మాచెర్ల ఎమ్మెల్యే పిన్నెల్లి కోసం పోలీసుల వేట.. ఈసీ సీరియస్.. నివేదిక పంపిన డీజీపీ

ఎన్నికలు ముగిసినా ఆంధ్రప్రదేశ్‌లో రాజకీయ వేడి ఇంకా తగ్గడం లేదు. మాచెర్ల నియోజకవర్గంలోని పాల్వాయ్ గేట్‌ పోలింగ్ కేంద్రం (202) లో ఎమ్మెల్యే పిన్నెల్లి రామకృష్ణా రెడ్డి.. ఈవీఎంను పగలగొట్టిన వీడియో ఇటీవల వెలుగులోకి రావడం తీవ్ర రాజకీయ రచ్చకు కారణం అయింది. మరోవైపు ఈ ఘటనపై స్పందించిన కేంద్ర ఎన్నికల సంఘం.. తీవ్ర ఆగ్రహం వ్యక్తం చేసింది. వెంటనే మాచెర్ల ఎమ్మెల్యేను అరెస్ట్ చేయాలని ఆదేశాలు ఇచ్చినా.. పోలీసులు మాత్రం ఇంకా ఆయనను పట్టుకోలేదు. దీంతో పిన్నెల్లి రామకృష్ణా రెడ్డిపై లుకౌట్ నోటీసులు జారీ చేసి.. గాలింపు చేపట్టారు.

ఈ క్రమంలోనే ఈ కేసులో కేంద్ర ఎన్నికల కమిషన్‌కు ఏపీ డీజీపీ హరీష్ కుమార్ గుప్తా.. కీలక నివేదికను బుధవారం పంపించారు. ఏపీ సీఈఓ ఎంకే మీనా ద్వారా కేంద్ర ఎన్నికల కమిషన్‌కు నివేదికను అందజేశారు. ఎమ్మెల్యే పిన్నెల్లిని అరెస్ట్ చేసేందుకు 4 స్పెషల్ టీమ్‌లను ఏర్పాటు చేసి గాలింపు చేపడుతున్నట్లు వెల్లడించారు. అంతేకాకుండా పిన్నెల్లిపై పలు సెక్షన్ల కింద కేసు నమోదు చేసినట్టు డీజీపీ అందులో వివరించారు. అంతేకాకుండా పిన్నెల్లి పారిపోకుండా ఉండేందుకు లుక్ అవుట్ సర్క్యూలర్ కూడా జారీ చేసినట్లు తెలిపారు.

పిన్నెల్లి రామకృష్ణా రెడ్డి ఆచూకీ కోసం తెలంగాణలో కూడా తనిఖీలు చేస్తున్నామని.. ఆయన దొరికిన వెంటనే అరెస్ట్ చేస్తామని డీజీపీ హరీష్ కుమార్ గుప్తా పేర్కొన్నారు. అంతేకాకుండా సిట్ ఐజీ వినీత్ బ్రిజీలాల్ ఇచ్చిన నివేదికను కూడా పంపుతున్నట్టు డీజీపీ తెలిపారు. ఈవీఎం ధ్వంసం చేసిన కేసులో పిన్నెల్లి రామకృష్ణా రెడ్డిని ఏ-1గా చేర్చినట్లు డీజీపీ వెల్లడించారు. వైసీపీ ఎమ్మె్ల్యే పిన్నెల్లితోపాటు ఆయన సోదరుడు వెంకట్రామిరెడ్డి కోసం పోలీసులు గాలింపు కొనసాగుతూనే ఉంది. మొత్తం 3 చట్టాల పరిధిలో 10 సెక్షన్ల కింద పిన్నెల్లి రామకృష్ణా రెడ్డిపై పోలీసులు కేసు నమోదు చేశారు.

ఇక తెలంగాణలోని సంగారెడ్డి జిల్లా ఇస్నాపూర్ పరిధిలో ఉన్న ఓ ఫామ్ హౌస్‌లో ఉన్న పిన్నెల్లి రామకృష్ణా రెడ్డిని పోలీసులు అరెస్ట్ చేసినట్లు వార్తలు వచ్చాయి. అయితే పోలీసుల నుంచి పిన్నెల్లి తప్పించుకుని పారిపోయారని కూడా వార్తలు వచ్చాయి. అయితే ఇది ఎంత వరకు నిజం అనేది మాత్రం తెలియరాలేదు.