ఐస్ క్రీమ్ కోసం యజమానిని బెదిరించిన గ్యాంగ్, కేసు నమోదు చేసిన పోలీసులు
Andhra Pradesh Telugu | Suryaa Desk | Published : Fri, May 24, 2024, 08:21 PM
వేట కత్తి చూపి షాపు యజమానిని బెదిరించి ఓ గ్యాంగ్ ఐస్ క్రీమ్‌లు దొంగిలించింది. ఈ ఘటన ఉమ్మడి చిత్తూరు జిల్లాలోని కుప్పం పట్టణంలో చోటు చేసుకుంది. స్థానిక హెచ్‌పీ రోడ్డులో మణికంఠ ఐస్‌క్రీమ్ షాపు నిర్వహిస్తున్నాడు. బుధవారం రాత్రి గంగమాంబ అమ్మవారి విశ్వరూప దర్శనానికి జనం భారీగా తరలి వచ్చారు. ఆ క్రమంలో ఐస్ క్రీమ్ షాపు వద్దకు కొంత మంది యువకులు గుంపుగా వచ్చారు. తమకు ఐస్ క్రీమ్‌లు కావాలని అడగడంతో.. వారందరికీ మణికంఠ ఐస్ క్రీమ్ ఇచ్చాడు. అనంతరం ఐస్ క్రీమ్‌లకు నగదు చెల్లించాలని వారిని మణికంఠ కోరాడు. దీంతో ఆగ్రహించిన ఆ గ్యాంగ్ తమ వద్దనున్న పదునైన వేట కత్తి బయటకు తీశారు. తమనే డబ్బులు అడుగుతావా? ఎక్కవ చేశావంటే.. ఇక్కడే నరికేస్తామంటూ షాపు యజమానిని బెదిరించారు. అక్కడే ఉన్న సుమారు రూ. 4 వేలు విలువ చేసే ఐస్ క్రీమ్ ప్యాకెట్ తీసుకుని అక్కడి నుంచి ఆ గ్యాంగ్ ఉడాయించింది. దీంతో మణికంఠ పోలీసులను ఆశ్రయించి.. ఫిర్యాదు చేశాడు. పోలీసులు కేసు నమోదు చేసి దర్యాప్తు ప్రారంభించారు. అందులో భాగంగా షాప్ వద్దనున్న సీసీ కెమెరా ఫుటేజ్‌లను పోలీసులు పరిశీలిస్తున్నారు.
|
|