గ్రామంపై అర్ధరాత్రి విరిగిపడ్డ కొండచరియలు.. 100 మందికిపైగా మృతి

అర్ధరాత్రి ఓ గ్రామంపై విరుచుకుపడిన కొండచరియలు ఏకంగా 100 మంది ప్రజలను బలి తీసుకున్నాయి. గ్రామస్థులంతా గాఢ నిద్రలో ఉండగా.. ఒక్కసారిగా కొండచరియలు విరిగిపడటంతో భారీగా ఆస్తి, ప్రాణ నష్టం సంభవించింది. ఈ ఘోర సంఘటన పపువా న్యూ గినియా దేశంలోని ఓ మారుమూల గ్రామంలో జరిగింది. రాజధానికి 600 కిలోమీటర్ల దూరంలో ఉన్న ఓ గ్రామాన్ని కొండచరియలు వణికించాయి. రోజూ లాగానే రాత్రి పూట నిద్రపోయిన ఆ గ్రామస్థులు.. ఉదయం మాత్రం నిద్ర లేవకుండానే నిద్రలోనే ప్రాణాలు విడిచారు. ఈ సంఘటన ప్రతీ ఒక్కరినీ కలిచి వేస్తోంది.

పపువా న్యూ గినియా రాజధాని పోర్ట్ మోర్స్బీకి 600 కిలోమీటర్ల దూరంలో ఎన్గా ప్రావిన్స్‌లోని కావోకలం గ్రామంలో ఆ దుర్ఘటన జరిగింది. స్థానిక కాలమానం ప్రకారం.. తెల్లవారుజామున 3 గంటలకు సంభవించిన ఈ ప్రకృతి విపత్తు.. ఆడ, మగ, చిన్నా, పెద్దా తేడా లేకుండా 100 మందికిపైగా గ్రామస్థులను బలి తీసుకుంది. ఇక ఈ ఘటనలో ఆ గ్రామంలో పదుల సంఖ్యలో గాయాల పాలయ్యారు. ఇంకా కొండచరియల శిథిలాల కింద మరింత మంది చిక్కుకున్నట్లు స్థానికులు వెల్లడించారు. ఈ విషయాన్ని ఆస్ట్రేలియా అధికారిక మీడియా ఆస్ట్రేలియన్ బ్రాడ్‌కాస్టింగ్ కార్పొరేషన్ వెల్లడించింది.

భారీగా కొండచరియలు విరిగి గ్రామంపై పడటంతో చాలా ఇళ్లు నేలమట్టం అయ్యాయి. మరికొన్ని ఇళ్లు ధ్వంసం అయినట్లు ఆస్ట్రేలియన్ మీడియా తెలిపింది. అయితే గ్రామస్థులు పూర్తిగా గాఢ నిద్రలో ఉండగా.. ప్రమాదం జరగడంతో తప్పించుకునే పరిస్థితి లేకుండా చాలా మంది చనిపోయారని పేర్కొంది. ఇక శిథిలాల కింద చిక్కుకున్న వారిని కాపాడేందుకు స్వయంగా గ్రామస్థులే రంగంలోకి దిగారు.

బండ రాళ్లు, చెట్లు కూలడంతో అనేక ఇళ్లు పూర్తిగా నేలమట్టమయ్యాయని.. వాటి కింద చిక్కుకున్న వారిని వెలికి తీసేందుకు తీవ్ర అవస్థలు పడుతున్నట్లు గ్రామస్థులు పేర్కొన్నారు. అయితే ఇప్పటివరకు వంద మందికిపైగా మృతదేహాలను బయటకి తీశామని.. సహాయక చర్యలు పూర్తయ్యే సరికి మృతుల సంఖ్య భారీగా పెరిగే అవకాశముందని తెలిపారు. ఘటన జరిగిన కావోకలం గ్రామానికి ఇంకా సహాయక సిబ్బంది చేరుకోకపోవడం తీవ్ర వివాదానికి కారణం అయింది. మరోవైపు.. ఈ కొండ చరియల్లో ఎంత మంది చనిపోయారు అనే విషయంపై పపువా న్యూ గినియా ప్రభుత్వం ఇంకా అధికారిక ప్రకటన జారీ చేయక పోవడం గమనార్హం.