రోడ్డుపై ఆపాడని కానిస్టేబుల్‌ను కొట్టిన యువకుడు.. వీడియో వైరల్

విశాఖపట్నంలో మందుబాబు వీరంగం సృష్టించాడు. మద్యం మత్తులో ఏకంగా కానిస్టేబుల్ మీద దాడి చేశాడు. విధుల్లో భాగంగా రోడ్డుపై ఆపిన కానిస్టేబుల్ మీద చేయి చేసుకున్నాడు. ఈ ఘటన విశాఖపట్నంలోని ఎన్ఏడీ జంక్షన్‌లో జరిగింది. వివరాళ్లోకి వెళ్తే.. విశాఖపట్నంలోని ఎన్‌ఎడి జంక్షన్‌లో శనివారం పోలీసులు డ్రంక్ అండ్ డ్రైవ్ తనిఖీలు నిర్వహించారు. ఇందులో భాగంగా వచ్చే, పోయే వాహనాలను తనిఖీలు చేస్తున్నారు. ఈ క్రమంలోనే ఇద్దరు యువకులు అక్కడికి బైక్ మీద వచ్చారు. తాగి డ్రైవింగ్ చేస్తుండటంతో పోలీసులు వారిని అక్కడ ఆపివేశారు. అయితే పోలీసులను చూడగానే ఓ వ్యక్తి.. అక్కడి నుంచి పరారయ్యాడు. బైక్ దిగి అక్కడి నుంచి పారిపోయాడు.

అయితే మరో వ్యక్తి మాత్రం పోలీసులతో దురుసుగా ప్రవర్తించాడు. వారితో వాగ్వాదానికి దిగాడు. మద్యం మత్తులో దురుసుగా ప్రవర్తించాడు. దీంతో పోలీసులకు, మందుబాబుకు మధ్య మాటామాటా పెరిగింది. ఈ క్రమంలోనే మందుబాబు ట్రాఫిక్ పోలీస్ చొక్కా పట్టుకోవడంతో.. పోలీసు కోపం కట్టలు తెంచుకుంది. ఆగ్రహించిన ఆ ట్రాఫిక్ కానిస్టేబుల్ మందుబాబుపై చేయి చేసుకున్నాడు. దీంతో యువకుడు కూడా తిరిగి పోలీసుపై చేయి చేసుకున్నాడు. దీంతో పరిస్థితి మరింత టెన్షన్‌గా మారింది. అయితే అక్కడే ఉన్న మిగతా పోలీసులు ఆ యువకుణ్ని అదుపులోకి తీసుకుని పోలీస్ స్టేషన్‌కు తరలించారు. కానిస్టేబుల్‌ను కొట్టినందుకు యువకుడి మీద కేసు నమోదు చేశారు.

అయితే.. యువకుడు, కానిస్టేబుల్ మధ్య జరిగిన ఈ తతంగాన్ని అక్కడే ఉన్న ఎవరో ఓ వ్యక్తి.. వీడియో తీసి సోషల్ మీడియాలో పోస్ట్ చేశారు, దీంతో ప్రస్తుతం ఈ వీడియో సోషల్ మీడియాలో వైరల్ అవుతోంది. మద్యం మత్తులో మందుబాబు వ్యవహరించిన తీరుపై నెటిజన్లు మండిపడుతున్నారు. విధులు నిర్వహిస్తున్న కానిస్టేబుల్‌పై చేయి చేసుకోవడాన్ని ఖండిస్తున్నారు.