లోక్‌సభ ఎన్నికల ఐదో దశ పోలింగ్.. రాహుల్, స్మృతి ఇరానీ, రాజ్‌నాథ్ సహా పలువురు ప్రముఖులు

లోక్‌సభ ఎన్నికల పోలింగ్ తుది దశకు చేరుకుంటోంది. ఇప్పటికే 4 దశల ఎన్నికలు పూర్తి కాగా.. సోమవారం ఐదో దశ పోలింగ్ జరగనుంది. మొత్తం 8 రాష్ట్రాల పరిధిలోని 49 స్థానాలకు ఓటింగ్ జరగనుంది. ఈ ఐదో విడత ఎన్నికల్లో పలువురు కేంద్రమంత్రులు పోటీ చేస్తున్నారు. ఇక కాంగ్రెస్ అగ్రనేత రాహుల్ గాంధీ, నేషనల్ కాన్ఫరెన్స్ నేత ఒమర్ అబ్దుల్లా, ఎల్‌జేపీ తరఫున చిరాగ్ పాశ్వాన్ వంటి ప్రముఖులు బరిలోకి దిగుతున్నారు. ఈ విడతలో ఉత్తర్‌ప్రదేశ్‌లోని రాయ్‌బరేలీ, లక్నో, అమేథీ వంటి కీలక నియోజకవర్గాలకు ఎన్నికలు జరగనున్నాయి.

ఉత్తరప్రదేశ్‌లోని రాయ్‌బరేలీ నియోజకవర్గం నుంచి కాంగ్రెస్ పార్టీ తరఫున రాహుల్ గాంధీ బరిలోకి దిగారు. రాహుల్ గాంధీకి పోటీగా.. బీజేపీ దినేష్ ప్రతాప్ సింగ్‌ను ఈ స్థానంలో బరిలోకి దింపింది. తన కుమారుడు రాహుల్ గాంధీ కోసం సోనియా గాంధీ రాయ్‌బరేలీ సీటును వదిలేశారనే వార్తలు వినిపిస్తున్నాయి. కేంద్ర రక్షణ మంత్రి రాజ్‌నాథ్ సింగ్.. ఉత్తర్‌ప్రదేశ్‌లోని లక్నో లోక్‌సభ స్థానం నుంచి పోటీ చేస్తున్నారు. ఇక సమాజ్‌వాదీ పార్టీ రాజ్‌నాథ్ సింగ్‌పై రవిదాస్ మెహ్రోత్రాను తమ పార్టీ అభ్యర్థిగా నిలబెట్టింది. గతంలో ఉత్తర్‌ప్రదేశ్‌ మంత్రిగా పనిచేసిన రవిదాస్ మెహ్రోత్రా.. ప్రస్తుతం లక్నో సెంట్రల్ అసెంబ్లీ స్థానంలో సిట్టింగ్ ఎమ్మెల్యేగా ఉన్నారు.

మరోవైపు.. కేంద్ర మంత్రి స్మృతి ఇరానీ.. అమేథీ తరఫున పోటీ చేస్తున్నారు. ఇక గత ఎన్నికల్లో కాంగ్రెస్ పార్టీ తరఫున ఇక్కడి నుంచి రాహుల్ గాంధీ పోటీ చేయగా.. ఈసారి ఆ స్థానాన్ని వదులుకున్నారు. దీంతో ఈసారి అమేథీ నుంచి గాంధీ కుటుంబానికి సన్నిహితుడైన కేఎల్ శర్మను ఆ పార్టీ బరిలోకి దింపింది. ఇక ముంబై నార్త్ నియోజకవర్గం నుంచి మరో కేంద్రమంత్రి పీయూష్ గోయల్ పోటీ చేస్తున్నారు.

ఎన్డీఏ కూటమి తరఫున ఎల్‌జేపీ (ఆర్) తరఫున బీహార్‌లోని హాజీపూర్ లోక్‌సభ స్థానం నుంచి చిరాగ్ పాశ్వాన్ పోటీ చేస్తున్నారు. ఇక ఇదే హాజీపూర్ నియోజకవర్గం నుంచి శివచంద్ర రామ్‌ను ఆర్జేడీ పార్టీ తమ అభ్యర్థిగా బరిలోకి దించింది. జమ్మూ కాశ్మీర్‌లోని బారాముల్లా నియోజక వర్గం నుంచి నేషనల్ కాన్ఫరెన్స్ పార్టీ కీలక నేత, జమ్మూ కాశ్మీర్ మాజీ ముఖ్యమంత్రి ఒమర్ అబ్దుల్లా పోటీ చేస్తున్నారు. ఒమర్‌ అబ్దుల్లాపై మెహబూబా ముఫ్తీకి చెందిన పీడీపీ పార్టీ నుంచి ఫయాజ్ అహ్మద్ పోటీలో ఉన్నారు. గత ఎన్నికల్లో నేషనల్ కాన్ఫరెన్స్ అభ్యర్థి అక్బర్ లోన్ ఈ స్థానంలో విజయం సాధించారు.

ఇక ఉత్తర్‌ప్రదేశ్‌లోని మోహన్‌లాల్‌గంజ్ స్థానం నుంచి కౌశల్ కిషోర్.. ఫతేపూర్ నియోజకవర్గం నుంచి సాధ్వి నిరంజన్ జ్యోతి.. మధ్యప్రదేశ్‌లోని దిండోరి సీటు నుంచి డాక్టర్ భారతీ ప్రవీణ్ పవార్.. జార్ఖండ్‌లోని కోడెర్మా స్థానం నుంచి అన్నపూర్ణా దేవి.. మహారాష్ట్రలోని భివాండి నియోజకవర్గం నుంచి కపిల్ పాటిల్‌ను బీజేపీ ఈ విడతలో పోటీలో నిలిపింది. ఇక మొత్తం 7 విడతల్లో లోక్‌సభ ఎన్నికల పోలింగ్ జరుగుతుండగా.. అందులో ఐదో దశ ఎన్నికలు సోమవారం జరగనున్నాయి. ఇక అన్ని దశల పోలింగ్ పూర్తయిన తర్వాత జూన్ 4 వ తేదీన ఫలితాలు వెలువడనున్నాయి.