కేదార్‌నాథ్ యాత్రికులను వణికించిన హెలికాప్టర్.. ల్యాండింగ్ వేళ గింగిరాలు

ప్రస్తుతం ఉత్తర భారతదేశంలోని మంచు కొండల్లో పవిత్ర చార్ ధామ్ యాత్ర కొనసాగుతోంది. లక్షలాది మంది భక్తులు దేశం నలుమూలల నుంచి చార్ ధామ్ క్షేత్రాలను సందర్శించేందుకు తరలి వెళ్తున్నారు. అయితే మంచు కొండల్లో.. ప్రతికూల పరిస్థితుల్లో ఈ చార్ ధామ్ యాత్ర.. కొన్ని కిలోమీటర్ల పాటు కొనసాగుతుంది. కొందరు యాత్రికులు నడిచి వెళ్తుండగా.. మరికొందరు జంతువులపై ఎక్కి వెళ్తారు. ఇక హెలికాప్టర్ సౌకర్యం కూడా ఉంటుంది. స్థానికంగా ఉన్న ప్రతికూల పరిస్థితుల కారణంగా ఓ హెలికాప్టర్‌లో సాంకేతిక సమస్య తలెత్తింది. దీంతో ఆ హెలికాప్టర్‌ కొద్దిసేపు గాల్లోనే చక్కర్లు కొట్టింది.

యాత్రికులను ఎక్కించుకున్న హెలికాప్టర్ కేదార్‌నాథ్‌కు వెళ్లేందుకు ప్రయత్నించగా.. ఈ సంఘటన చోటు చేసుకుంది. వెంటనే చాకచక్యం ప్రదర్శించిన పైలట్.. హెలికాప్టర్‌ను కంట్రోల్ చేసి ల్యాండ్ చేయడంతో పెను ప్రమాదం నుంచి కేదార్‌నాథ్ యాత్రికులు బయటపడ్డారు. కేస్ట్రల్‌ ఏవియేషన్‌కు చెందిన ఓ హెలికాప్టర్‌.. ఉత్తరాఖండ్ రుద్రప్రయాగ్ జిల్లాలోని సిస్రీ హెలిప్యాడ్ నుంచి కేదార్‌నాథ్‌కు ఆరుగురు యాత్రికులు, ఒక పైలట్‌తో బయల్దేరింది. అయితే వెంటనే ఆ హెలికాప్టర్‌లో సాంకేతిక సమస్య తలెత్తడంతో పైలట్ ఎమర్జెన్సీ ల్యాండింగ్‌ చేయాలని నిర్ణయించుకున్నాడు.

ఈ క్రమంలోనే ఆ హెలికాప్టర్ గాల్లో చక్కర్లు కొట్టింది. దీంతో హెలికాప్టర్‌పై పూర్తి నియంత్రణ సాధించిన పైలట్.. ఎట్టకేలకు ఆ హెలికాప్టర్‌ను హెలిప్యాడ్‌కు సుమారు 100 మీటర్ల దూరంలో గడ్డి నేలపై ల్యాండ్‌ చేశాడు. సమయానికి పైలట్‌ స్పందించి సేఫ్ ల్యాండింగ్ చేయడంతో అందులోని ప్రయాణికులే కాకుండా కింద ఉన్న యాత్రికులు కూడా ఊపిరి పీల్చుకున్నారు. అయితే గాల్లో హెలికాప్టర్ చక్కర్లు కొట్టడంతో.. కింద ఉన్న పర్యాటకులు తీవ్ర భయభ్రాంతులకు గురయ్యారు. గట్టిగా కేకలు వేస్తూ పరుగులు పెట్టారు.

మే 10 వ తేదీన ప్రారంభమైన చార్ ధామ్ యాత్రకు భక్తులు భారీగా పోటెత్తుతున్నారు. నిత్యం వేల మంది గంగోత్రి, యమునోత్రి, కేదార్‌నాథ్‌, బద్రీనాథ్‌ క్షేత్రాలను దర్శించుకునేందుకు చార్ ధామ్ యాత్రకు వెళ్తున్నారు. దీంతో అక్కడి మార్గాలు మొత్తం ట్రాఫిక్‌‌‌తో నిండిపోయాయి. ఇక క్యూలైన్లలో గంటల తరబడి యాత్రికులు వేచి ఉంటున్నారు. ఇప్పటికే లక్షలాది మంది ఈసారి చార్ ధామ్ యాత్రను సందర్శించారు.

చార్‌ ధామ్‌ యాత్ర సాధారణంగా ఏప్రిల్, మే నెలలో ప్రారంభమై అక్టోబర్, నవంబర్ నెల వవరకు కొనసాగుతుంది. చార్ ధామ్ యాత్రలో మొదట యమునోత్రి నుంచి ప్రారంభమై.. గంగోత్రి, కేదార్‌నాథ్ మీదుగా చివరికి బద్రీనాథ్‌లో ముగుస్తుంది. ఇక ఈసారి భారీగా యాత్రికులు పోటెత్తుతుండటంతో చార్ ధామ్ యాత్రకు వచ్చే వారందరికీ.. రిజిస్ట్రేషన్ తప్పనిసరి అని ఉత్తరాఖండ్ ప్రభుత్వం స్పష్టం చేసింది. రిజిస్ట్రేషన్ లేని వారిని లోపలికి అనుమతించడం లేదు.