనీష్ సిసోడియా.. ఢిల్లీ మాజీ మంత్రి సత్యేందర్ జైన్ సహా పలువురు కీలక రాజకీయ నేతలు ఉన్నారు. అంతేకాకుండా రూ.200 కోట్ల మనీలాండరింగ్ కేసులో అరెస్ట్ అయిన సుకేష్ చంద్రశేఖర్ కూడా ఇదే తీహార్ జైలులో ఉండటం గమనార్హం. ఇటీవల మధ్యంతర బెయిల్‌పై విడుదలైన ఢిల్లీ ముఖ్యమంత్రి, ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్ కూడా ఈ తీహార్ జైలులోనే ఉండేవారు.

ఇక మంగళవారం రోజే ఢిల్లీలోని 4 ఆస్పత్రులకు కూడా బాంబు బెదిరింపుల మెయిల్స్ వచ్చినట్లు అధికారులు తెలిపారు. ఢిల్లీలోని జీటీబీ హాస్పిటల్, దాదా దేవ్ హాస్పిటల్, హెగ్డేవార్ హాస్పిటల్, దీప్ చంద్ర బంధు హాస్పిటల్స్‌కు బాంబు హెచ్చరికల మెయిల్స్ వచ్చాయని ఢిల్లీ ఫైర్ సర్వీసెస్ అధికారులు స్పష్టం చేశారు. అయితే ఇప్పటివరకు జరిపిన సోదాల్లో ఎలాంటి అనుమానిత వస్తువుగానీ, బాంబు గానీ దొరకలేదని వెల్లడించారు. ఆస్పత్రుల్లో కూడా తనిఖీలు చేస్తున్నట్లు తెలిపారు.

గత నెలరోజుల్లో ఇలాంటి బాంబు బెదిరింపుల ఈ మెయిల్స్ రావడం ఇది నాలుగోసారి. స్కూళ్లు, హాస్పిటల్స్, ఎయిర్‌పోర్ట్‌లకు ఇలాంటి బాంబు హెచ్చరికల మెయిల్స్ వచ్చినట్లు అధికారులు వెల్లడించారు. ఢిల్లీలోని 20 ఆస్పత్రులు, ఇందిరాగాంధీ ఇంటర్నేషనల్ ఎయిర్‌పోర్ట్‌కు ఆదివారం బెదిరింపు మెయిల్స్ వచ్చాయి. అంతేకాకుండా ఢిల్లీలోని 100 పాఠశాలలకు, నోయిడాలోని రెండు స్కూళ్లకు, లక్నోలోని ఒక స్కూల్‌కు మే 1 వ తేదీన బాంబు బెదిరింపు మెయిల్స్ వచ్చాయి. అయితే ఈ బెదిరింపు మెయిల్స్‌ రష్యన్ ఈ మెయిల్ సర్వీస్ నుంచి వచ్చినట్లు గుర్తించారు.