భోజనానికి ముందు, తర్వాత టీ, కాఫీలు ఎందుకు తాగకూడదంటే?

చాలా మందికి టీ, కాఫీలు తాగడం అలవాటు ఉంటుంది. కొందరైతే రోజుకు 3, 4 తాగేస్తూ ఉంటారు. అయితే కొందరు మాత్రం భోజనానికి ముందు, తర్వాత కూడా టీ, కాఫీలు తాగుతూ ఉంటారు. అలాంటి వారికి ఇండియన్ కౌన్సిల్ ఆఫ్ మెడికల్ రీసెర్చ్-ఐసీఎంఆర్ షాక్ ఇచ్చింది. ఇటీవలె భారతీయుల కోసం 17 రకాల ఆహార పదార్థాలను సూచించిన ఐసీఎంఆర్ తాజాగా భోజనానికి ముందు, తర్వాత.. టీ, కాఫీలు తాగే వారికి డేంజర్ అని పేర్కొంది. నేషనల్ ఇన్‌స్టిట్యూట్ ఆఫ్ న్యూట్రిషన్ -ఎన్ఐఎన్ రీసెర్చ్ డిపార్ట్‌మెంట్‌తో కూడిన మెడికల్ ప్యానెల్.. భోజన సమయంలో టీ, కాఫీలు తాగడం గురించి కీలక విషయాలను వెల్లడించింది.

దేశంలో చాలా మంది తరచూ టీ, కాఫీలు తాగడానికి అలవాటు పడ్డారని ఐసీఎంఆర్ గుర్తించింది. అయితే వీటిని భోజనానికి ముందు లేదా తర్వాత తీసుకోవడం చాలా ప్రమాదం అని తాజాగా తీవ్ర హెచ్చరికలు జారీ చేసింది. టీ, కాఫీలలో కెఫిన్ ఉంటుందని.. ఈ కెఫిన్ మనిషి మెదడులోని కేంద్ర నాడీ వ్యవస్థను ప్రేరేపిస్తుందని ఐసీఎంఆర్ స్పష్టం చేసింది. ఈ సమయంలోనే టీ, కాఫీలను పూర్తిగా మానేయాలని మాత్రం చెప్పలేదు. కానీ వాటిలో ఉండే కెఫిన్ కంటెంట్ నుంచి మాత్రం తగిన జాగ్రత్తలు తీసుకోవాలని సూచించింది.

ఒక 150 మిల్లీ లీటర్లు ఉన్న కప్పు బ్రూ కాఫీలో 80 మిల్లీ గ్రాముల నుంచి 120 మిల్లీ గ్రాముల కెఫిన్ ఉంటుందని తెలిపింది. అదే ఇన్‌స్టంట్ కాఫీలో 50 మిల్లీ గ్రాముల నుంచి 65 మిల్లీ గ్రాముల కెఫిన్.. టీలో 30 మిల్లీ గ్రాముల నుంచి నుంచి 65 మిల్లీ గ్రాముల కెఫిన్ ఉంటుందని పేర్కొంది. ఒక రోజులో కేవలం 300 మిల్లీ గ్రాముల కెఫిన్‌ను మాత్రమే తీసుకోవాలని సూచించింది. టీ, కాఫీలను ఎంత తక్కువగా తాగితే ఆరోగ్యానికి అంత మంచిదని పేర్కొంది. ఇక మరీ ముఖ్యంగా భోజనానికి ముందు లేదా తర్వాత టీ, కాఫీలను అసలు తాగకూడదని తీవ్రంగా హెచ్చరించింది.

ఒకవేళ తాగాలని అనుకున్నా.. భోజనం చేయడానికి గంట ముందు.. లేదా భోజనం చేసిన గంట తర్వాతనైనా వాటిని తాగాలని సూచించింది. ఎందుకంటే టీ, కాఫీ లాంటి పానీయాల్లో టానిన్లు ఉంటాయని.. ఇవి మానవ శరీరం శోషించుకునే ఐరన్‌కు అడ్డుకట్టలా నిలుస్తాయని తెలిపింది. దీంతో మనకు ఐరన్ లోపం ఏర్పడి.. రక్తహీనత లాంటి అనారోగ్యాల బారిన పడిన పడే అవకాశాలు ఉంటాయని చెప్పింది. అధిక మోతాదులో కాఫీ తాగడం వల్ల అధిక రక్తపోటు, గుండె సంబంధిత వ్యాధులు వస్తాయని ఐసీఎంఆర్ హెచ్చిరించింది.

పాలు లేకుండా టీ తాగడం వల్ల రక్త ప్రసరణ మెరుగుపడడంతోపాటు కరోనరీ ఆర్టరీ డిసీజ్, క్యాన్సర్ వంటి రోగాల బారిన పడటం వంటి అనేక ప్రయోజనాలు ఉన్నాయని ఐసీఎంఆర్ తాజాగా విడుదల చేసిన మార్గదర్శకాల్లో పేర్కొంది. ఇక ఆహార పదార్థాల్లో నూనెలు, చక్కెర, ఉప్పును తగ్గించి.. పండ్లు, కూరగాయలు, తృణధాన్యాలు, మాంసం, సీ ఫుడ్ లాంటి ఆహార పదార్థాలను తీసుకోవాలని ఇప్పటికే ఐసీఎంఆర్ సిఫార్సు చేసింది.