"దిమ్మతిరిగేలా, మాడుపగిలేలా" అంటూ.. వైఎస్ షర్మిల ట్వీట్

ఏపీ ఎన్నికల పోలింగ్ ముగిసిన తర్వాత నుంచి సైలెంట్‌గా ఉన్న ఏపీసీసీ అధ్యక్షురాలు వైఎస్ షర్మిల.. తాజాగా ఎక్స్ వేదికగా ట్వీట్ చేశారు. వైఎస్ వివేకా హత్యకేసు గురించి మాట్లాడవద్దంటూ కడప కోర్టు ఇచ్చిన ఉత్తర్వులపై సుప్రీంకోర్టు శుక్రవారం స్టే విధించింది. ఈ నేపథ్యంలో ట్వీట్ చేసిన షర్మిల.. ఈ విజయం తొలి అడుగు మాత్రమేనని పేర్కొన్నారు. "దురాత్ముల నీచబుద్ధికి దిమ్మతిరిగేలా, మాడుపగిలేలా, వివేకానందరెడ్డి గారి హత్య విషయంలో నిన్న సుప్రీంకోర్టు స్టే ఇచ్చింది. భావప్రకటన స్వేచ్ఛపై ఈ రాక్షసమూక చేయబోయిన దాడిని తిప్పికొట్టి, ఎప్పటికైనా ధర్మపోరాటంలో చివరికి న్యాయమే గెలుస్తుందని నిన్న నిరూపణ అయ్యింది. అధికార బలాన్ని ఉపయోగించి, మూర్ఖత్వంతో ఇలాంటి చిల్లర కుట్రలు చేసేవారికి ఈ స్టే చెంపపెట్టు.ఈ విజయం తొలి అడుగు మాత్రమే. రాబోయే రోజుల్లో, వివేకానందరెడ్డి గారి కుటుంబానికి న్యాయం కోసం పోరాటం ఉధృతం చేస్తాము. చిట్టచివరిగా విజయం, నిజం, న్యాయం వైపే ఉంటాయని చూపిస్తాం" అంటూ షర్మిల ట్వీట్ చేశారు.

మరోవైపు కడప లోక్ సభ నియోజకవర్గం నుంచి బరిలోకి దిగిన వైఎస్ షర్మిల.. వైసీపీ అభ్యర్థి వైఎస్ అవినాష్ రెడ్డి లక్ష్యంగా విమర్శలు గుప్పించారు. మాజీ మంత్రి వైఎస్ వివేకా హత్యకేసు ప్రధానంగా వైఎస్ అవినాష్ రెడ్డి, వైఎస్ జగన్ మీద తీవ్ర విమర్శలు చేశారు. వైఎస్ వివేకా హత్యకేసులో నిందితులను చట్టసభల్లోకి వెళ్లనీయకూడదనే ఉద్దేశంతోనే తాను కడప నుంచి పోటీచేస్తున్నట్లు ప్రకటించిన షర్మిల.. ప్రచారం మొత్తం వివేకా హత్యకేసుపై ఆరోపణలు చేస్తూ వచ్చారు. ఈ నేపథ్యంలో కోర్టు విచారణలో ఉన్న అంశంపై బహిరంగ వ్యాఖ్యలు సరికాదంటూ వైసీపీ వర్గాలు కోర్టును ఆశ్రయించగా.. పిటిషన్ విచారించిన కడప కోర్టు, వైఎస్ వివేకా హత్యకేసు గురించి మాట్లాడవద్దంటూ ఆదేశాలు జారీ చేసింది.

 ఈ నేపథ్యంలో కడప జిల్లా కోర్టు తీర్పును వైఎస్ షర్మిల సుప్రీంకోర్టులో సవాల్ చేశారు. దీనిపై విచారణ జరిపిన సర్వోన్నత న్యాయస్థానం.. కడప కోర్టు ఇచ్చిన ఉత్తర్వులపై శుక్రవారం స్టే విధించింది. కడప కోర్టు ఉత్తర్వులు వాక్ స్వాతంత్రం, స్వేచ్ఛను హరించేలా ఉన్నాయని సుప్రీంకోర్టు అభిప్రాయపడింది. ప్రతివాదుల వాదన వినకుండా ఏకపక్షంగా ఉత్తర్వులు ఇచ్చారంటూ.. ప్రతివాదులందరికీ నోటీసులు జారీ చేసింది. అనంతరం తదుపరి విచారణను వేసవి సెలవుల తర్వాత చేపడతామని సుప్రీంకోర్టు పేర్కొంది. ఈ నేపథ్యంలోనే సుప్రీంకోర్టు తీర్పును స్వాగతిస్తూ వైఎస్ షర్మిల ట్వీట్ చేశారు.