ఎన్నికల తర్వాత కర్ణాటకలో ఆపరేషన్ కమలం.. సిద్ధరామయ్య సర్కార్‌లో ఏక్‌నాథ్ షిండే ఎవరు

కర్ణాటకలో సిద్ధరామయ్య నేతృత్వంలోని కాంగ్రెస్ ప్రభుత్వం ఏర్పడి ఏడాది పూర్తయింది. అయితే కన్నడనాట జరిగిన అసెంబ్లీ ఎన్నికల్లో బీజేపీ-జేడీఎస్ కూటమి ప్రభుత్వాన్ని ఓడించి.. కాంగ్రెస్ పార్టీ అధికారంలోకి వచ్చింది. అయితే సిద్ధరామయ్య ముఖ్యమంత్రి కుర్చీపై కూర్చున్నప్పటి నుంచి.. కర్ణాటక బీజేపీ నేతలే కాకుండా జాతీయ నేతలు కూడా కర్ణాటకలో కాంగ్రెస్ ప్రభుత్వం కూలిపోయి.. బీజేపీ ప్రభుత్వం వస్తుందని బహిరంగంగానే కామెంట్లు చేస్తున్నారు. ఈ క్రమంలోనే తాజాగా మహారాష్ట్ర ముఖ్యమంత్రి ఏక్‌నాథ్ షిండే కర్ణాటక కాంగ్రెస్ సర్కార్‌పై కీలక వ్యాఖ్యలు చేశారు. ప్రస్తుతం దేశంలో జరుగుతున్న సార్వత్రిక ఎన్నికలు పూర్తి కాగానే కర్ణాటకలో కూడా మహారాష్ట్రలో లాగే "నాథ్ ఆపరేషన్" జరుగుతుందని పేర్కొనడం ప్రస్తుతం తీవ్ర చర్చనీయాంశంగా మారింది. వీటిని కర్ణాటక కాంగ్రెస్ నేతలు ఖండిస్తున్నారు.

ఇటీవల మహారాష్ట్రలోని సతారాలో నిర్వహించిన ఎన్నికల ర్యాలీలో ప్రసంగించిన ఆ రాష్ట్ర ముఖ్యమంత్రి ఏక్‌నాథ్ షిండే తాను ఇటీవలె కర్ణాటకలో పర్యటించినట్లు చెప్పారు. అక్కడ కొందరు తన నుంచి కొన్ని విషయాలు తెలుసుకున్నారని.. మహారాష్ట్రలో మహావికాస్ఆఘాడీ కూటమిని చీల్చి.. బీజేపీతో పొత్తుతో ప్రభుత్వాన్ని ఎలా ఏర్పాటు చేశారని తన అనుభవాన్ని అడిగినట్లు చెప్పారు. దీంతో వారికి మద్దతుగా ఉంటానని చెప్పినట్లు తెలిపారు. మహారాష్ట్ర మాదిరిగానే కర్ణాటకలో కూడా “నాథ్ (ఏక్‌నాథ్) ఆపరేషన్” చేయాలని కొందరు తనకు చెప్పారని ఏక్‌నాథ్ షిండే చెప్పడం ప్రస్తుత కన్నడ నాట రాజకీయాల్లో హీట్ తెప్పించింది. ఈ లోక్‌సభ ఎన్నికల తర్వాత కర్ణాటకలో కాంగ్రెస్ పార్టీ కూలిపోతుందని చెప్పారు.

 అయితే ఏక్‌నాథ్ షిండే చేసిన వ్యాఖ్యలపై కర్ణాటక సీఎం, డిప్యూటీ సీఎం ఇతర నేతలు మండిపడుతున్నారు. వారు భ్రమల్లో, పగటి కలల్లో బతుకుతున్నారని ఏక్‌నాథ్ షిండేను పరోక్షంగా కర్ణాటక ముఖ్యమంత్రి సిద్ధరామయ్య విమర్శించారు. ఏ కారణం చేత కూడా కర్ణాటకలో ఆపరేషన్ కమలంతో ప్రభుత్వాన్ని పడగొట్టలేరని పేర్కొన్నారు. ఈసారి ఎన్నికల్లో ఎన్డీఏ పరాభవం చెందుతుందని అన్నారు. తమ ప్రభుత్వం స్థిరంగా ఐదేళ్లపాటు కొనసాగుతుందని ధీమా వ్యక్తం చేశారు. గతేడాది నుంచి ఇలాంటి ప్రయత్నాలు బీజేపీ నేతలు చేస్తున్నారని.. అవన్నీ ఫెయిల్ అయ్యాయని పేర్కొన్నారు. ఎందుకు మళ్లీ మళ్లీ ప్రయత్నిస్తున్నారని ప్రశ్నించారు. తమ ఎమ్మెల్యేలలో ఒక్కరు కూడా అమ్ముడుపోరని సిద్ధరామయ్య స్పష్టం చేశారు.

ఇక ఇవే వ్యాఖ్యలపై స్పందించి కర్ణాటక డిప్యూటీ సీఎం డీకే శివ కుమార్.. లోక్‌సభ ఎన్నికల తర్వాత బీజేపీ నేతృత్వంలోని ఎన్డీఏ ప్రభుత్వం మహారాష్ట్రలో అధికారంలోకి రాదని చెప్పారు. కాంగ్రెస్ పార్టీ విజయం సాధించి.. మిత్రపక్షాలతో కలిసి ప్రభుత్వాన్ని ఏర్పాటు చేస్తుందని ఏక్‌నాథ్ షిండేకు కౌంటర్ ఇచ్చారు. ఎవరైతే మహారాష్ట్రలో ఎన్సీపీ, శివసేన పార్టీల నుంచి వెళ్లిపోయారో.. వారు లోక్‌సభ ఎన్నికల తర్వాత తిరిగి వస్తారని చెప్పారు. అందుకే వారు భయపడి ఇలాంటి వ్యాఖ్యలు చేస్తున్నారని మండిపడ్డారు. అయితే కర్ణాటకలో ఏక్‌నాథ్ షిండేలు ఉన్నారా అని మీడియా అడిగిన ప్రశ్నకు సమాధానం ఇచ్చిన డీకే శివకుమార్.. తమ పార్టీలో ఎవరూ అలాంటి వారు లేరని.. వాళ్ల పార్టీలో ఉండొచ్చని ఎద్దేవా చేశారు.

లోక్‌సభ ఎన్నికల తర్వాత కర్ణాటకలోని బీజేపీ, జేడీఎస్ పార్టీల నుంచి 20 మంది ఎమ్మెల్యేలు కాంగ్రెస్ పార్టీలో చేరతారని కర్ణాటక పరిశ్రమల శాఖ మంత్రి ఎంబీ పాటిల్ పేర్కొన్నారు. ఇప్పటికే వారంతా తమతో టచ్‌లో ఉన్నారని తెలిపారు. ప్రభుత్వాన్ని కూల్చేందుకు కర్ణాటక ఏమీ మహారాష్ట్ర కాదని కౌంటర్ ఇచ్చారు. లోక్‌సభ ఎన్నికల తర్వాత మహారాష్ట్రలో ఏక్‌నాథ్ షిండే ప్రభుత్వం కూలిపోతుందని ఎంబీ పాటిల్ జోస్యం చెప్పారు.