గ్యాస్ సిలిండర్ వినియోగదారులకు అలర్ట్.. జూన్ 1 నుంచి వారి కనెక్షన్లు రద్దు నిజమేనా? రూ. 300 అదనంగా కట్టాల్సిందేనా

ఎల్‌పీజీ గ్యాస్ సిలిండర్ వినియోగదారులకు ముఖ్యమైన గమనిక. గ్యాస్ కనెక్షన్‌కు సంబంధించి ఎప్పటినుంచో కేవైసీ చేసుకోవాలని వార్తలు వస్తున్న సంగతి తెలిసిందే. ఇండేన్, హెచ్‌పీ, భారత్ గ్యాస్ ఇలా పలు ఇంధన కంపెనీలు ఇప్పటికే కస్టమర్లకు సందేశాల్ని పంపిస్తున్నాయి. వీలైనంత త్వరగా కేవైసీ ప్రక్రియ పూర్తి చేసుకోవాలని స్పష్టం చేస్తున్నాయి. ఇంకా పత్రికా ప్రకటనల్లోనూ ఇది చూడొచ్చు. కేవైసీ చేసుకోవాలని కేంద్ర ప్రభుత్వం కూడా ఎప్పటి నుంచో చెబుతూనే ఉంది. దీనికి సంబంధించి పెట్రోలియం మంత్రిత్వ శాఖ గతంలోనే నోటిఫికేషన్ జారీ చేసింది. ఇంకా ఎవరైనా కేవైసీ చేసుకోని వారుంటే.. ఆందోళన చెందనవసరం లేదు. దీనికి మే 31 లాస్ట్ డేట్ అని ఎప్పటినుంచో రిపోర్ట్స్ వస్తున్నా ఇందులో వాస్తవం లేదని తెలుస్తోంది.

గ్యాస్ సిలిండర్ ఇకేవైసీ కోసం ప్రస్తుతానికి ఎలాంటి గడువు లేదని నివేదికలు పేర్కొంటున్నాయి. సిలిండర్ కస్టమర్ల ఇళ్లకు గ్యాస్ సిలిండర్ డెలివరీ చేసే సమయంలో.. డెలివరీ సిబ్బందే ఇకేవైసీ పూర్తి చేస్తారు. ఆధార్‌ను ధ్రువీకరించుకొని బయోమెట్రిక్ తీసుకుంటారు.

ఆయిల్ మార్కెటింగ్ కంపెనీల ప్రకారం.. ఎల్‌పీజీ కనెక్షన్‌తో ఆధార్ లింక్ చేసుకునేందుకు ఎలాంటి రుసుములు ఉండవు. ఇంకా.. ఇండియన్ ఆయిల్ యాప్ డౌన్‌లోన్ చేయడం ద్వారా ఆధార్ ధ్రువీకరించుకోవడం ద్వారా ఇకేవైసీ ఈజీగా పూర్తి చేయొచ్చు. ఇండేన్ గ్యాస్ కలిగిన వారు ఈ సదుపాయం పొందొచ్చు.

>> ఆన్‌లైన్‌ సహా ఆఫ్‌లైన్‌లోనూ ఇది పూర్తి చేసుకోవచ్చు. దీని కోసం సంబంధిత గ్యాస్ డీలర్ దగ్గరకు వెళ్లి ఎల్‌పీజీ సిలిండర్ కోసం ఇకేవైసీ పూర్తి చేసుకోవచ్చు. దీని కోసం ఒక ఫారం పూర్తి చేయాల్సి ఉంటుంది. అక్కడ మీ పేరు, కస్టమర్ నంబర్ ఇవ్వాలి. దీనితో పాటు భర్త లేదా తండ్రి పేరు ఇవ్వాలి. అడ్రస్ ప్రూఫ్ అందించాల్సి ఉంటుంది. ఆధార్ లేదా ఇతర డాక్యుమెంట్లు కూడా చిరునామా పత్రాలుగా సమర్పించొచ్చు.

>> ఇకేవైసీ ఇస్తే కస్టమర్ సమాచారం మొత్తం ప్రభుత్వం దగ్గర ఉంటుంది. కేవైసీ పూర్తి చేస్తేనే అప్పుడు నకిలీ కనెక్షన్లు ఉంటే బయటపడతాయి. అప్పుడు బ్లాక్ మార్కెట్ తగ్గుతుంది. దీంతో ప్రభుత్వానికి బెనిఫిట్ ఉంటుంది. దీంతో నిరుపేదలకు సరైన సమయంలో గ్యాస్ సిలిండర్లు అందుతాయి. ప్రస్తుతం ప్రధాన మంత్రి ఉజ్వల యోజన కింద అర్హులైన వారికి రూ. 300 సబ్సిడీ అందిస్తుంది కేంద్రం. అందుకోసం కేవైసీ చేసుకోవాలి. దీనికి డెడ్‌లైన్ అంటూ ఏం లేదు కానీ కేవైసీ చేసుకోవడం ఉత్తమం. లేకపోతే కేంద్రం నిర్ణయం తీసుకుంటే ఈ సబ్సిడీ రాకపోవచ్చు.