'లాడ్జికొస్తావా.. డిప్యుటేషన్‌ రద్దు చేయించమంటావా'.. మహిళా ఉద్యోగినికి పై అధికారి లైంగిక వేధింపులు

అధికారాన్ని అడ్డం పెట్టుకొని కొందరు ప్రభుత్వ ఉన్నతాధికారులు కిందిస్థాయి సిబ్బందిని లైంగిక వేధింపులకు గురి చేస్తున్నారు. ఇటీవల హైదరాబాద్ జీహెచ్‌ఎంసీ పరిధిలో ఓ అధికారి పారిశుద్ధ్య కార్మికురాలిని లైంగికంగా వేధించటంతో పాటు ఆ తతంగాన్నంతా వీడియో తీయగా సోషల్ మీడియాలో వైరల్ అయిన సంగతి తెలిసిందే. తాజాగా.. ప్రకాశం జిల్లా మార్కాపురంలోనూ ఓ కీచక అధికారి వ్యవహారం వెలుగులోకి వచ్చింది. కింది స్థాయిలో పని చేసే ఓ మహిళా ఉద్యోగినితో సదరు అధికారి గత కొంత కాలంగా అసభ్యంగా ప్రవరిస్తున్నాడు. లాడ్జికొచ్చి తన కోరిక తీర్చాలని లేదంటే డిప్యూటేషన్ రద్దు చేస్తానని బెదిరింపులకు పాల్పడుతున్నాడు.

వివరాల్లోకి వెళితే.. మార్కాపురం డివిజనల్‌ పంచాయతీ కార్యాలయంలో ఓ వితంతు మహిళకు ప్రభుత్వం ఉద్యోగమిచ్చింది. ఇతర ప్రాంతంలో విధులు నిర్వహించలేక ఆమె డిప్యుటేషన్‌పై మార్కాపురం డివిజనల్ ఆఫీసుకు వచ్చారు. అప్పటి నుంచి ఆమెపై కన్నేసిన ఓ పై స్థాయి అధికారి.. డిప్యుటేషన్‌ అంశాన్ని అదునుగా తీసుకొని ఆమెను వేధింపులకు గురి చేయటం మెుదలుపెట్టాడు. తోటి ఉద్యోగులు భోజనానికి వెళ్లిన సమయంలో సదరు మహిళా ఉద్యోగినితో అసభ్యంగా ప్రవర్తించేవాడు. చెప్పిన పని చేయకుంటే డిప్యుటేషన్‌ రద్దు చేయిస్తా అని బెదిరింపులకు పాల్పడేవాడు.

మార్కాపురంలోని తన స్నేహితుడి లాడ్జి ఉందని అక్కడకు రావాలని, లేకుంటే పొదిలి, కంభమైనా రావాలంటూ సదరు బాధిరాలిని తీవ్రంగా వేధిస్తుండేవాడు. తన ప్రొబిషన్‌ కాలం పూర్తయ్యే వరకు వీటన్నింటినీ భరిస్తూ వచ్చిన బాధితురాలు.. చివరికి నాలుగో తరగతి ఉద్యోగుల సంఘం నాయకులకు లిఖితపూర్వకంగా ఫిర్యాదు చేశారు. అయితే ఈ ఘటనపై ఉన్నతాధికారులు ఎలాంటి చర్యలు తీసుకుంటారనేది వేచి చూడాలి మరి.