జూన్ 14 తర్వాత ఆ ఆధార్ కార్డులు పనిచేయవా? మీరు అప్డేట్ చేశారా లేదా? ఉడాయ్ ఏం చెప్పిందంటే

భారతీయులకు ఆధార్ కార్డు ఎంతో ముఖ్యమైన డాక్యుమెంట్ అన్న సంగతి తెలిసిందే. ఇది గుర్తింపు కార్డుగా పనిచేస్తుంది. ఇంకా అడ్రస్ ప్రూఫ్‌గానూ ఇది ఉపయోగపడుతుంది. ఎన్నో ప్రభుత్వ ప్రయోజనాలు అందుకోవాలంటే కూడా ఇది తప్పనిసరి. అలాంటి ఆధార్ కార్డులో వివరాలన్నీ సరిగా ఉండాలి. పేరు, పుట్టిన తేదీ సహా ఏదీ తప్పుల్లేకుండా చూసుకోవాల్సిన అవసరం ఉంటుంది. అయితే ఇప్పుడు ఆధార్ కార్డుకు సంబంధించి సామాజిక మాధ్యమాల్లో ఒక వార్త చక్కర్లు కొడుతుందన్న సంగతి చాలా మందికి తెలుసు. దీనిపై తెగ చర్చ నడుస్తోంది. జూన్ 14 లోపు వ్యక్తిగత వివరాలు అప్డేట్ చేయకుంటే.. ఆధార్ కార్డు పనిచేయదని వార్తలు వస్తున్నాయి. అయితే దీనిపై ఇప్పుడు భారత విశిష్ట గుర్తింపు ప్రాధికార సంస్థ (యూఐడీఏఐ) కొట్టిపారేసింది.

ఆధార్ కార్డుకు సంబంధించి ఏదైనా ఉచితంగా అప్డేట్ చేసుకునేందుకు మాత్రమే జూన్ 14 ఆఖరి తేదీ అని తెలిపింది. మార్చుకోకపోయినప్పటికీ ఆధార్ కార్డు యథావిధిగా పనిచేస్తుందని స్పష్టం చేసింది. ఆ తర్వాత కూడా ఎప్పుడైనా వివరాలు మార్చుకోవచ్చని పేర్కొంది. దీని కోసం ఆధార్ కేంద్రాలు లేదా కామన్ సర్వీస్ సెంటర్లకు వెళ్లి నిర్దేశిత రుసుము చెల్లించాల్సి ఉంటుందని వివరించింది. ఆధార్ కార్డు ఫ్రీగా అప్డేట్ చేసుకునేందుకు విధించిన గడువు జూన్ 14 దగ్గర పడుతున్న నేపథ్యంలోనే ఎన్నో వదంతులు వస్తున్నాయి.

ఆధార్ కార్డు ఫ్రీ అప్డేట్‌కు సంబంధించి యూఐడీఏఐ పలుమార్లు గడువు పొడిగించుకుంటూ వస్తోంది. మొదటగా 2023 డిసెంబర్ 14 వరకు అవకాశం ఇచ్చింది. తర్వాత దీనిని మార్చి 14 వరకు ఒకసారి, మళ్లీ 3 నెలలు పొడిగించి తర్వాత జూన్ 14 వరకు చేసింది. అంటే ఆ సమయంలోగా ఆన్‌లైన్లో మైఆధార్ వెబ్‌సైట్ ద్వారా ఉచితంగా డీటెయిల్స్ అప్డేట్ చేసుకోవచ్చు. ఆధార్ కార్డులో పేరు నమోదు చేసుకున్న నాటి నుంచి పదేళ్లు పూర్తయి ఇంకా అప్డేట్ చేసుకోని వారు ఉంటే కూడా అప్డేట్ చేసుకోవాలని ఉడాయ్ గతంలో సూచించింది. ఇది ఆదేశం మాత్రం కాదు. ఏదైనా వివరాలు మారి ఉంటాయి ఇన్నేళ్లలో కాబట్టి అప్డేట్ చేసుకోమని చెప్పిందన్నమాట.

కనీసం 10 సంవత్సరాలకు ఒకసారి గుర్తింపు కార్డు, అడ్రస్ ప్రూఫ్ సమర్పించి కేంద్ర గుర్తింపు సమాచార నిధి (సెంట్రల్ ఐడెంటిటీస్ డేటా రిపాజిటరీ- సీఐడీఆర్) లోని డీటెయిల్స్ అప్డేట్ చేసుకోవాలని పేర్కొంది ఉడాయ్. ఈ ప్రాసెస్ వల్ల పౌరుల సమాచారం సీఐడీఆర్ వద్ద ఎప్పటికప్పుడు అప్డేట్ అవుతుంటుందని వివరించింది. దీంతో కచ్చితమైన సమాచారం నిక్షిప్తం అయ్యేందుకు దోహదం చేస్తుందని తెలిపింది.

ఇక ఈ వివరాలు అప్డేట్ చేసుకునేందుకు ఉడాయ్ వెబ్‌సైట్లోకి లాగిన్ అయ్యాక.. లేటెస్ట్ గుర్తింపు కార్డు, అడ్రస్ డీటెయిల్స్ సబ్మిట్ చేయాల్సి ఉంటుంది. ఓటర్ ఐడీ, రేషన్ కార్డు, పాస్‌పోర్ట్ వంటివి గుర్తింపు, అడ్రస్ రెండింటి కోసం ప్రూఫ్స్‌గా వినియోగించుకోవచ్చు. టీసీ, పాన్ కార్డు, డ్రైవింగ్ లైసెన్స్, మార్కు షీట్ వంటివి గుర్తింపు కార్డుగా, కరెంట్, వాటర్, టెలిఫోన్ బిల్స్ అడ్రస్ ప్రూఫ్‌గా ఉపయోగించుకోవచ్చని తెలిపింది.